Pumpei20
1Cine Israelme, tingbungme pelane, Zin hetaideu ga raitube kei gwanglu; penui Kadesh ga bam di. Cikade Miriam tsaidi nah pecu kungdi.2Israel tingbungme ziemne dui gah di, cine penui ngkwa lwe Moses penai Aaron de mmau di.3Minadung Moses de ncam eh mmau di. Penui rang eh, “Anui kangme Israelme RAMPAUBE dwa gade tsai kecudau anui de tsai dicai yiki!4Daitei eh nnai RAMPAUBE tingbungme de hetaideu aide gage ngngwa gwang gaino peu tsai kera, anui nah anui kaunedung de?5Daitei nnai anui de Egypt gade ngngwa mpet lwe kehing ni gage ngngwa gwang gaino? Aika au ma leuh, tangzüttsi, kubetsi mede kuraletsi de gah, nah dui sak kera de gah.”6Cine Moses nah Aaron ngkwa kecu ni gade tet di. Penai paiki kimui ga mielu nah penai zu keumie lu. Cika de RAMPAUBE kebaa kendu penai de peu ngaugai.7RAMPAUBE Moses de mpau, rang eh,8“Hetui de keulu nah tingbungme de qu hekwalu, nang, nah n sinabe Aaron nnai. Tsurakang dage marang gailo penui dwa gade, nah cide gade dui lwapet lo ranggai lo. Nang tsurakang cide gade dui tei mpetlu zie penui ziemne nah nang tingbungme, nah penui kaunedung de peu sak kerane peu maisia.”9Moses RAMPAUBE dwa gade hetui keulu, RAMPAUBE pecu tei lulo aja kaikebeu nzwa.10Ge Moses penai Aaron minadung de tsurakang dwa gage qu hekwalu. Moses penui dage rang eh, “Kingneilu, nnui zai kesiamedung. Anui nnui ziemne tsurakang aide gade dui keu mpet maisia ni?”11Cine Moses pe ba hwacuh lu nah tsurakang de petui le piana dapgai nah dui lwa süt petlu. Israel tingbungme saklu, nah penui kaunedung de saklu.12Ge RAMPAUBE Moses penai Aaron dage rang, “Kedanemene nnai Israelme miakngau gade Ih mci lie de eh acu nlum ma mede rüt kemakne nnai mina aidungde de Ih ne penuide hangdeu ha kebeu dega ngngwa gwang gailak.”13Heni aide de Meribah dui de qu di kedanemene Israelme cikade RAMPAUBE de ngngwa kesamlim nah pa pe kemci penuide keulia kecune.14Moses samgwamedung de Kadesh gade Edom ga hegwangpei dage langgai: N sinabe Israel aide rangla: “Nang ma kehung pelane anui dage tei kegai cibam.15Anui paumedung Egypt ga mie nah peting ketie ge Egypt ga lungh kedi nnui cibam. Egyptmedung anuide tei keherei süt nah anui paumedung de liede.16Anui RAMPAUBE de qu kegai dau, pa anui kwa siulu nah tinggimgwame ge de langgai nah anuide Egypt gade ngngwa mpet beu. Pielo, anui au renam ge n deurai ga kebam Kadesh ga bam.17Ih n dade kiela peu anui de n deu kahgwang kerane. Anui luh mede kubetsi luh kahgwang lak, meliene n tekwadung gade dui de sak lak. Anui hegwangpei lampui puidi ga lazie. Anui zetle mede hile de nreu lak n rai de kahdi kemaktane.”18Dede Edom ga hegwangpei pecu keli eh, “Nnui de peu aide gade kahgwang gailak. Nnui kahgwang cai, Ih kingtie pwalwe gwang nnuide ketang zie.”19Israelme pe dage rang eh, “Anui puidi ga lazie. Magade anui mede anui kaunedung n dui sak cai, anui cide ziemne pemi peu zie. Peu anui de hepi le tet kahgwang lo, magede tei si mene.”20Dede Edom ga hegwangpei keli eh, “Nnui tet kahgwang gailak.” Cine Edom ga hegwangpei Israel de mmau eh kengkieng reugwame kekiee ge ngngwa lwe gwang.21Edom ga hegwangpei Israel de penui rai de kah laklie kamdi. Aide ziemne Israel Edom deu gade caili di.22Cine minadung Kadesh gade tet gai. Israelme, tingbungme pelane, Hor deutu ga gwanglu.23RAMPAUBE Moses penai Aaron de Hor deutu, Edom deurai gade mpau, rang eh,24“Aaron de pe minadung de ngngwa ncütlu maisia, kedanemene Ih hangdeu Israelme de kepeu ga pa nlüt gailak. Aide au kedanemene nnai hangna Meribah dui gade a sam mlai kedine.25Aaron penai pe napei Eleazar de ngngwa lu nah penai de Hor deutu ga ngngwa hanglu.26Aaron cingku painidung ra mpet lwe pe napei Eleazar de kaibeu lu. Aaron tsai maisia nah peu pe mina da ncüt dilu.”27Moses RAMPAUBE rang kebeu nzwa teilu. Penui Hor deutu ga hanglu tingbungme pelane miakngau gade.28Moses Aaron cingku painidung ra mpetlu nah cidungde pe napei Eleazar de kaibeu di. Aaron lamlwatu reu cika de tsaidi. Ge Moses penai Eleazar nghung di.29Tingbungme pelane Aaron tsai kedi ngaulu ge, heleuh pelane Aaron ziemne zie camrei ge hap bam di.
Bridge Connectivity Solutions Pvt. Ltd.