Psalms119
1Penui teilung kemau kegahme ne samlam pungtu, RAMPAUBE zai gade tet kelame.2Pe ajadung mzui kelamedung ne samlam pungtu, penui nlung pelane teu pecu peei kelame3Penui ma tei maudi lama; penui RAMPAUBE lampui ga tetla la.4Oh RAMPAUBO, nang anuide n keledeu samdung nzai lulo beuda anuide peu cidungde mzui siakte lu kerane.5Oh, n zaidung mzui kela gade Ih ntip bam lu kera!6Iciu lude Ih n ajadung cet kegaidau acu hengam gage kai dilak.7Ih a mlung kemci le teu ncu twazie Ih n tutiak kemzuidung ci keludau.8Ih n zaidung nzai zie; acu gi diso.9Daiznwa rehangme ge pe teilung teimci pwabam lulai? N samdung kemzai gade zie.10Ih a nlung pelane teu ncu peei zie; Peu acu n ajadung gade tetmdei diso.11Ih a nlung gage n sam kaipwabam Ih n dage kemau teigai di melu kerane.12Nang samlam pung lei, RAMPAUBO; n zaidung acu ledeu beulo.13A mui le Ih rang ndu gaila n tutiak kemzuidung nang keulia kegai leune de.14N samkakkelu zaidung ga Ih sui la maheidung pelane swade.15Nang ranglia kegaidung de Ih cetncok zie nah lh n keledeudung cetla.16Ih n zaidung a suila la; Ih n sam nsung tadi lak.17N kilabe dage n zai yi gailo iciu eh Ih lunglu kerane nah n sam mzailu kerane.18A miak tei nrak gai beulo iciu eh Ih n zai ga miswakegah batadung pielu kerane.19Ih hangdeu be ga sangme ge; n ajadung a dade hebai diso.20Alung tei eh a kereguidung au peting pelane n tutiak kemzuidung de cineu eh bam la.21Nang ngang kelame de kesiula, reset pung kelame, n samdung mzai la kemakme.22Acu hengam nah tei kengngam gade acu kelibeu lo, kedanemene n samkak kelu zaidung de Ih mzai kecune.23Hegwangme ngkwalwe acu rangmsia la, dede n kilabe au n zaidung cetncok lala.24N samkak kelu zaidung au a suiyi da, nah penui au a keledeumedung.25A teilung rebui ga herak pwabam! N sam le acu teilung peulo.26Ih a lampuidung ncu ranglia da, nah nang a sam kelibeu; n zaidung acu ledeu beulo.27N keledeu lampuidung de peu acu cilo, iciu eh Ih n keledeusam miswakegahdung de cetncok kerane.28Ih au suisiet le puipung! N sam le acu tei ngkieng beulo.29Mide kecwa lampui gade acu teu nreu beulo; n zai keyi gade acu n zai ledeu beulo.30Kesamsang lampui de Ih kedet luda; A dwa gade n tutiak kemzuidung de Ih mzai muila.31N samkak kelu zaidung de Ih herak ntip pwabam; RAMPAUBO, acu peu hengam tei diso.32N ajadung lampui ga Ih pak zie, kedanemene nang ne cide tei kera a nlung tei mdibeu kecune.33Acu ledeu beulo, RAMPAUBO, n zai kiedungde, nah kekam kecang Ih cide nzai lazie.34Macet keci acu peulo, nah Ih n zai mzui luzie; A nlung pelane teu Ih cide nzai luzie.35N ajadung lampui gage acu ngngwa gailo, kedanemene Ih cika tet kera a suila la.36N samkakkelu zaidung lebie ge a nlung de saugai beu nah samsang kemak kehengim gade acu teu mdei dilu.37Kemtabe niadung kepie gade a miak teunreu dilu; n sui lungning gade acu tei ngkieng beulo.38N kilabe ziemne n sampet de teicang beulo ncu herüt peu kelame dage n sam petgai kebeude.39Ih hing kebam acu ki kecu gade acu teu tetdi beulo, kedanemene n kesamsang hezaidung au yi kecune.40Pielo, Ih n keledeudung nzai neula; n kesamsang gade acu tei ngkieng beulo.41RAMPAUBO, madaude nlidi la kemak n keku acu peulo, n kelikelu, n sam pet kebeude nzwa;42iciude acu kii kelame sam keli lu kera a da bam zie, kedanemene Ih n sam nlum lalu.43A mui gade kesang sam keuteu di helo, kedanemene a keregui n tutiak kemzuidung ga bamlu.44Ih n zaidung mzai lamui zie, kelungta nah kelungta.45Ih kwak eh tet zie, kedanemene Ih n keledeudung de peei lalu.46Ih n sam kaikebeudung