Proverbs4
1A namedung, nnui pei keledeusam kingneilu, nah helungkai lu ciude nnui kecikecet daibi kecu ci luzie.2Ih nnuide keledeusam keyidung peu bam; a keledeu de mlai diso.3Ih hena keceuna dau, apei apui na pumli tei kebam dau,4pa acu ledeubeu eh a dage ranggai, “A samdung n mlung gage kainzeu lu; Ih teilo kebeudung kainzeu lu eh lungh lulo.5Maci nah kecikecet teulu; Ih rangkegai samdung de nsungta so nah keugi diso;6Maci gi diso, iciude pa n mapie la zie; pecu hunglu, iciude pa ncu peu kwak luzie.7Maci au ma nlangtube, cine maci luulu nah nang ngaukelu pelane gade kecikecet luulu.8Maci de hunglu, iciude pa ncu teucuh beuzie; pecu gailu, iciude pa ncu kerüt teugwang beuzie.9Pa n peu ga kerüt peurwa ge kaibeu zie; pa ncu hezukeyi peurwa ge peu zie.”10A na, kingneilu, nah a samdung gage nlungkai lu, iciude nang teilung ketie lungh luzie.11Ih ncu maci lampui gage ngngwa gaibeu; Ih ncu lampui kemzuibe saubeu dida.12Nang tet kecudau, migede n lampui kaam lak nah nang pak kegaidau de, nang kau dilak.13Keledeusam de herakteu bamlu, cide püt diso; cide gumlu, kedanemene cide n teilung delu.14Kesiame lampui pwaso nah kemau tei kelame cai suiso.15Cide mria lu, cika lütso; cide gade nreu tet dilu nah lampui keda ga tet dilu.16Kedanemene penui kemau teidi kemaktane ziep gailak nah penui kangge de rezam di kemaktane mrak eh zeu bamla.17Kedanemene penui kenlien taktyei tyei la nah zaisiet zau sakla.18Dede makesangme lampui au tingnaimiak kepet nzwa da, cide baa reu reu eh tingba gwang kelu nzwa da.19Kenlienme lampui au tingmui nzwa mui, penui daipai dwak lwe kaumie zeubi kecu ci lama.20A na, a samdung de cet heling lulo; Ih kerang de ga nlungkai eh kingneilu.21Cidungde peu madaude n dade nreu tet diso; cidungde n mlung gage kailu.22Kedanemene a samdung ngau kelume ziemne au kering, nah penui pum pelane ziemne keyi ge.23N mlung de peu kwak eh bamlu nah sünne eh gum teu pwabam lu, kedanemene cide gade kering duirwak lwapet lalu.24Sam petau kemakbe n dade keugi dilu, nah samkesiabe n dade keu mdei dilu.25Peu n miak mzuizang eh pielu, nah n dwa ga kebam de pie mting lu.26N pi ziemne lampui kensambe teilu; iciude nang ketei leune kwak luzie.27Zetle mede hile ge nreu gaiso; makesiabe gade nreu tet dilu.
Bridge Connectivity Solutions Pvt. Ltd.