Matthew21
1Jisu nah pa ledeukelume Jerusalem tai gwang nna eh Olive deutu, Bethphage nam ga gwang luge, Jisu ledeukelume hangna de langgai eh,2penai dage ranggai, “nnai dwaga kebam renam ga miecu, iciude cika gada gede, nah pe nade si eh keu pwabam eh ngau zette luzie. Penaide hiaklwe ada ngngwa gwanglu.3Mi keheibe cide ziemne nnai dage magede keteu cai, nnai, ‘Rampaube ai kena de teu maisia zeulie,’ de eh rang beulu, nah ciciu de nnai cipau de nnui zette langgai beuzie.”4Cu aide ndaa caihakecibe rang kenzeu de peu tei canglu kerane. Pa ranggai,5“Zion napui dage rang beulo, ‘ainie, n Hegwangpei nda gwang lalie, henah eh gada ge reu cwalwe, gadana ge reu ga, gada ge na reu ga.’” 6Ge ledeukelube kena de mie delwe Jisu rang kebeu nzwa penai teilu.7Penai gada nah pena de ngngwa gwanglu delwe penui paidung gada reu gage kailu eh Jisu cipau reu ga bamlu.8Mina kekiee ge penui paidung lampui gage kamgai, nah kedame tsingbangdung gade tsingkiadung bilu delwe pwa cidungde lampui gage kamlu.9Cidau Jisu dwaga kela maadi de nah pe caisui kelame sahbak eh ranggai, “Hosanna David napei! Rampaube zi teukegwangbe samlam pungtu lie! Hutube Hosanna!” 10Jisu Jerusalem ga lüt luge, namdi pelane popbak eh rangdi, “Aide cau no?”11Ge hemaabe keligai, “Aipaude au caihakecibe Jisu, Galilee deu Nazareth gade gwang.”12Pecai Jisu kerecaki ga lüt. Pa kerecaki ga malui nah zwa kebam pelane de gwa mpetdi, delwe rangkang hiak kebamme kekaibamdung de nah ruipuinedung zwa kebam bamdung de kwak ngkumdi.13Pa penui dage rangdi, “Kesanglaisiu ga ainzwa rau nzeu, ‘A ki le pwane kekieki lie quzie,’ dede nnui cide le pwa keregamedung mbaiki tei dida.”14Ge miakcitme nah pisiame kerecaki ga pe da gwang, nah Jisu penuide teingkeibeu.15Dede cingku kedimedung nah laisiukecimedung, pa mimakecang batadung tei kegai ngau, nah henamedung kerecaki gade, “Hosanna David Napei,” de sah kebam siu luge penui rata sütdi.16Penui pecu keteu, “Penui rang kebam de nang siu bam ha?” Jisu penui dage rangdi, “Yeo! Dede nnui madaude Kesanglaisiu gade pei meni, ‘Henamedung nah ngiena tung kebamdung mui gade ketwa peu kera nang mtei luda’?” 17Pecai pa penuide pütdi delwe namdi be gade tetpwa Bethany ga gwangdi nah cika tingmuizui zeudi.18Pecai benai tingcang pa namdi ga cailigwang daila ge, pa mzeudi.19Lampui kungga tangzüttsi bang ket kebam ngau eh, pa cide da mie, dede penei gwale magede ngau luma. Cide da pa rangdi, “Peu madaude n dade matsi buidai helo,” ge zette tangzüttsi bang de regui miedi.20Ge ledeukelumedung cide ngau pwa penui macangdi eh, penui kakgade rangdi, “Dainzwa tangzüttsi bang de regui zette dino?”21Jisu penui sam keligai, “Ih nnui dage rangsiakte gaila, nnui kenlum bam eh nnui suihau mecai, nnui tangzüttsi bang aide dage tei kegai rünne tei lak, dede nnui lamlwatu aide de, ‘Cuhlu delwe jaaidi ga cak lüt dilo,’ degai cai cide ciciu luzie.22Makeheibe de nnui nlumsiak eh, kie cai, nnui ngau luzie.”23Pa kerecaki ga lütlwe mide ledeu bam ge, cingku kedimedung nah hangkiamedung peda gwang eh ranggai, “Daipai kengkieng teu nang aidungde teibam no, nah caune ncu kengkieng aide peu no?”24Ge Jisu penui samkeligai, “Ih de nnuide mage keteu zie. Nnui acu