Mark2
1Tingbazie kiee kemak gecai Jisu Capernaum namceu ga gwang dai luge, pa pe kiga bamlie kecu mina ci gwangdi.2Iciu eh mina kekiee cika gwang ngkwalu ge kikam ga kecangde mina sap kera heni gahdi, nah Jisu penui dage Tinggwang sam ranggai.3Cidau midungge kemnoime ge de peda pwagwang; pecu mina hang mdai ne pwala.4Mina maabe ziemne penui petai nna gailak kedidau, penui Jisu kebam kireu gade ki raklu, delwe ngkei kelucai, penui kemnoibe zeu kebam zeu de pwa nghung gai.5Ge Jisu penui kenlum ngau eh, pa kemnoibe dage rangdi, “A na, n maudung gibeu dide lie.”6Ge laisiukecime kangge de cika kilung ga bam, ge penui penui lung gade keteudi,7“Mina aipaude daitei aikenzwa ge rangla bi? Pa Tinggwang de rangmsiala dida! Dede Tinggwang rünne kemakcai caune kemaudung gibeu lulai?”8Ge Jisu zette pe rabe gade penui lungcet de cilu. Jisu penui dage keteudi, “Nnui daitei eh nnui lung gade ma aiciu kecu cet lano?9Kemnoibe dage, ‘N mau gibeu dida’ de kecube mi ‘Cuhlu, nzeu pwalu, delwe tetcu,’ de kecube rangla ki zieno?10Dede kideureu mina maudung gibeulu kebui Mina Nabe da kengking kebam nnuide peu cilu kerane,” Pa kemnoibe dage ranggai,11“Ih n dage rang gaila, cuhlu, n zeu pwalu, delwe n kiga gwangdi lulo.”12Cine pa cuhlu delwe zette pe zeu teupwa pelane dwa gade tet mpetdi. Ciziemne, penui pelane penui macangh kapdi nah penui Tinggwang de twa eh rangdi, “Anui aikenzwa madaude ngau mezing reu.”13Ipaucai Jisu Galilee jaaidi kungle gwang dai lage, mina maabe pelane peda gwanglu, ge pa penuide ledeu gai.14Pa gwang kenzeu dau, pa Alphaeus napei Levi heraha keha paiki ga bam eh ngaulu eh pa pe dage rangdi, “Acai sui lulo.” Ge pa cuhlu delwe pecai suidi.15Pecai Jisu Levi ki gade matyei bam, nah heraha kehame nah kemaume kekiee de Jisu nah pecaisuimedung de ngngwa matyei bam, penui mina kekiee ge pecai suila kedine.16Ge laisiukecime, Phariseemedung Jisu kemaume nah heraha hakelame de ngngwa matyei kebam ngau eh, penui pecaisuimedung dage keteudi, “Daitei eh pa heraha hakelame nah kemaume de ngngwa matyei lano?”17Jisu sam cide cilu ge pa penui dage rangdi, “Pe pum yi kemcangme au daru kecime de teu maisia ma, dede keteeime ziemne lie. Ih masang kelame de qu kerane gwang ma dede kemaumedung de qu kerane gwang.”18Cu John caisuime penai Phariseemedung mmwang bam, ge penui gwang Jisu dage rangdi, “Daitei John caisuime nah Phariseeme caisuime mmwang zeu delwe n caisuimedung be mmwang meno?”19Cine Jisu penuide sam keligai, “Lakciube penuide ngngwa kebam dau pe zangnamedung mmwang bam lubui ni? Lakciube penuide ngngwa kebamtane, penui mmwang gailak.20Dede peting ge gwang zie, penui dade lakciube de ngngwa tetdi kera, nah cipau tingdau penui mmwang dizie.21Migede pai keheci teugwang pai kehegwa ge gage kopgai lama. Mecai pai cikade hakpet dizie, keheci pai kehegwa pai gade, nah hak mdi si dizie.22Cinzwa eh migede zauci pwa teigeula kehegwa gage kai lama. Mecai zauci de pelabe de pungpop dila, iciu eh zau nah teigeulabe de teimsia dila. Meliene, zau keheci pwa teigeula keheci gage kaila.”23Cipaucai Sabbath benai, Jisu nah pe caisuimedung luh kakga tet kahgwang, nah pe caisuimedung tet jüja hereibui mriet ladi.24Cine Phariseeme kangge pe dage rangdi, “Pielo, n caisuime daitei Sabbath benai hezai kemakbe tei lano?”25Pa penui dage rangdi, “Nnui madaude kesanglaisiu ga pei meni, David nah pecu ngngwa kelame bau maisia kedidau nah mzeu kedidau daipai teibi kecu?26Abiathar cingku kedibe ketei tingdau, pa Tinggwang ki ga lüt delwe cingkume rünne gwale tyei kera hezai kemak, Tinggwang de reca kebeu tangku de tyei nah pa pecu ngngwa kelamede de kesa peu kecu?”27Pecai pa penui dage rangdi, “Sabbath nai au mina ziemne teigai, nah mina de au Sabbath nai ziemne teigai ma.28Ciziemne, Mina Nabe au Sabbath reude Rampaube lie.”
Bridge Connectivity Solutions Pvt. Ltd.