Levime15
1RAMPAUBE Moses nah Aaron dage rang eh, pa rang eh cu,2“Israelmedung dage rang beulo, delwe penuide ranglo, ‘Keheibede pe pum ga majam teei eh pedui lwapet di cai, pa au mci meda.3Pa mci kemak au majam mateei dene. Pe pum ga majam dui lwapet bamde mede lwa mtakdi liede, cide au mci meda.4Zeulie keheibe ga pa zeu dicai cide mci meda, nah pa ntum kedi leune bam de mci lak ta.5Keheibede pe zeulie tungdi kecume pe paini heta delwe pekatei pecu duipia di maisia nah pa tinghegi di kemaktane mci mene bam dizie.6Keheibe de majam teei kelabe ntum kedi bam ga ntumdi kecume pe paini heta nah pekatei pecu duipia di maisia nah pa tinghegi di kemaktane mci mene bam dizie.7Keheibe de majam teei kelabe pumde tung kecume pe paini heta nah pekatei pecu duipia di maisia nah pa tinghegi di kemaktane mci mene bam dizie.8Magade majam teei kelabe ne mci kebam de de mcai nsui lwadi cai, cipaude paini heta nah pekatei pecu duipia di maisia nah pa tinghegi di kemaktane mci mene bam dizie.9Keheibe de bamrak ga pedui pet kecube dene ntum lwe tet kedi tei dicai cide mci ta dizie.10Mina cipaude bam kedi cai makeheibe tung kecume tinghegi di kemaktane mci mene bam dizie, nah keheibe de mina cipaude bam kedi keheibe nia pungla cai pa pe paini heta nah pekatei pecu duipia di maisia nah pa tinghegi di kemaktane mci mene bam dizie.11Mige pedui pet eh peba ntiak raidi mene migede tung dicai, cipau de de tung kedibe pe paini heta nah pekatei pecu duipia di maisia nah pa tinghegi di kemaktane mci mene bam dizie.12Majam dui pet bam kecube ne tung kedi lidei li de teipang di maisia, nah tsingkwak pa tung kedidung de huidi maisia.13Minabe pedui kepet de yi dide pa lang henane kwa maisia, delwe pe paini hetadi nah duilwa kebam gade duipiadi maisia, iciude pa renet gade mci luzie.14Lang hesetne benai pa tamhau kena mede ruipuine kena keu lwe; RAMPAUBE kebam paiki ga cingkube de nruipui kena keugwang beu maisia.15Cingkupei cide ket kemau reca nah kedabe pwa keru ratak teibeu zie, ainzwa eh cingkupei mina pedui lwa kelabe ziemne teikemci renet tei beu zie RAMPAUBE dwaga.16Mige henatsi lwa pet cai, pa pe pum pelane duipia maisia, nah pa tinghegi kemaktane mci mene bamdi zie.17Painia leune mede teigeu le ketei be reuga henatsi de cak mie cai cide dui le huidi maisia, nah cide tinghegi kemaktane mci mene bam dizie.18Henau hepeizai tei kedi cai mipei de nah mipui de hang nana duipiadi maisia, nah tinghegi kemaktane penai mci mene bam dizie.19Pa mipui jai ketei tingdau, pa lang henane mci mene bam dizie, keheibe de pecu tung kecume tinghegi kemaktane mci mene bam dizie.20Pa mipui jai ketei tingdau makeheibe reuga bam mede zeu dicai cide mci meda.21Keheibede pe zeulie tung kedime pe paini heta nah pekatei pecu duipia di maisia, nah cipaube de tinghegi kemaktane mci mene bam dizie.22Keheibe de pa bam kedi ga keheibe tung cai pa paini heta nah pekatei pecu duipia di maisia nah tinghegi kemaktane cipaube de mci mene bam dizie.23Zeulie ga mede pa bam kedi bam ga keheibe tung cai, nah tinghegi kemaktane mci mene bam dizie.24Magade pa mipui jai tet kebam dau mige pecu ngngwa nauhepeizai teidi cai nah pe kehera pecu tung dicai pa lang henane mci mene bamdi zie, nah cipau pei de zeu kedi zeulie keheibe de mci meda.25Magade mipui ge jai ketei gwang mene tingba kekiee ge hejai lwa ladi cai, mede magade pa lwa kelatane mci meda, pa mipui zai ketei jüja lacai pa au mci mene bam dizie.26Pa aipau tingdau zeulie keheibe ga zeu kedi, nah pa bam kedi leune ga pa zai lwa kebam dau mci mene bam zie, pa jai ketei tingdau nzwa eh.27Keheibe de cidungde tungkedi be mci meda, nah pa pe paini heta nah pekatei pecu duipia di maisia, nah pa tinghegi kemaktane mci mene bam dizie.28Magade pa pejai lwa kebam gade mcilu cai, ge pa lang henane pei lu maisia, nah cipau cai pa mci luzie.29Lang hesetne benai pa tamhau kena mede ruipuine kena pekatei pe ziemne RAMPAUBE kebam paiki kimui ga cingkube de teugwang beu zie.30Cingkube cide ket kemau reca nah kedabe pwa keru ratak teibeu zie, ainzwa eh pa RAMPAUBE dwade pa hejai kesia lwa kelade ziemne tei kemci renet teibeu zie.31Aide nzwa eh nang Israelme dungde mcikemakdung gade keu ntsam maisia, iciu eh penui mcikemak gade tsai di melu kerane, nah Ih nnui kakga kebam paiki de tei hera di melu kerane.32Aidungde mige pedui lwa pet, mede henatsi pe dade lwa kepet dene nah pecu tei heradi kecu zaidung da,33kedanemene pa mipui jai ketei tingdau, keheibe de pedui lwa kepet, mede mipei mede mipui, nah mipei keheibe de nauhepei zai tei kedi mci kemak pui de ziemne.’”
Bridge Connectivity Solutions Pvt. Ltd.