Jonah1
1Tingnai ge RAMPAUBE Amittai napei Jonah dage sam ranggai,2“Cuhlu, delwe namdi kedi Nineveh ga miecu, nah namdi cide de kemmau sam sah eh ranglo, kedanemene cika minadung daikenzwa gede siabi Ih cibam dida.”3Dede Jonah RAMPAUBE dwa gade Tarshish namdi gage pak gaidi kera teilu. Nah pa Joppa namdi ga nghunglu ge liem ge Tarshish ga mielai bam eh ngaulu. Cine pa pe zie peudi eh Tarshish ga mie kera liemketeume de nzanglwe liem ga nghanglu, RAMPAUBE dade mdei tetdi kerane.4Dede RAMPAUBE jaaidi reu gage tingkai cisüt kecu ge langgai, nah jaaidi ga rahang kedi ge gwangdi, iciu eh liem de siadi kera hingdi.5Ge liemketeume de keheudi eh mi hangge ge kecu pe rabe rip dade kengha kie ciaudi. Pecai penui liem ga kebam maniadung de jaaidi gage kelien gaidi, penui liem tei ncalu kerane. Dede Jonah liem lungki ga nghung bam, nah gwang zeu zip zing de bam.6Cidau liem teukela kedibe gwang eh Jonah dage rangdi, “Nang daitei eh zip bamno? Cuhlu! N tinggwang dade kengha kielu. Iciude tinggwang anuide ngaungngia eh anuide ngkapdi melu builu.”7Cidau penui pelane penui zangme dade rangdi, “Ko, anui dacak piego, ciude anui caube ziemne makesia aide anuida gwang bamdi debi cilu kerane.” Cine penui dacak piege, ge Jonah reuga gwangdi.8Pecai penui pecu keteudi, “Cau ziemne kesia aide anui da gwangbam bi kehereide anui dage ranglia lo. Nang dai ta tei lano nah nang dai gade gwang lano? Nang dai deudi gade no nah nang dai leuhme no?”9Cine pa penui dage rangdi, “Ih au Hebrewme ge, kideu kecang nah jaaidi tei kegai RAMPAUBE tinggim Tinggwang de Ih reca la.”10Liemketeume ngngi sütdi, nah penui pe dade, “Nang ai dai teidi deno?” de rangdi, kedanemene pa RAMPAUBE dwa gade pak lalie kecu penui cilu, pa penuide ranglia kebeune.11Herahang mtei reureu kedine penui pe dage rangdi, “Rahang de kaamdi kerane anui nda ge daipai teigai lubui no?”12Nah pa penui dage rangdi, “Acu teucuh lwe jaaidi gage kelien gaidi lulo. Ciciude duikedi de nkam dizie, kedanemene rahang kedi nnui da gwang kebam aide a ziemne lie kecu Ih cibam.”13Duikung ga mpet liem taugai lu kerane penui laikai tei, dede penui mpet luma, kedanemene rahang de sia reureu eh penui reu gwang kedine.14Cine penui RAMPAUBE dage mragai, “O! RAMPAUBO, mina aipau de teilung ge ziemne anui teilung ngkapdi helo nah kemci jai anui reu gage kaidi helo. Kedanemene RAMPAUBO, nang n lungning teicang kelune.”15Cine penui Jonah de jaaidi gage pwa kelien gaidi, ge rahang nkam zing dedi.16Cidau liemketeume RAMPAUBE de hing sütdi, nah penui RAMPAUBE dage ratak ge teigai beu, nah pegwa tei kera sampetlu.17RAMPAUBE Jonah de mneu kera heka kedi ge langgai, nah Jonah heka pok ga tingmui tingba langcumne ladi.
Bridge Connectivity Solutions Pvt. Ltd.