Mark6
1Cidau Jisu cikade mpet di nah pe nam Nazareth ga gwanglu, nah pa ledeukelumedung pe caisui gwang.2Sabbath cang luge, pa synagogue gade ledeu ndeudi. Mina kekiee pekwa kingnei luge penui macangdi eh hangge ge dage ranggai, “Pa dai gade aidungde ngaulu dino? Pa daiga de maci aidungde ngaulu no nah miswakegah bata tei kera kengkieng ngaulu dino?”3“Aipaude Mary napei nah James nah Joses nah Judas nah Simon sinabe tsingta keteibe meni? Pe timedung aika anuide ngngwabam meni?” Penui pecu mlaidi.4Ge Jisu penui dage rangdi, “Caihakecibe ge au kerüt simene la lama, iciude pekatei peram nah pekatei pekilungme kakga nah pekatei pekilung gade au cide ngau lu ma.”5Cine pa cika ma kedi gede teilu tadi, teeikeneeime kecam nage reuge pe ba hwapwa penuide tei ngkei kegai gwale.6Nah penui nlumkemei de ne pa peswagahdi. Aipaucai pa renamdung ga ledeu rwa ladi.7Pecai pa kereiehkena bau de qulu delwe hangna-hangna tei eh langmpet gai, nah pa penuide mcikemak rabe reu kengkieng peu,8nah penui beuh ga hetuitie ge rünne gwale magede keu mene tet kera rangbeu, tangku, mede hebie, mede penui kiakang ga rangkang gede teu helo di,9dede picumbe kailu, nah iciude mcwa kena mcwa helo di.10Pa penui dage ranggai si, “Nnui kehei daude ki ga kelüt dau, nnui cikade tetti kemaktane cika bam lulo.11Kehei gade mi nnuide ngngwa luma mede nnui sam de kingnei mecai, nnui cikade tet keradau, penuide kemmau zierang ge lu kerane rebui nnui pideu kang gade kecung gidi lulo.”12Cine penui tetmie eh minadung de helungnreu lulo kecu rang ledeu ladi.13Penui herakesiabedung kekiee de gwa mpetti, nah mina keteeime kekiee gede maca pwa keniak eh penuide tei ngkeibeu.14Cidau, Hegwangpei Herod aide siulu, kedanemene Jisu zi ci ndu pet kedine. Midungge ranggai, “Duipumketeibe John ketsai gade ringcuh dida, nah ciziemne miswakegah bata pe dade teibam.”15Dede kedamedung rangdi, “Pa au Elijah da.” Nah kedamedung rangdi, “Pa au ndaa caihakecime nzwa, caihakecibe hangge da.”16Dede Herod aide siu kelu dau pa rangdi, “Ih pepeu dang kedibe John ringcuh dida.”17Kedanemene hegwangpei Herod pa ne langpwa John de tuih nah pecu kangpwa hebaangki gage kaidi hegwangpui Herodias (pe sinabe Philip nau) ziemne, kedanemene pa pecu pe nau kelune.18Kedanemene John Herod dage ranggai, “Nang n sinabe nau de lu kera hezai gade nang petau ma.”19Dede Herodias aide ziemne John de mmaudi nah pecu teitset neudi, dede pa tei gailak di,20Kedanemene Herod John de hing, pa John au masang nah mci lie kecu ci kebamne, nah pa pecu hebaangki gage kebai nzeudi. Pe sam siu luge pe lung keherei sütdi, ciude pesui yi eh pa pe sam kingnei lula.21Pecai ziuyi keyi ge daulu, Herod pe kangga kedimedung, nah pe reugwame reu muibedung, nah Galilee ga muiteume ziemne pe kemna tingba taktyei telei kelu dau.22Pecai Herodias napui pekatei lüt penui ziemne helim limbeu, pa Herod nah cika taktyeibam ga kebam medung suiyi teigai. Hegwangpei releipui dade ranggai, “Nang dai luneu labi keheibe de kielu, nah Ih cide ncu peu beu zie.”23Pa pe dage sampetgai, “Nang keheibe a dade kie cai, Ih ncu peu beu zie, a hegwangram pempie ge kecang de.”24Cine pa mpetlu eh pe puide keteu, “Ih dai kie zieno?” Pa rangdi, “Duipum keteibe, John peu kie lulo.”25Pa hegwangpei da zette nli nlüt, nah kiegai, “Ih ncu peu duipumketeibe John peu hekwak ge gage kailwe acu pwapeu kelwa neu lie.”26Hegwangpei pelung keherei sütdi liede, pa pecu keli di gailakdi kedanemene pe sampet de ziemne nah taktyeibam ga pecu ngngwa kebamme ziemne.27Cine hegwangpei