de hegwangmedung dwa gade rang zie nah ngngam dilak.47Ih n ajadung ga asui lala, Ih hungsüt keladung de.48Ih n ajadung de rüt zie, Ih hung kelade; Ih n zaidung de cetncok zie.49N kilabe dage n sampet de teicang kera nsunggai lo kedanemene nang acu keregui peu kecune.50Aide Ih keherei keladau acu tei ncieplu kelabe: n sam pet kebeude acu kering peu kelade.51Ngang kelame acu mneula, dede n zai gade Ih nreu tetdi ma.52Ih ndaa de n tutiak kemzuidung de cet lala, RAMPAUBO, nah Ih akatei acu a lung tau mla lula.53Ih a ratasüt dila kenlienme n zai mlai kedide ziemne.54N zaidung de a leidung da Ih kak nage lung kebam ki dega.55Ih tingmui n zi cet la, RAMPAUBO, nah Ih n zai mzai la.56Aide Ih teimui la kedanemene Ih n keledeu de mzai lalu.57Ih luneu kela au nang RAMPAUBO; Ih n samdung mzai kera cet luda.58Ih n dade a mlung pelane teu acu nghalo de kiela; acu ngaunggia lo, n sam pet kebeu nzwa.59Ih a lampuidung cet mning gai nah n samkak kelu zaidung gage a pi teu nreu gai luda.60Ih ridi mene nzet eh n gu ajadung mzai lu kerane.61Kenlienme baih ne acu teu pwabam; Ih n zai nsungta dima.62Ih tingmuisum ge ncu twa kerane cuh la n tutiak kemzuidung de ziemne.63Ih ncu herüt peu kelame leune zangme ge, n keledeudung mzai kelame leune.64Kideu be, RAMPAUBO, n samkakkelu samsang le pui; n zaidung acu ledeu beulo.65N kilabe dage nang makeyi teigai, RAMPAUBO, n sam le.66Acu ma petaube nah keci kecet ledeu beulo, kedanemene Ih n ajadung de nlum lalu.67Ih keherei di kemakne kemau lampui ga tetla, dede cu au Ih n sam mzaila.68Oh RAMPAUBO, nang au yi, nah nang rünne makeyi teila; n zaidung acu ledeu beulo.69Ngang kelamedung kenretdung dele a ha rangmsia la, dede Ih a nlung pelane teu n keledeu de mzaila.70Penui nlungdung au tak, dede Ih n zai gade asui keyi ngau lula.71Ih keherei kegaide a ziemne keyi ge iciu eh Ih n zaidung cilu kerane.72N mui gade keledeu sam de kecak nah rangkanggeu pecang pecang swade a ziemne pemi whung ki.73N ba le acu teigai nah a rehi teu beu; acu maci peulo iciu eh Ih n ajadung cilu kerane.74Ncu rüt kelame acu ngau kegaidau penui sui yizie kedanemene Ih n sam ga keregui ngaulu kelane.75Ih cibam, RAMPAUBO, n hezaidung au masang lie kecu, nah n masang ne acu saja peula.76N samkakkelu samsang de le a lung tau mla beulo, nang n kilabe de n sampet kai kebeu nzwa.77Acu ngaunggia gailo iciu eh Ih lunglu kerane, kedanemene Ih n zai de a sui lalu.78Peu ngang kelame de ngngam dilu, kedanemene penui acu rangmsia lalu; dede Ih au n keledeudung de cetncok lazie.79Peu ncu rüt kelame de a da nreu gwanglu, n samkak kelu zaidung de ci kebamme.80Peu a nlung de n zaidung gade mmau kecu tei diso iciu eh acu hengam ga kai di melu kerane.81Nang acu kelibeu kera kwa eh Ih mnei dida! N sam ga Ih regui bam.82A miak le n sampet de ngaugai neu bam; nang daidau a lung tau mla beu zieno?83Kedanemene Ih mika ga teigeu zaula ge nzwa dida; Ih n zaidung nsungta dima.84Dai tingtie ge n kilabe aide lia lai; acu mneu kelame de nang daidau tiak lai?85N sam de gika di eh, Ngang kelame a ziemne hom kui luda.86N ajadung leune au nlum lubui; cipau minadung acu nret eh acu ngaurau la; acu ngha lo.87Penui kideu gade peu a teilung kekambe tei di nage da, dede Ih n keledeudung de mlai dima.88Bammui kela n keku de le, acu peu lunglo, iciu eh Ih n ajadung mzailu kerane.89RAMPAUBO, n sam kelungta lala; n sam au tinggim ga ntiprip bam.90N masang ceheu pelane ga bamla; nang kideu de teigai, nah cide pelui eh bam.91Mapelane henai kecangde ntakdi ma, n tutiak kemzuidung