Proverbs21
1Hegwangpei mlung au RAMPAUBE ba gade reuceuna ge nzwa; pa pe suibe gage teu kereu gai dila.2Mileune de pa teikela pekiene petaulie cetla, dede RAMPAUBE mina lungningdung piela.3Petau nah kemzuibe ketei au ratak teugwang kebeu swade RAMPAUBE pe suila.4Ngang kela miakpie nah ngang kela mlung, kesiame mitaubung, aidungde au kemau.5Mariem teune kelame kiee si luzie, dede ma tei zette kelame ma gah dizie.6Kenret sam kerang gade mahei ngau keludung au gah zette di kela mwangzui ge nah teitset kela baih ge.7Kenlienme de au penui zaikesia ne ngkap dizie, penui petaube tei rau kedine.8Kemauketeime lampui au ngkoi, dede keyime petaube teila.9Kesamlim keci nau gede ngngwa kige ga lungh kecu swa au kipeu kimiak ga lungh kecube yiki.10Kenlienme kemau teineu eh bamla; pa pe kidame de ngaungia lama.11Mide rangmsia kelame de saja peu ge, kemangme maci lula, nah makecime de ledeu ge, pa maci si lula.12Makesangbe kenlienbe ki pie bamla; nah pa kenlienme de tei ngkap dila.13Kegahme mra kwa kingnei meidi kelabe, pa mra kegai dau pecu keli beu ta dizie.14Kengkim mapeu mi rata kezeu beula, nah kebai pwa kebam mapeu lunghop kesia kezeu beula.15Kemzuibe tei luge, keyime pe sui yila, dede kesiabe ta tei kelame da ngaukehing teugwang beula.16Macet keyibe gade tet mdei kedibe, ketsaime maa ga mtak zie.17Pe zaira tei eh kehega kebam de pesui kelame magah dizie; zau nah ketyeipok keyi tyeineu kelame mahei gailak.18Mina kesiame de makesangme ding tei saja peula, nah masangkemakme de mina kemzuime ding tei saja peula.19Kesamlim keci nau gede ngngwa lungh kecu swa au hetaideu ga kelungh be yiki.20Makecime kiga mahei luukeneube nah maca kaizeu la, dede kemangme penui rangkang ngau lu herizi tei zang dila.21Pe zaiyi nah ma petaube tei kelabe, mina aipaude kering, kesamsangbe, nah kerüt ngau lula.22Kemriakme ge kengkiengme namdi ngam lula, nah penuide gumpwa kebam kengkieng tsukwa de teimsia dila.23Pe samrang nah pe mleu ketip teune kelume, keherei lu kera gade pecu kezeu lula.24Pekatei pecu mning mdi nah pe zai kesiame, zi au “Mide Rangkemsiame” da, pa au ngang nah pe zai kesia pwa liala.25Kenghetbe hengin ne pecu teitset dila, pe ba mata tei keraune.26Pa tingba ramsang ne teisi neu reureu bamla, dede makesangbe peu la nah suihau mene peula.27Kenlienme ratak tei kebeu au kengkau ge, pe makesia mning eh teu kegwang au ngkau ki.28Kenret zierang au gah dizie, dede kingnei kelame au kelungta zierang tei lazie.29Kenlienme kemau tei jüja lala, dede makesangme au pekatei pe lampuidung cisiak la.30RAMPAUBE de renia lu kera maci, mede kecikecet, mede saukelia gede gah.31Regi kera benai ziemne hekwendung mtei lubui, dede hereu ngkienglu kera au RAMPAUBE da bam.
Bridge Connectivity Solutions Pvt. Ltd.