Tutiakme5
1Cine Deborah cipaunai Barak, Abinoam napei, de ngngwa lei tei, marang eh:2“Israel ga muiteume penui dwa tetpet kecudau, minadung neunga eh hezi raulu, mileune RAMPAUBE de samlam beu!3Kingneilu, Oh hegwangmedung! Kingnei lo, Oh kedimedung! Ih, RAMPAUBE dage, Ih de, Ih lei teizie, Ih RAMPAUBE dage lei teigai zie, Israel Tinggwang dage.4RAMPAUBO, nang Seir gade tetmpet kedine, nang Edom deu gade tetmpet kegaine, kideube de teu kelaidi, tinggimdung de zau mie, hemwa keremangdung gade de dui zaumie.5RAMPAUBE kebam lamlwadung lwa petdi, Sinai aide, RAMPAUBE kebamne, Israel Tinggwang.6Shamgar tingdau, Anath napei, Jael tingdau, lampui kemlangdung putdi, nah puiceunadung ga ketetme puikoidung pwagwang.7Israel ga namceu ga kelunghme bamtadi, Ih cuh kemaktane penui bamtadi, Ih Deborah, teuswa cuhlu ge, mipui ge pe name ma kepie nzwa Ih Israelme ma pielu!8Israelmedung hera kehecidung reca kecudau, cidau namdibe riekidung ga hereu ketei bam dila, hegeu mede hengei ngau tadi Israel mina cang riakdai kakga.9A mlung au Israel ga aja teu kelame da la, minadung kakga leirauta keteime. Minaleune RAMPAUBE de twa lo!10Gada kehadung reu cwala, pikampai reuga ntumbam, mede lampui ge ga tet keladau, lei aide teilo,11dui kebam nidung gade dui zi kebam kwa swade ci eh. Cikade penui RAMPAUBE masang batadung twa eh bam muila, Israel nam ga kelungme masang tadungde. Pecai RAMPAUBE minadung penui namdi kiriedung ga cailigwang di.12Mraklu, Mraklu, Deborah! Mraklu, Mraklu, lei ge teigai lo! Culu, Barak, delwe ngu hebaangme lampui sau eh tetlu Abinoam napei.13Pecai tsaikebangme ge kedime reu ngkienglu, A taiga kebam RAMPAUBE gu minadung au reugwamedung reu ngking lu.14Ephraim gade, Amalek leuhme ndaa piage kelungh deu de penuide renia; nah pecai, Benjamin, n minadung kakgade. Machir gade macet kelumedung nghung lu, nah Zebulun gade keraube tuitie pwa kelamedung.15Issachar gade a hegwangnadung Deborah de ngngwa la; nah Issachar Barak de ngngwala langkam ge gage pe pi tet eh pecu langmpet gai. Reuben maadung kakga dai be teizie bi penui cetlu mene bam.16Nang daitei eh miteilum kebamme da ntum bamno, meurün kekwame meurün de kequ kwa kingnei kerane ni? Reuben maadung ziemne au dai be teizie bi penui cetlu mene bam.17Gileadmedung au Jordan gwale cuikui ga bam; dede Dan, daitei pa limdung ga lung lano? Asher au jaaididung kung ga lungla nah pa pegu liemtaubamdung ga lungbamla.18Zebulun leuh au pe keringria ketsai kecang rata kebamdung ge, Naphtali de reutakni tei cehu kelu henidung ga la.19Hegwangmedung gwang, penui hereu tei; cidauting Canaan gwangpeidung au Taanach ga hereutei Megiddo duiletdung taiga. Penui au rangkanggeu tuih kelude keu ma.20Tinggimdung gade hegidung hereu tei, penui sap gade Sisera de ngngwa hereu tei.21Kishon Reuki Sisera regwamedung de diapung gidi,Hereuki kehegwa, Kishon Reuki.Tet gwanglu, Oh a keringria, ngkieng eh!22Iciuge ge hekwen ge nginglwakdung pak nghung, pak eh, pe reugwa kekuumedung pak nghung.23‘Reset punglu Meroz!’ De eh RAMPAUBE gwabe ranggai. ‘Nang cika kelungme dungde reset peu bizie, penui RAMPAUBE de ngha kera gwang kemak ne, RAMPAUBE de ngha kera mina kengkieng mede renia eh.’24Jael mipui kakgade samlam pungtu, Kenit mepei, Heber nau, paiki ga kebam mipuidung kakgade pa samlam pung.25Pa dui kiegai, pa tungdui peu, makecime ziemne hekwak keyige gage, pa hetum tungdui nnwa pwagwangbeu.26Penui ba ketwapetlu, paiki gwak gage, nah pe ba zetle le hetaketeime hegeuteisang ge keraklu eh; pa Sisera de kedeu di, pa pe peu teipang di. Pa kedeutietlwe pe takla huidi.27Pepi kena kakga, pa keumiedi, pa kaudi, pa zeudi. Pepi kena kakga pa keumiedi, pa kau zeudi; pa heni keukie kemiega, pa cika kaumie tsaidi.28Hebaki gade pa pie nghung eh hap di, Sisera pui hebaki tsingra gade. ‘Daitei pe bagi gwang ridi no? Daitei pe hekwenbagi gwang ridi no?’29Pe hegwang napui macitumedung sam keligai, dede pa pekatei pecu resiu eh bamdi;30‘Penui ngaulu meni, penui hematuikeludung nzi bamni, releime, reugwame ket ziemne releime kena, Sisera paini swa kelube tui kelu, paini swa kelube tui kelu, mamie herigaikelube, swa kelube pai lule ailam mamierau kelube pe ngwangbiet tui keludung?’31Cine, n ngauraume pelane de peu kap dilu, RAMPAUBO! Dede pecu hung kelame de au peu tingnaimiak kengkieng tau pet kepet nzwalu.”
Iciu eh kideube ga mmi riakdai lungciep bamdi.
Iciu eh kideube ga mmi riakdai lungciep bamdi.
Bridge Connectivity Solutions Pvt. Ltd.