Pumpei32
1Reuben penai Gad leuhmedung makaune kekiee ge lungh lu. Penui Jazer penai Gilead deu ngau kegai dau, hangdeu cide makaune kailu kera hangdeu keyi ge.2Cine Gad penai Reuben leuhmedung gwang eh Moses, cingkupei Eleazar, nah heleuh muiteumedung de mpau eh rang,3“Aide anui hangdeu pie kelu heni zidung: Ataroth, Dibon, Jazer, Nimrah, Heshbon, Elealeh, Sebam, Nebo, nah Beon.4Hangdeu aidungde ga Israel leuhme dwa gade RAMPAUBE penui dage keherei kaigai, nah cidungde makaune gui kecu nidung yisüt. Anui, n kilamedung, makaune kekieege gui bam”5Penui rang eh, “Nang n miak gade anuide ngaunggia liecai, n kilamedung de, anui mapwa tei kerane aipau hangdeu de peulo. Anuide peu Jordan kahpet diso.”6Moses Gad penai Reuben leuhmedung dage rang keligai, “Nnui be aika lungh di eh nnui sinamedung de peu hereu ga mie zieni?7RAMPAUBE ne penuide kepeu deu ga gwang kera ziemne daitei Israelme lung tei keherei lai no?8Ih nnui pei medung de Kadesh Barnea gade hangdeu mcet kera lang kegai dau penui aikenzwa kesiak ge teigai.9Penui Eshkol langkie ga tet hangdi. Penui hangdeu de ngaulu eh Israelmena mlungdung tei msiadi ciu eh RAMPAUBE ne penui ha kebeude ga penui nlüt kera mlaidi kerane.10Cipau nai RAMPAUBE perata di. Pa pe sampet gai nah rang,11‘Egypt gade mpet kelu mmi ngkai nah penreume migede Ih Abraham, Isaac, nah Jacob, dage ranggai kebeu deu ga nlüt gailak, kedanemene penui Ih rang kegaidung mzai lu kemakne12Jephunneh napei Caleb Kenizzitme, nah Joshua Nun napei ziemne gwale. Caleb penai Joshua rünne a samzai teicang siaklu.’13Cine RAMPAUBE rata Israelmena da bamdi. Pa penuide mmi riakdai ge peu hetaideu ga lungh ladi pe miakngau gade makesia ketei ceheu leune ngkap ciakdi kemaktane.14Pielo, nnui cuh eh nnui peime bam leu luda, mina kemaume kekieege nzwa, Israelme dage RAMPAUBE rata teugwang gai kerane.15Nnui pecaisui tei kela gade mbai dicai, pa Israel de hetaideu gage langgai dai dizie nah nnui mina aidung leune de ngkap dai dizie.”16Cine penui Moses da gwang nah rang eh, “Kaunedung ziemne peu anuide heriedung rielo nah anui kelakdung ziemne peu namdidung tumlu.17Ciuliede, penuide mzang pwa penui bamdung ga canglu kemaktane anui mtei pwa bam nah Israel reugwa medungde ngngwa tet kerane. Dede anui kelakdung au riekelu namdi ga bam zie kedanemene cika kedame cude lung bam reu kecune.18Anui Israelmena gum keradung gum ciaklu kemaktane anui kiga cailigwang lak.19Anui penuide ngngwa eh Jordan keda lambie deu de gum lak, kedanemene anui mapwa me Jordan tingnaimiak kepetle kebamne.”20Cine Moses penui de keli eh, “Nnui kerang de tei lucai, nnui reunet kailu eh RAMPAUBE dwa tet eh hereu ga mie cai,21ciucai hereunet kaikelu n minadung pelane RAMPAUBE dwa rai eh Jordan de kahlu maisia, pa ngauraume de pe dwa gade gwa mpetlu kemaktane22nah hangdeu de RAMPAUBE ne gum luzie. Ciciu kelucai nnui cailigwang lubui. Nnui RAMPAUBE dade nah Israel me dade kemmau gahdi zie. RAMPAUBE dwa gade hangdeu de nnui mabam ge dizie.23Dede nnui cinzwa tei lu mecai, cilu lo, nnui kemau tei eh RAMPAUBE kemei tei la. N mau de ncu pei mpet kera cisiak lulo.24Nnui kelakdung ziemne namdi ge teilu nah nnui meurün ziemne herie rielu; cipaucai nang kerang de teilu”25Gad penai Reuben leuhmedung Moses de mpau eh rang, “Anui mpaubo, n kilame nang aja kai kegai nzwa tei zie.26Anui namedung, anui naudung, anui kau hau, nah anui kaune leune Gilead namdi ga bam zie.27Ciciuliede, anui, n kilamedung, hereu tei kerane RAMPAUBE dwa mie, hereu tei kera hereunet kaikelu pelane, anui mpaube, nang kerang nzwa.”28Cine Moses puisau pwa cingkupei Eleazar dage ranglia gai, Nun napei Joshua, nah Israelme leuh ga pautsame gu muiteume dage.29Moses penui dage rang, “Magade Gad penai Reuben leuhme ncu ngngwa Jordan kah cai, mina leune RAMPAUBE dwa gade hereunet kai kelume, nah n dwa gade hangdeu de gumlu cai, ciucai nnui gumkelu Gilead deu de penuide pwapeu dilu.30Dede penui hereunet teu eh ncu ngngwa kahpet meliecai, ciucai nnui kakga Canaan deu gade penui qwadung ngau luzie.”31Cine Gad penai Reuben leuhmedung keli eh ranggai, “RAMPAUBE ne anui dage rangkegai nzwa eh, n kilamedung, ainzwa eh anui tei luzie.32Anui reunet kai lu eh RAMPAUBE kerang mzai eh Canaanme deu de kah zie, dede anui mapwadung ailambie anui da bamzie Jordan kahpet kelu caide.”33Cine Gad penai Reuben leuhme dage, nah Manasseh Joseph napei heleuh pempie dage, Sihon gwangram, Amoritme hegwangpei, nah Og, Bashan gwangpei Moses ne peu di. Pa penuide hangdeu peu di, penuide twagwa kebam namdidung deu de nah namdi cidungde deuraidung si eh penuide mzi beu di.34Gad leuhme renam aidungde retak dai lu, Dibon, Ataroth, Aroer,35Atroth Shophan, Jazer, Jogbehah,36Beth Nimrah, nah Beth Haran riekelu namdidung meurün riedungde rielu.37Reuben leuhme renam aidung retak dailu, Heshbon, Elealeh, Kiriathaim,38Nebo, Baal Meon, penai zi pecaine kedi di, nah Sibmah. Penui retak dai kelu namdidung de penui hezi keda msiaklu.39Manasseh napei Machir leuhme Gilead ga mie nah Amoritme cika kebam gade sütteu di.40Pecai Moses Manasseh napei Machir de Gilead de peudi, nah penui mina dung cika lungh di.41Manasseh napei Jair mie eh namceudung de tuilu nah cide Havvoth Jair de eh qulu.42Nobah miedi nah Kenath nah pe namdung tuilu, nah pa cide pezi teu eh Nobah de eh qulu.
Bridge Connectivity Solutions Pvt. Ltd.