Levime18
1RAMPAUBE Moses dage marang, pa rang eh cu,2“Israelme dage rangbeu lu nah penui dage ranglo, ‘Ih RAMPAUBE nnui Tinggwang.3Nnui tei siabi Egypt ga kebam minadung keteidungde, ndaa nnui kelungh dega. Nnui tei siabi Canaan ga minadung keteidungde, Ih nnuide ngngwa gwang gaibeu kera deu dega. Penui zaidungde nzui diso.4A zaidungde nnui teibi maisia, nah agu ajadungde nnui mzai bilu, iciu eh nnui cika lunghlu kerane, kedanemene Ih RAMPAUBE nnui Tinggwang lu.5Cine nnui a zaidung nah a hezai sie dungde mzai bilu maisia. Mige cidungde mzai lucai, pa ringlu zie cidungde mzai kelu ziemne, Ih RAMPAUBE.6N kibaume de ngngwa nauhepei zai teiso, Ih RAMPAUBE.7N puide ngngwa nauhepei zai tei so; pa npuilu, nang pecu ngngwa nauhepei zai teiso.8N pei nau kedadungde ngngwa nauhepei zai teiso; cide n pei gu lu.9N tipui de ngngwa nauhepei zai teiso, n pei napui mede n pui napui liede, pecu kilungge gade mede n dade ndei eh ngkütlwe ntipui teikelu liede.10N napei napui mede n naapei napuide ngngwa nauhepei zai teiso, kedanemene cidungde dage keteide nkatei n dage teigai bam lu.11N pei nau napui, n pei kigade ngküt kelu de de ngngwa nauhepei zai teiso, kedanemene pa de n tipui lu.12N pei tipui de ngngwa nauhepei zai teiso; pa n pei kibaume lu.13N pui sinapuide ngngwa nauhepei zai teiso, pa n pui kibaume lu.14N pei sinabe, cide, penau de ngngwa nauhepei zai teiso; pa nnai lu.15N na nau de ngngwa nauhepei zai teiso; pa n napei naulu, nang pecu ngngwa nauhepei zai teiso.16N sinabe nau de ngngwa nauhepei zai teiso; cide n sinabe gu lu.17Mipui gede nah pena puide ngngwa nauhepei zai teiso; nah pena pei napui mede pena puina puide ngngwa nauhepei zai teiso; penui nnui kibaume lu; cide kenlien tage dida.18N nau sinabepuide teu n nau pekenabe tei eh pecu ngngwa nauhepei zai teiso n nau keraide ring kebamtane.19Mipui ge pekeidau mci kemak tingde pecu ngngwa nauhepei zai teiso.20N kidabe nau de ngngwa nauhepei zai teiso nah ainzwa eh pecu ngngwa ncu tei hera diso.21Nang n name hangge de de rudi kera peuso, Molech dage ratak teigai kerane, kedanemene nang Tinggwang zi tei hengam dikerabe melu. Ih RAMPAUBE.22Mipui gede nzwa mipei ge mipei keda gede ngngwa nauhepei zai teiso; cide au ngkau kela ge.23Makaune de ngngwa nauhepei zai tei eh cide le ncu teihera diso. Mede mipui gede makaune de ngngwa nauhepei zai teiso; cide au petau kemak tage lu.24Heta aidungde kette teu nnuide tei hera diso, kedanemene heleuhdung ainzwa penuide tei hera dida, heleuhdung Ih nnui dwa gade gwa gidi zeu kecudungde.25Hangdeu tei hera dida, cine Ih penui mau ziemne penuide saja peu dida, nah hangdeu cide cika kelunghme de nrui mpet dida.26Nang, cine, Ih ajadung kai kebeu nah hezaidung de mzailu maisia, nah nnui kengkau tadungde tei kerabe ma, Israelme mede sangme nnui kakga lungh kebamme liede.27Kedanemene kemneu ta aide hangdeu ga kelungh minadung ne tei kedi de, nnui dwaga lungh kegwangme, nah cu hangdeube hera dida.28Cine mriak lu hangdeu aide nnui de de nrui mpet di melu kerane nnui tei heradi kecu caide, nnui dwa kelungh minadungde nrui mpet kedi nzwa.29Keheibe de kengkau ta aidungde ket de teicai, cipau medungde pe minadung kakgade teu ntsam dizie.30Cine nnui Ih nnui dwa kelunghme ketei kengkau zai aidungde ket de teiso de aja kekaide mzailu maisia, iciude cidungde le nang nkatei ncu teiheradi melu kerane. Ih RAMPAUBE nnui Tinggwang.’”
Bridge Connectivity Solutions Pvt. Ltd.