Nahum2
1Ncu tei zangra gai di kerabe ncu renia cuh lada. Namdi kiriedung kwalu, lampuidung kwalu, reutak ziemne mteilu, n kengkieng pelane mteilu.2RAMPAUBE au Israel kendu nzwa eh Jacob kendu peu dai zie, süt ketyeime penuide tei ngkap di liede nah penui kubebang kiakdung tei ngkap di liede.3Ngauraume reugwa kengkiengme hegeu kegiedung pungla, nah kegie paini kenzwabedung teula; bagidung penui hegeu niadung penui mtei kelu benai kepik di, nah cypress ngeidung keu kezip rwa di.4Bagidung puidi kiga pak pesuira tei; penui namdi sum ga pak nlüt mpet. Penuide ngau kegai helei nzwa, nah tingkehepik nzwa pak bam.5Pa kedimedung de qugai; penui tetpet ge penui pi nsui gai eh kau mie; penui nzet namdi kirie be ga gwaketang, delwe kensiu hegeu kedi ge mtei luda.6Hereukidung tai ga heriekidung telai ngkei gai nah hegwang kidung sui tet dida.7Hezai ga rau pwabam dida: Hegwangpui de hebaang tei dida; pe kilame tamhaudung nzwa mradi, nah penui sui sia eh penui hekakrak kepeudi.8Nineveh rejaai ge nzwa bam la, dede cu au pe minadung dui lwa kebam nzwa pak bam dida. Mi kedame sa gai, “Mtaklu, Mtaklu,” dede migede cainok tadi.9Rangkanggeu sütlu, kecakde tuilu, maheile pui penli kegah tei ma, namdi cika mahei le kepui teibam luu keneu leu.10Nineveh mrwa dida, pecu gidi da, nah ngkap dida. Mlungdung ngnyi eh sui bam dida, ngkokpuidung mbeudi da, nah kengkieng gada; penui zudung ham hui dida.11Cu daiga hinghodung bam bamno, hingho nadung pok ketei ni de, cika hinghoseu nah hinghopuidung mie kelade, nah penui name de peu made hing mene bamlu kelade.12Hingho makaune de tuilu delwe cide hinghopui nah pena me ziemne teurak kecai lu, pa heteei teurak takcai kelu le pekui tei puilu.13Rampaube rangla, “Ih nnui ngaurau be da, Ih nnui bagidung ru mika ge dizie nah kiengtie ge ne hingho nadung de gitset dizie, Ih nnui deu gade taktyei pok nnuide peu si lakta, nah nnui kie kegai samgwame kwa de kingnei silak ta.”
Bridge Connectivity Solutions Pvt. Ltd.