Pumpei27
1Pecai Moses da Zelophehad napuidung Hepher napei Gilead napei Machir napei Manasseh napei gwang, Joseph napei Manasseh pautsadung. Aidungde pe napuidung zi: Mahlah, Noah, Hoglah, Milkah, nah Tirzah.2Penui Moses, cingkube Eleazar, muiteume, nah hemaa pelane dwa gade keredau cu paiki ga tet nlüt kecu ga gwang sap. Penui rang eh,3“Anui pei hetaideu gade tsai dida. Pa au Korah caisuime ge tei eh RAMPAUBE de renia kecu ga si ma. Dede pa pekatei pe mau ziemne tsaidi, nah pa pena mipeina ga.4Daitei anui pei pena mipeina ga cune pezi hepui peupei gade tei nggah di lai no? Anui pei kibaume dade anuide hangdeu peu lo.”5Cine Moses RAMPAUBE da cipau reha teugwang.6RAMPAUBE Moses de mpau, rang eh,7“Zelophehad napuidung petau siakpe rangbam da. Penui peime kibaume gu hangdeu gade penui qwa teilu kerane hangdeu peu bilu maisia, nah penui pei qwa de penui ngau bilu kerane nang tei bi beulu.8Nang Israel minadung de resiu bilu nah rang beulu, ‘Magade mige tsaidi nah pena mipei gah, ciciucai nang pe qwa de pe napui ne gumlu kera teibeu maisia.9Magade pa pena mipui ga cai, peqwa de pe sinamedung de pwapeu lu.10Magade pa pe siname ga cai, peqwa de pe pei gu sinamedung de pwapeu lu.11Magade pe pei sinamedung ga liecai, ciucai hepui ga kebam pe kibaume nnatume de pe qwa pwapeu lu, nah pa cide pekatei pegu nzwa keulu maisia. RAMPAUBE ne Moses dage aja kaikebeu nzwa, Israel minadung ziemne hezai ge teigai zie peu tei mzailu kerane.’”12RAMPAUBE Moses de rang eh, “Abarim lamlwatu ga hang cuh nah Ih Israelmedung de hangdeu ha kebeu de pie gai.13Nang ngau keludau, nangde, n minadung de ngngwa bam maisia, n sinabe Aaron nzwa.14Aide teigwang zie kedanemene nnai Zin hetaideu gade a sam mlai kedine. Cika, tangtsu gade dui lwa kebamdau, hemaabe pelane dwa gade n rata ne acu kemcibe lie de hetwa peulu tadi.” Aidungde Kadesh ga Meribah dui Zin hetaideu gade.15Pecai Moses RAMPAUBE de mpau, rang eh,16“Nang, RAMPAUBE, mina pelane rabedung Tinggwang, heleuhbe reuga mina hangge de relang gai beulo,17cauge tetpet eh penui dwa ga gwang nah penuide teuswa pet eh penuide teu hekwa lubui bi, ciciu lude RAMPAUBE leuhme meurünna de kekwabe ga cu nzwa di melu kerane.”18RAMPAUBE Moses de rang eh, “Nun napei Joshua de ngngwa lu, mina cide da a Rabe bam kelabe, nah peda n ba ngngei lu.19Cingkube Eleazar dwa ga ngngwa gwanglu nah hemaa pelane dwa ga, nah penui miakngau gade pane penuide teuswa kera samkai beu di.20Nang n da kebam kengkieng kesa pecu peulu, ciciude Israelme hemaa pelane pesam mzai lu kerane.21Pa cingkube Eleazar dwaga mie eh pe ziemne a lungning de Urimme tiak kebeu de cilu kerane. Cide pa samkai kebeu gade minadung tetmie zie nah gwang zie, pa nah Israel minadung pelane pecu ngngwa eh, heleuh pelane de.”22Cine Moses RAMPAUBE samkai kebeu de nzwa teigai. Pa Joshua de ngngwa lu nah cingkube Eleazar dwa nah heleuh pelane dwaga ge kaibeu.23Pa pereu gage pe ba ngngei gailu nah teuswa lulo samkai beu, RAMPAUBE ne pecu teikera samkai kebeu nzwa.
Bridge Connectivity Solutions Pvt. Ltd.