gage rang kegai nzwa, kedanemene mapelane n kiladung lu.92Magade Ih n zai a sui la meliecai, Ih a reidung gade tsaidi zie dege.93N keledeudung de Ih madaude nsungta dilak, kedanemene cidungde gade nang peu acu ringbam delu.94Ih au ngu; acu kelibeu, kedanemene Ih n keledeudung de peei lalu.95Kenlienme acu tei ngkapti kera mtei bam, dede Ih n samkak kelu zaidung de cilu kera peei zie.96Mapelane de penli kebam Ih ci luda, dede n ajadung au disüt eh penli teima.97Oh dai kenzwa gede Ih n zai de a sui no! Ih cide tingba zie pelane cetncok lala.98N ajadung acu a ngauraume swade tei mteu beula, kedanemene n ajadung au keheidau de a da lalu.99A keledeumedung swade a maci kiee ki, kedanemene Ih n samkak kelu zaidung de cetncok lalu.100Ih aswa hecingmedung swade ma cikiee ki lula; aide au Ih n keledeudung de mzai la kecune.101Ih kemau lampui leune gade mbai dida iciu eh Ih n sam mzailu kerane.102N samsang hezaidungde Ih mlai dima, kedanemene nang acu ledeu beu delu.103N samdung a ziemne dai kenzwa gede kum no, yeo, heliadui swade kum amui gade!104N keledeudung gade Ih maci ngau lula; cine Ih kenret lampui leune ngkau la.105N sam au a lampui saulia la nah a lampui ziemne kebaa ge.106Ih a sam pet kaila nah cide Ih teibi zie, Ih n tutiak kemzuidung de mzai kera de.107Ih kehereisüt bam; acu peu lunglo, RAMPAUBO, nang n sam kaikebeu de nzwa.108RAMPAUBO, Ih mta pwa kepeu reca de luulo, nah n samsang hezaidungde acu ledeu beulo.109A teilung au kengngi ga lamui lala, dede Ih n zaidungde nsung ta dima.110Kenlienmedung a ziemne baih ge teu pwabam, dede Ih n keledeudung gade tet mdei dima.111N samkak kelu zaidung de Ih kelungta a mapwa liede eh luu luda, kedanemene cidungde a nlung suiyi delu.112A nlung n zaidung mzai kerane tiak luda kelungta penli kecang.113Lung na tei kelame de Ih ngkaula, dede Ih n zai a sui la.114Nang au a kensiu ki nah acu kegumbe; n sam ga a keregui bam.115A dade mdei di, nnui kesia keteimedung, iciu eh Ih a Tinggwang ajadung de mzailu kerane.116N sam de le acu kengkieng peulo iciu eh lunglu kerane acu peu a keregui gade hengam ngau diso.117Acu nghalo, iciu lude Ih kwak luzie; Ih n zaidung de cet ncok lamui zie.118Nang n zaidung mzai kemakmedung de gidi la, kedanemene penui au mide cwa kelame nah nlumlu kebuime ma.119Kideube kenlienmedung de kehera nzwa keu mpetti la; cine Ih n ajadung a sui la.120Ncu kehing gade a pum mbeu dila, nah Ih n samsang hezaidungde ziemne kengngi le pui dida.121Ih kemzuibe nah petaube tei la; acu a ngauraume dage gigai beu so.122Nang n kilabe acu ngha zielie kecu n sam pet gailo; ngang kelame de acu peu tei keherei di helo.123N kelikelu de kwa eh a miak leu dida nah n kesamsang sam de ziemne.124N samkakkelu samsang de n kilabe acu keulia lo, nah n zaidung de acu ledeu beulo.125Ih n kilabe; acu maci peulo iciu eh Ih n samkakkelu zaidung de cilu kerane.126RAMPAUBE pe bata tei kera ting dida, kedanemene minadung n zai gikah di delu.127Ih n ajadung de hung kesang kecak swade, kecak mcitube swade.128Cine Ih n zaidung mzai teune la, nah Ih kenret lampuidung pelane ngkau la.129N hezaidung au miswagah, cide ziemne Ih cidungde mzaila.130N keledeu sam rangmci kegaidung dene kebaa peula; ledeu beu kemakme de maci peula.131Ih a mui nkei lu nah ngngi gai la, kedanemene Ih n ajadung luu neu kecune.132A da nreu gwanglo nah acu ngaunggia gailo, nang ncu ku kelame dage teigai mui kelade nzwa eh.133Nang n sam le a pikietdung sau lialo; peu kemau gede areu ngking diso.134Mide tei keherei kecume dade acu