Pumpei12
1Pecai Moses Cushme pui de pe nau kedine Miriam penai Aaron pecu mmau di.2Penai rangdi, “RAMPAUBE Moses dage rünne marang lani? Pa anai dage de marang la meni?” RAMPAUBE penai kerang de siulu.3Cu Moses mina aide pezai henasüt, kideu reu ga mina pelane swade henaki.4Zette eh RAMPAUBE Moses, Aaron nah Miriam dage rang eh cu: “Nnui hangcum ngkwa kela paiki ga mpetlu.” Cine penui hangcum mpetdi.5Ge RAMPAUBE hemwa tsia gade hung. Pa paiki kimui ga saplwe Aaron penai Miriam de qu gai. Penai gwang mnalu.6RAMPAUBE ranggai, “Cu au a samdung kingnei lu. Agu caihakecime ge nnuide ngngwa kebam dau,Ih, RAMPAUBE, pe dage marengeidung gade acu liagai zienah pemang lede pecu mpau zie.7A kilabe Moses au cinzwa ma.Pa au a ki leune gade samsang.8Ih Moses dage marengei mede samregwa gade marang lama, dede pecu ncwa le mpaula.Pa RAMPAUBE rehi de ngaula.Cine daitei nnai hing menea kilabe Moses de rang msia lano?”9RAMPAUBE rata heupwa penai de renia di, nah iciu eh pa penai de pütdi.10Hemwa de paiki reu gade cuhdi, nah Miriam da zette eh kempa mateei gwangdi, pa buising ge nzwa harei di. Aaron Miriam lam nreu gwang ge pa mpa kedi ngau lu.11Aaron Moses dade cu, “Oh, a mpaubo, ngaunggia kemau aide ne anai de renia di helo. Anai heramie tei eh rang dida, nah anai kemau tei dida.12Ngaunggia eh pecu peu pepui za gade ngiena pumteih pempiege gah eh mna tset kedibe nzwa di helo.”13Cine Moses RAMPAUBE de kugai. Pa cu, “Ngaunggia pecu teingkei beulo, Tinggwang, ngaunggia gailo”14RAMPAUBE Moses dage rang, “Magade pe pei pe zu gage mcai msuigai cai, pa lang henane ngngam eh bam zie. Pecu peu ramzeuki hegwale lang henane bam dilu. Cipau caine pecu ngngwa nlüt dailu.”15Cine Miriam de peu lang henane ramzeuki gwale bam di. Pa ramzeuki ga gwang dailu kemaktane minadung hebeuh teipet ma.16Cipaucai minadung Hazeroth gade hebeuh tei tetpwa Paran hetaideu ga ramzeuki teilu.
Bridge Connectivity Solutions Pvt. Ltd.