zette mide gitset kelabe de langpwa John peu pwa gwang kera aja kaigai. Cine pa mie hebaangki gade pe peu dangdi.28Pa John peu hekwak gage kailwe pwa gwang nah cide releipui de pwapeu, nah releipui cide pepui de pwa peudi.29John caisuime aide siu keludau, penui gwang eh pe paau pwalu delwe herau ge gage kaidi.30Pecai langkegaime Jisu da gwang ngkwalu, delwe penui tei kegaidung nah mide keledeudung leune pwa pecu lia.31Ge pa penui dage rangdi, “Nnui nnuikatei mi kegah ga gwanglu eh tingkak nage mtaklu.” Kedanemene mina kekiee ge gwang nah nli dai kecu recak kemakne nah penui matyei kera ting de ngaulu kemakne.32Cine penui penuikatei liem gade tetpwa mina kegah gage tet gaidi.33Dede mina penui tet kecu ngaulu, nah kekiee ge penuide cilu. Cine penui namceu leune gade maage tei eh pak gwang, nah penui penui dwa gwang raidi.34Jisu jaaidi kung ga mpet luge, pa mina maadi de ngaulu nah pa penuide ngau pelung siadi, kedanemene penui meuründung kekwame gah eh kela nzwa kedine. Cine pa penuide ma kekiee rangpwa penuide ledeu cuhdi.35Tinghegi dige, ledeukelume peda gwang eh rangdi, “Aide au renaam, nah tingbazie be de ridi zeu da.36Penuide langbeu dilo iciu eh penuide peu renam taiga nah renamdung gade mie eh penuide peu penui ziemne ketyei kesak luilu kerane.”37Dede pa penui sam keli eh rangdi, “Nnui penuide peu matyei kera peulu.” Penui pe dage rangdi, “Anui mie tangku denarii hai na mige luilu delwe peu penui de tyei kera ha zie ni?”38Cine pa penui dage rangdi, “Nnui tangku dai kiee ge bam no? Mie lwe pielo.” Penui ngaulu ge, penui rangdi, “Tangku mengei nah heka kena.”39Ge pa mina pelane de pemaa ketsamtsam tei eh hung tsehei kemdiak reuga bam lulo ranggai.40Cine penui haihai nah riakngei ngei maa tei eh bamdi.41Ge pa tangkudung mengei de nah heka pumna de keulu eh ngangcuh tinggim pie eh samlamgai nah tangkudung panglwe pwa minadung de peulo pe caisuime de peu. Pa heka kenade nzipwa mina pelane de peukap gai.42Penui pelane penui nggei kemaktane tyeilu.43Pecai penui tangku nah heka suidung hebie kereiehkena kepui palu.44Cika tangku tyei kelu mipeidung cang mengei bam.45Zette eh pa ledeukelumedung de liem ga peu nlütlu nah peu jaaidi lule gim Bethsaida ga pedwa gwangdi, pa hemaabe de langgi bam kecudau ge.46Penui tet dige, pa lamlwa ga kekie tei kerane miedi.47Tinghegi gwang dige, liem de jaaidi sum ga ladi, nah pa pekatei kecang ga bam.48Nah tingkai penui dwale de penuide gui kedine liem taupa sütla kedi ngaulu. Tingmui reket releu pe mdaibe ting dauge pa dui reude tet gwang, nah pa penuide tetkah gwang neu,49dede penui pa jaaidi reuga tetkela ngau keludau, penui pecu le pwane kengkei gelie eh sahbak gai,50Kedanemene penui pelane de pecu ngau eh penuide keheu süt kedine. Dede pa penuide mpau kelwa eh penui dage rangdi, “Kuu lulo, Ih lie, ngngi di helo!”51Ge pa penui taiga liem ga nlütlu, ge tingkai gui tadi. Penui macang sütti.52Penui tangkudung ha de cilu kemakne. Dede penui lung takla di.53Penui tetka pwa hangdeu ga mpet kelu dau, penui Gennesaret nam ga gwanglu eh liem depeu zaaidikung ga bamlu.54Penui liem gade mpet keludau, mi pecu zette cilu,55nah penui cipau cuikui pelane ga pak gwang nah keteeikeneime leude zeu gage pwa pa bamlie kecu leune ga gwangla di.56Nah pa renamdung, mede namdidung, mede renaam ga kegwang leuga, penui keteeikeneime de pwa gwang litaknidung gage kai nzeu eh cidungde de peu pe pairi nade deulo eh kiebi kapdi, nah pecu deukelu leu kengkei ngau kaplu.
Bridge Connectivity Solutions Pvt. Ltd.