keli beulo iciu eh Ih n keledeudung mzai lu kerane.135N kilabe a dage n zu le taubaa beulo, nah n zaidung ledeu beulo.136A miakduidung a miak gade kereuki nzwa lwamie kedanemene minadung n zai mzaila kemakne.137Nang au masang, RAMPAUBO, nah n hezaidung au mzui.138Nang n samkakkelu zaidung masang eh nah samsang eh peu gai.139Ih rata mi nzwa alung ga pui bam kedanemene a ngauraumedung n samdung nsungta kedi ziemne.140N sam de pie teune gaida, nah n kilabe cide de dai kenzwa gede pesui no.141Ih au magedema nah mina ne acu ngkau, dede Ih n keledeudung de nsungta dima.142N tutiak au kelungta petau, nah n zai au nlum lubui.143Keherei nah lungrei le acu pui dida, n sam kaikebeudungde ne suiyi ada teu gwang beu la.144N samkak kelu zaidung au kelungta masang; acu maci peulo Ih lunglu kerane.145Ih a nlung pelane teu mra gai, “A sam kelilo, RAMPAUBO, Ih n zaidung mzai zie.146Ih ncu kekie gade qugai; acu kelibeu lo, nah Ih n samkak kelu zaidung de mzai zie.”147Tingnaimiak kepet dwa Ih kengha kiegai. Ih n samdung ga keregui bam.148Tingmui ting tsamdi kemaktane a miak mrak pwabam iciu eh Ih n sam cetncok lu kerane.149N samkakkelu samsang gade a kwa kingneilo; acu peu ringbamlo, RAMPAUBO, n samsang hezaidung gage n sampet kai kebeunzwa eh.150Acu mneu kelame a da gwang mna reureu bam, dede penui au n zai gade mdeila.151Nang au nna bam, RAMPAUBO, nah n ajadung pelane nlum lubui.152Ndaa ge Ih n samkak kelu zaidung gade cilu nang cidungde de kelungta pebam gage kaipwa kebamde.153A reidung de pie gailo nah acu nghalo, kedanemene Ih n zai nsungtadi melu.154A kie rangbeulo nah acu keli beulo; acu gumbeulo, n sam gage n sampet kai kebeu nzwa.155Kelikelu kenlienme dade mdei bam, kedanemene penui n zaidung de penui suila kemakne.156N ngaugia batadung au dizu, RAMPAUBO; acu peu ringbamlo, nang tei bammui kelanzwa.157Acu teikeherei kelame nah a ngauraume au kieesüt, dede Ih n samkak kelu zaidung gade nreutet dima.158Mide cwa kelame de Ih kemneu miakpie le piela kedanemene penui n sam mzai la melu.159Pielo Ih dai kenzwa gede n keledeudung de a sui no; acu peu ringbamlo, RAMPAUBO, n samkakkelu samsang ga n sampet kai kebeu nzwa.160N sam pelane au kesang; n tutiak kemzuidung leune au kelungta bamla.161Pekie tei mene hegwangpei napeidung acu tei keherei la, dede a nlung au n sam de rütla.162Ih n sam ga a sui yila mige mahei kekiee ge ngaulu kelame ge nzwa.163Ih kenretpe ngkau nah ngau rau, dede Ih n zai de a suila.164Tingnaige pia hena ncu twa la n tutiak kemzuidung de ziemne.165Lungciep kedi ge, n zai pesui kelame da la; penuide de tei ngkaulu kera magede gah.166Ih n kelikelu de regui bam, RAMPAUBO, nah Ih n ajadung de mzaila.167Ih n ajadung de mzaila, nah Ih cide a sui yisütla.168Ih n keledeudung nah n ajadung mzai la, kedanemene Ih ketei leune nang cibam kecune.169Ih kengha kie kegai de kingneilo, RAMPAUBO; n sam de ci kera acu maci peulo.170A nggia kekie de peu n da gwang canglo; acu nghalo, nang n sam gage sampet kegai nzwa.171A muileu gade peu ketwa pui eh rui mpetlo, kedanemene nang n zaidung acu ledeubeu kecune.172Peu a mleu de n sam ha lei teilo, kedanemene n ajadung pelane petau kecune.173Peu n ba de acu nghalo, kedanemene Ih n keledeudung de kedetlu delu.174N kelilu de Ih luu neula, RAMPAUBO, nah n zai de a suiyi delei.175Peu acu ringlo nah ncu twalo, nah peu n samsang hezaidung depeu acu ngha lo.176Ih meurün gah kedibe nzwa rwala dida; n kilabe acu peei lulo, kedanemene Ih n ajadung nsungtadi melu.
Bridge Connectivity Solutions Pvt. Ltd.