Joshua9
1Cu cinzwa eh hegwangpeidung pelane Jordan gwale kideutu deudi ga kebam dau, nah hangdeukehena ga, nah Mediterranean Jaaidi kung pelane ga Lebanon lebie, Hittime, Amorme, Canaanme, Perizzme, Hivitme, nah Jebusime, cide siu lu,2Penui Joshua nah Israelme de keregi kera ngngwa ncütlu.3Dede Gibeon ga lungkebamme Joshua ne Jericho nah Ai namdi dage teigai kecu ha siu luge,4penui cwa kera ciem riemlu. Penui mie delwe taktyeinidung teleilu, nah rosopai hak kedidung keulu eh penui gadadung gage kailu, nah teigeuzaula hak kedidung nah hak kecube heruikup keludung,5nah picum hak kedibe nah kop kelube punglu, nah paini hak kedibe kailu, nah penui taktyei niadung gade tangku cangh nah sia kedibe pelane punglu.6Delwe penui Gilgal ramzeuki ga Joshua da mie peda nah Israelme dade rangdi, “Anui deudi mdei süt kecuge gade gwangla, cine cu anui kakga ngngwa samkak lugo.”7Israelme Hivitme dade rangdi, “Nnui au anui kakga kelungme au zielu. Cine dainzwa anui nnuide ngngwa samkak laino?”8Dede penui Joshua dade rangdi, “Anui au n kilamedung.” Ge Joshua penui dade rangdi, “Nnui cau no? Nnui dai gade gwang lano?”9Cine penui pe dade rangdi, “N kilamedung deudi mdei süt kecu gade gwangla, kedanemene anui RAMPAUBE nnui Tinggwang ha, Egypt ga tei kegai leune anui siu kecu ziemne10nah Jordan gwale kelame Amoritme gwangpei kena dage teikegai leune, Heshbon gwangpei Sihon nah Ashtaroth ga kebam Bashan gwangpei Og.11Cine anui hangkiamedung nah anui deu ga lungh kebam leune anui dade ranggai, ‘hebeu ziemne taktyei teleilu, delwe mie penuide redau eh penui dage ranglo, “Anui nnui kilamedung. Cine anui kakga ngngwa samkak lugo.”12Anui kilung gade ncu redau kera tetpet kecu dau, anui gu aipau tangku de lum bamreu. Iciude cu, pielo, aide cang nah pekang tei dida.13Aipau teigeuzaula anui nlipui keludung de au heci bam reu, dede pielo cidung de hak dida. Nah anui paini nah picumdung hak ciau dida anui beu tiezu kecu ziemne.’”14Penui taktyei cidungde luulu, dede penui RAMPAUBE lungning keteu ma.15Joshua penuide ngngwa kezuyilu, nah penuide peu penui deu ga lungh kera samkaklu, nah penui muiteumedung samkakkelu cide teimzai kera penui sampet gaibeu.16Penuide ngngwa samkak kelucai lang cumne cia, mina cidungde penui kemna penui kakga lungh kebamme lie kecu siulu.17Ciu eh lang pekecumne benai Israelme tetpet delwe penui namdidung ga cailigwang lu. Penui namdidung liecai Gibeon, nah Kephirah nah Beeroth nah Kiriath Jearim.18Dede Israelme penuide ngngwa keregi ma kedanemene penui muiteumedung RAMPAUBE Israel Tinggwang zi gade sampet kedine. Ngkwa kebam pelane muiteume de ncamdi.19Dede muiteumedung ngkwa kebam pelane da rangdi, “Anui RAMPAUBE Israelme Tinggwang zi teu eh penuide anui sampet mci gaibeu dida, cine cu anui penuide tei rejam daulak da.20Anui aide penui dage teigai zie: Anui penuide peu lungh zie ciude rata anui reuga gwang melu kerane kedanemene penui dage anui sampet mci beudi delu.”21Muiteumedung penui dage rangdi, “Peu penuide lungh lulo.” Cine penui minadung pelane ziemne tsinggetme nah dui kepwame teidi, muiteumedung penui dage rang kebeu nzwa eh.22Pecai Joshua penuide qu hekwa nah penui dage ranggai, “Nnui anui kakga lungbam delwe daitei nnui kemdei gade gwang lalie eh anuide cwa no?23Ciziemne cu, nnuide reset dida, nah nnui kelungta a Tinggwang ki ga kilame tei eh, nah tsinggetme nah dui kepwame tei eh lungh zie.”24Penui Joshua samkeligai eh rangdi, “RAMPAUBE nnui Tinggwang pe kilabe Moses dage aja kai eh hangdeu pelane nnuide peu zielie eh nah lungkebamme pelane de teingkap dizie lie rang mcigi kebeune, anui keringria ngkapdi kera hing eh ma aide tei dida.25Cu, ainie, anui nnui ba ga bamdida. N kecet keyi nah petau bie anuida teigai lulo.”26Cine pa aide teigai: Joshua ne Gibeonme de Israelme ba gade kelibeu, nah penuide teitset dimah.27Cine cipaunai Joshua penuide tsinggetme nah dui kepwame teilu, hemaabe nah RAMPAUBE recabam ziemne, pa kedet kera ni de ga, henai kecang de pa penui bata aide teila.
Bridge Connectivity Solutions Pvt. Ltd.