cide kelibeu cai, Ih dai kengkieng teu Ih ma aidungde tei labi ranglia zie.25John mide duipum ketei de, dai gade gwang no? Tinggim gade mi mina dade no?” Ge penuikatei penui kakga de mpau bamdi, “Magade anui, ‘Tinggim gade,’ de rang cai, pa anuide, ‘Iciucai nnui daitei pecu nlum meno?’ de rangzie.26Dede anui, ‘Mina dade de rangcai,’ anui maadidung de hing, kedanemene penui pelane John au caihakecime gelie kelane.”27Cine penui Jisu samkeligai, “Anui cima.” Pa de penui dage rangdi, “Ih de dai kengkieng teu eh aidungde tei labi kecu nnuide ranglia lak.28Dede nnui dainzwa cetla no? Mige pena hangna bam. Pa hecingbe da mie delwe ranggai, ‘Ana, henai kubeluh ga mie heta teilo.’29Ge pe na keligai, ‘Ih mielak,’ dede pecaine pa pelung nreulu delwe miedi.30Pecai pe pei pe na henabe da mie delwe ci kesiakte rangdai. Pa keligai, ‘Ih miezie, kedibo,’ dede pa mie tadi.31Cipau kenade caube pe pei suiyi teino?” Penui rangdi, “Keraibe.” Jisu penui dage rangdi, “Ih nnui dage rangsiakte gaila, heraha kehame nah helipuidung Tinggwang hegwangram ga nnui dwarai nlüt zie.32Kedanemene John makesang lampui gade nnui da gwang, dede nnui pecu nlum luma. Dede heraha kehame nah helipuidung pecu nlumlu. Dede nnui, aide nnui ngau kelu caide, nnui helungnreu delwe pecu nlum luma.33Samgwa keda kingnei lulo. Ndaa mige, hangdeu mpaume ge bamla. Pa kubeluh ge talu, delwe perie rie twagwalu, cikage zauniakbam ge kuilu, reketbam ge teilu, delwe kubeluh keteime dage ngnget peudi. Pecai pa renam keda lebie miedi.34Kubetsi railu kera ting gwang ge, pa pe kilamedung kangge de kubeluh ketame dage pe qwa kubetsi pwalu kerane langgai.35Dede kubeluh ketame pe kilame de nimlu, hangge de dap, hangge de teitsetdi, delwe keda gede tangtsu le pwa sam.36Pe mpaube keraibe pia swade kiee eh kilame keda de langdai gai, dede kubeluh ketame keraime de kesiakge penui dage de teigai.37Cipau cai, pe mpaube pena de penui dage langgai, ‘Penui a na de au rüt zie’ de rang eh.38Dede kubeluh ketamedung pena de ngau luge, penuikatei kempau eh rangdi, ‘Aide pe mapwabe da. Gwanglu, anui pecu teitsetdi delwe anui pe mabam luu lugo.’39Cine penui pecu nimlu eh kubeluh gwale ge pecu kelien mpetti, delwe pecu teitsetdi.40Cu kubeluh mpaube gwang de, kubeluh ketamedung de pa daipai tei zieno?”41Penui pe dage rangdi, “Mina kesia cidungde de peu keherei süt eh tsai dizie, delwe kubeluh ketame kedame de ngnget peu dizie, petsi kerai tingdau pecu pe qwa pwapeu lu kerame de.”42Jisu penui dage rangdi, “Kesanglaisiudung gade nnui madaude pei meni, ‘Ki keteime tangtsu gi kedide, aide kimiaktsu tei dida. Aide Rampaube dade gwang, nah cide ngau mima kecangh gelie’? 43Cine Ih nnui dage rang gaila, Tinggwang hegwangram nnui dade keuteu dizie nah heleuh petsi builu kela gede de peu dizie.44Keheibe de tangtsu aide reu ga cak kemieme de tei pang kecai dizie. Dede keheibe reuga cide cak miecai, cide pecu tei kecai dizie.”45Cingku kedimedung nah Phariseemedung pe samgwadung de siu luge, pa penui ha rangzeu lie kecu penui cilu.46Penui pecu tuilu kera peei, dede maadibe de penui hingdi, kedanemene minadung pecu le pwane caihakecime gelie la kedine.
Bridge Connectivity Solutions Pvt. Ltd.