Matthew6
1Nnui heta keyi ketei mina dwade peu penuide ngau eh tei melu kerane sünne lulo, iciu liecai nnui tinggim ga kebambe nnui Pei dade ziehi ngau gailak.2Cine nnui mide ma kepeu dau, telui kwa ncu tei ndu so, hezai keteime synagoguedung nah puididung ga ketei nzwa, iciu eh penui mina hetwa ngaulu kerane. Ih nnui dage rangsiakte gaila, penui au penui ziehi ngau luda.3Dede nnui mide ma kepeu dau, n ba hilebie de peu n ba zetlebie daitei au bi kecu ciso,4iciude n mapeu de kengkim gade lu kerane. Iciude n Pei Tinggwang kengkim ngau kelabe ncu ziehi peu zie.5Nnui kekie keteidau, hezai keteime nzwa diso, kedanemene penui au synagoguedung gade nah puidi kungdung gade sap eh kekie tei neula, iciu eh minadung depeu penuide ngaulu kerane. Ih nnui dage rangsiakte gaila, penui au penui ziehi ngau luda.6Dede nnui, nnui kekie ketei dau, n kibung helungle nlütlu, nah n kikam ngkui dilu, n Pei ngkim eh kebam be dade kie lu. Pecai n Pei ngkim eh pie kebam be ncu ziehi peu zie.7Nnui kekie ketei dau, Gentileme nzwa, buikemakpe rang daidai eh kieso, kedanemene penui au penui samrang kekiee de ziemne penuide kingneilu zielie cetla.8Ciziemne, penui nzwa diso, kedanemene nnui Pei au nnui kie kemak dwade nnui dai teu maisia bi cibam.9Ciziemne ainzwa eh kielu: ‘Tinggim kebam anui Pei,peu n zi de hetwa kepung kemcibe tei lulo.10N hegwangram teigwang kelube tei lulo.Tinggim ga nzwa eh kideu gadensui nrang tei kelube tei lulo.11Tingba ramsangne pok anuide henai peulo.12Anui maugi beulo,anui de mimau gibeu kelanzwa eh.13Anuide pwa kehedei gage kai diso,dede kesiabe dade anuide kelibeu lo.’ 14Nnui mina nnui dage teimaukedi maugi beucai, tinggim ga kebam nnui Pei de nnui teimau kedi maugi beuzie.15Dede nnui penui teimau kedi mau gibeu mecai, nnui Pei de nnui teimau kedi maugi beulak.16Nnui kemmwang dau, hezai keteime nzwa suisiet zu lia eh teiso, kedanemene penui penui zu tei ntsam dila, iciu eh mmwang kebam nzwa mina de lialu kerane. Ih nnui dage rangsiakte gaila, penui au penui ziehi ngau luda.17Dede nnui, nnui kemmwang dau, n peu maca pwa keniaklu nah nzu nrüt mcilu,18iciude nnui mmwang kebam kedame ci melu kerane, dede nnui Pei ngkim eh kebambe rünne cilu kerane; nah nnui Pei kengkim ngau kelabe, nnuide ziehi peu zie.19Kideu gage nnui ziemne mabam hekwa so, taklei nah mtu ne teimsiadi kera gage, nah keregame raklüt eh rega kera gage.20Meliene, n ziemne mabam tinggim gage hekwalu, cika taklei mede mtu ne teimsiadi gailak, nah cika keregame raklüt mede rega teudi gailak.21N mabam kebam ga, cika n mlung de bamla kecune.22Mimiak au mipum mibung da. Ciziemne, n miak yi bamcai, n pum pelane baa bamla.23Dede n miak siacai, n pum pelane muiting dizie. Ciziemne, nda kebam kebaade kemuibe liecai, cide daikenzwa de mui zieno!24Migede hangna kila tei gailak, kedanemene pa mi hangge de ncau nah kedabe de hung zie, mede pa hangge da masang nah kedabe de mlai dizie kecune. Nnui Tinggwang nah mahei gwatei gailak.25Ciziemne Ih nnui dage rang gaila, nnui teilung ziemne helung pang so, dai tyei ziebi mede dai sak ziebi, mede n pumteih ziemne, dai bah nni ziebi de eh. Ketyei kesak swa teilungbe diki meni, nah mipumbe paini swa diki meni?26Tinggim ga kela ruinedung de pie gailo: penui heleuh teugi gai lama mede luhlüt lama, mede hebau gage teugwang hekwa lama, dede tinggim ga kebam nnui Pei penui pok tei beula. Nnui cidungde swa yiki melui ni?27Dede nnui caube pelung pang eh pe teilung cubit ge de tei mtie lubui no?28Daitei nnui paiheni ziemne nnui lung pang lano? Luh ga teizuine dainzwa lungh labi cetgai pielo. Penui matei lama, nah penui pai dak lama.29Dede Ih nnui dage ranggai la, Solomon kecang de pe kendu leune gade, pe pwa cikenzwa teuma.30Dede Tinggwang luh ga tseheidung cu lungh gai eh ncünne keru bam gage kaidi kela dede pepwa tei hemisüt beucai, pa nnui pwa ciswade tei hemi ki beulak luini, nnui kenlum kecammedung?31Ciziemne nnui, ‘Anui dai tyeilai?’ mede, ‘Anui dai saklai?’ mede, ‘Anui dai paini teulai?’ de eh nnui lung pang so.32Kedanemene Gentileme ma aidungde pelane peeila, nah tinggim kebam nnui Pei nnui cidung pelane teumaikesia cibam.33Dede Tinggwang hegwangram nah pe masang peei rai lulo, ciude ma aidungde pelane nnuide peuzie.34Ciziemne, ncünne ziemne helung pang so, kedanemene ncünne pekatei ziemne helung pang zie. Tingnai ramsangne pekatei perei kekiee bamkap.
Bridge Connectivity Solutions Pvt. Ltd.