Matthew11
1Jisu ledeukelume kereiekena bau dage maranglia cangdi ge, pa Galilee namdung ga mide ledeu nah zierang tei kerane cikade tetti.2Duipumketeibe John hebaangki gade Khrista heta ketei ha siu luge, pa pe caisuimedung dage sam langgai,3nah pe dage rangdi, “Gwang zielie kelabede nang deni, mi anui kedage de peei maisia reu no?”4Jisu penui sam keli eh rangdi, “Mie delwe John dage nnui kengaube nah kesiube ranglia lulo.5Miakcitme mangaulu bam dida, pepi kesiame tetlu bam dida, kempame mcilu bam dida, kwenpangme siulu bam dida, ketsaime ringdailu bam dida, nah kegahme dage samliakeyibe ledeu bam dida.6Mina keheibe de a ziemne kaudi kemakme samlam pungtu.”7Mina cidungde penui lampui gage tetgai dige, Jisu hemaadung dage John ha ranglia cuhdi, “Nnui daipai ge pie zielie hetaideu ga pet no? Tingkai ne gui kelai kebam herwabang ge ni?8Dede daipai pie zielie nnui pet no? Mina kenciep paini keteume de ni? Ainie, kenciep paini keteume au hegwang kidung ga lunghla.9Dede nnui daipai pie zielie pet no, caihakecime deni? Yeo, Ih nnui dage rangla, caihakecime swade kedi ge de.10Pe ha aiciu eh raupwa la, ‘Pielo, Ih n dwaga a samgwabe de langgai beu zie, pa n dwa n lampui mtei beuzie.’11Ih nnui dage rangsiakte gaila, mipui dade lungh kegwang kakgade duipumketeibe John swa migede kedi ge de lungh cuh mereu. Dede tinggim hegwangram ga au ceutube de peswa diki. 12Duipumketeibe John ting gade cu kecang tinggim hegwangram kehereisüt la dida, mina pezai kesiame cide süt teudi kera tei.13Kedanemene John ting kecang caihakecime pelane nah hezaibe caihakecisam rang gwang.14Nah magade nnui cide luulu zie liecai, pa au Elijah gwang kerabe de delie.15Keheibe de masiu kera pe kwen kebamme de peu pecu siu lulo.16Ih daipai le teu ceheu aide de keda laino? Penui au henamedung litak ni ga bamlwe hangge ge de qulu eh,17‘Anui nnui ziemne terwaine kwa beuda, dede nnui lim ma. Anui ketsai nggia da, dede nnui au hap ma,’ de eh kerang nzwa delie.18Kedanemene John tyei mede sak eh gwang ma, nah penui, ‘Pe da herakesia ge la,’ de eh rangdi.19Mina Nabe tyei nah sak eh gwang, nah penui, ‘Pielo, pa au matyei keneukau, nah sak kemie kau, heraha kehame nah kemau keteime zangbe!’ De eh rangdi. Dede maci au pe name dade peu mide pecu ci lula.”20Pecai Jisu pa miswakegah batadung kekiee tei kegai namdidung de kesiu cuhdi, kedanemene penui lung nreulu kemakne.21“Ainie, Chorazin! Ainie, Bethsaida! Magade nnui dage miswakegah bata tei kegai de Tyre penai Sidon nam gage teigai liecai, penui ndaa ge rosopai nah mimangbüt teu eh penui lung nreu zie de nage.22Dede Ih nnui dage rangsiakte liazie, hetuketiak benai Tyre penai Sidon au nnui swade lialu yiki zie.23Nang Capernaum ncu teu cehu nghang tinggim tunglu buini? Ncu teu henah mie Hades gage kai dizie. Nnui dage miswakegah bata keteidung Sodom gade teigai cai, henai kecangde cide bam zie reu nage.24Dede Ih nnui dage ranglia zie, hetuketiak benai nnui ziemne swade Sodom deu ga kelungme be lialu yiki zie.”25Cipau tingdau Jisu samkeli eh rangdi, “A Pei, tinggim nah kideu Rampaubo, nang makecime nah makecetme dade sam aidungde kebai pwala eh hena keceu dage keulia kegaine Ih ncu twala.26Yeo, Peibo, kedanemene cide au n miakngau gade pe tausüt kecune.27Maleune de a Pei ne acu nlum beu dida; nah a Pei rünne gwale migede Nabe de ci lama, nah Nabe rünne gwale migede Peibe de ci lama, nah keheibe de Nabe pecu liagai kera kedet kelume gwale.28Ada gwanglu, nnui matei mri nah hepüt kerüt pung kela leune, nah Ih nnuide kemtak pwapeu zie.29A ngwanggai keu punglu nah a dade macilu, kedanemene Ih au nciep nah a mlung henah kecune, iciude nnui nnui keringria ziemne kemtak ngau luzie.30Kedanemene a ngwanggai au pung relui nah a püt au mca kecune.”
Bridge Connectivity Solutions Pvt. Ltd.