Joshua18
1Hangdeu de penui gwakelu cai Israelme pelane Shiloh namdi ga gwang ngkwalu nah cikage paiki limlu.2Dede Israelme kakga penui mabam ngaulu kemak leuh hena bamdi.3Joshua Israelme dage rangdi, “RAMPAUBE, nnui peime Tinggwang, nnuide kepeu deu de ga mie gum mene dai tiege mlai bam laino?4Heleuh ramsang gade mina hangcum de kedet lulo, nah Ih penuide langgai zie, nah penui mie hangdeu piezie, nah penui mahei rehi gade rau ndugai liazie, nah penui ada cailigwang daizie.5Penui cide zi hena mzi luzie. Judah tingbangle penui deu ga bamlu zie, nah Joseph kilungme tingtünle penui deu ga bam luzie.6Nang hangdeu de zi hena ndugai liazie, nah ada rau lwe cide teugwang beulu. Ih RAMPAUBE anui Tinggwang dwade nnui ziemne dacak tei beuzie.7Dede nnui kakga Levime penui qwa gah, kedanemene penui qwa au RAMPAUBE cingkume ta tei kerade delu. Gad, nah Reuben, nah Manasseh pempie leuh ge au penui deu ngaulu da, Jordan kahpet naimiak kepetle, RAMPAUBE kilabe Moses ne penuide kepeu.”8Cine minadung cuhlu delwe miedi, nah Joshua hangdeu regum kera mie kedime dage aja kaibeu, rang eh, “Hangdeu ga mie eh cide regumlu, nah ada cailigwanglu. Ih Shiloh gade nnui ziemne RAMPAUBE dwade dacak beuzie.”9Cine minadung mie nah hangdeu de kah gwanglu nah pe ha zi hena tei eh namdidung rehi gade laisiudum gage raulu. Pecai penui Shiloh ramzeuki ga Joshua da cailigwangdi.10Cidau Joshua penui ziemne Shiloh gade RAMPAUBE dwa gade dacak teibeu, nah cika de Joshua Israel namedung de hangdeu mzibeu penui nsam gade.11Benjamin namedung leuh gu dacak mpetlu penui pautsa rehi gade, nah penuide kepeu deurai de Judah nah Joseph leuhme kakga.12Penui herai tingtünle bie Jordan gade ndeu, nah Jericho tingtünle deu ga nghang cang, nah kideutu naimiak kenlütle bie de hang. Beth Aven hetaideu gade penli di.13Cikade herai Luz lebie kahpet, Luz deupia tingbangle ga mie (cide, Bethel). Pecai herai nghung Ataroth Addar ga, lamlwatu tingbangle Beth Horon kangle.14Herai naimiak kenlütle bie tu pet si nah tingbangle ge nreugai, tingbangle bie de Beth Horon de kengau ga. Herai penli be Kiriath Baal (cide, Kiriath Jearim), Judah leuhme namdi ge. Aide naimiak kenlütle bie.15Tingbangle tu herai Kiriath Jearim deutu gade ndeu, nah herai naimiak kenlütle pet si, nah Nephtoah duipwak ga miedi.16Pecai herai de nghung lamlwatu penli ga Ben Hinnom Langkam de ncwa kebam, Rephaim langkam tingtünle tu ga kebam, nah Hinnom Langkam ga nghungdi cide, Jebusime tingbangle deupia ga, nah En Rogel duilet ga nghungdi.17Pecai cide tingtünle nreudi, nah En Shemesh ga miedi, nah Geliloth ga mie, Adummim ga kenghang de ncwabam. Pecai cide Reuben napei Bohan Tsukang ga nghungdi.18Cide tingtünle Beth Arabah ga kahpet, nah Arabah ga nghung di.19Pecai herai Beth Hoglah tingtünle bie kahpet. Herai penli be Ketsai Jaaidi tingtünle bie kungga, tingbangle Jordan penli ga. Aide tingbangle deurai.20Jordan de kepetle tu herai. Aide Benjamin leuhme qwa, twagwa kebam pelane deurai rehi gade, penui pautsa rehi gade.21Benjamin namedung leuh namdidung, penui pautsa rehi gade cai: Jericho, nah Beth Hoglah, nah Emek Keziz,22nah Beth Arabah, nah Zemaraim, nah Bethel,23nah Avvim, nah Parah, nah Ophrah,24nah Kephar Ammoni, nah Ophni, nah Geba; namdidung kereiekena nah penui renamdung.25Gibeon, nah Ramah, nah Beeroth,26nah Mizpah, nah Kephirah, nah Mozah,27nah Rekem, nah Irpeel, nah Taralah,28nah Zelah, Haeleph, nah Jebus (cide, Jerusalem), Gibeah, nah Kiriath; namdidung kereiemdai nah penui renamdung. Aide au Benjamin leuhme gu mabam penui pautsa rehi gade.
Bridge Connectivity Solutions Pvt. Ltd.