Job7
1Kideu ga mina pe kenaang bamla meni? Pe tingbaziedung au mige de tingba ziehi liteu kela nzwa meni?2Kilame ge ting kaugwang kera hengin cangsiak kela nzwa, pe zie liteu kelame ge pe mahi ziedung ziemne kwabam kela nzwa,3iciu eh kei ge cai kei ge acu teipwa peu keherei gade lia; a da keherei tingmuiziedung teu gwang beu.4Ih zeu kemie dau, Ih akatei a dage rang, ‘Daidau Ih cuh zie debi nah daidau tingba di zieno?’ Tingba pet kemaktane Ih au zeudet mlwet mpet bam la.5A pumteih au tangseudung nah tangnia le gum pwabam dida; mazamdung teeisüt nah sui di nah mring lwa pak bam dida.6A tingbaziedung au pai kedakme ge deikim swade mzet gwa dida; keregui ge de gah eh penui kahgwang dida.7Nsung gailo, Tinggwang, a teilung au cuingi nage rünne dida; a miak makeyi ngau si lakta.8Tinggwang, acu kengaube, acu ngau si lakta; Tinggwang acu pei lazie, dede Ih bamta dizie.9Hemwa himlwe ngau tadi kela nzwa, Cinzwa Sheol ga mie kedimedung gwang dai lakta.10Pa pe ki ga cailigwang si dai lakta; mede pe bam nidung gade pecu cidai gai lakta.11Cine Ih mlei tadi gailak; a rabe keherei kedine Ih marang zie; A lungka de teu Ih ncam zie.12Ih jaaidi mede neidi ge ni nang a reu gage kekwabe ge kaipwa bam kecu?13Ih, ‘A zeu acu tei relui beuzie, nah a zeukam le Ih kencam tei ntak beuzie,’ de eh kerang dau,14ge nang hemangdung ge le acu tei mrimla nah mangngaudung gade acu keheu dila,15iciu eh Ih ngkak nah ketsai de kedet luzie a radung de peu yi eh kainzeu kecu swade.16Ih a teilung ngkau dida; Ih lung bammui kecu luu neu ma; acu püt dilo kedanemene a tingbaziedung kemta kecune.17Daitei eh nang mina de mzai maisia no, nang n lung kai pwa pe dage kai maisia kecu,18nang tingcang ramsang pecu mcet muila nah tingba ramsang pecu kedei lano?19Nang a dade nreu tet kedi dwa dai tingtie ge zie no, nang peu Ih rünne kedi dwa ketie ge acu peu akatei a mcai mnwa mie meno?20Ih kemau tei di liede, n dage daipai teigai zieno, nang mina de kwa bam kelabo? Daitei nang acu mcau zeu no, iciu eh n ziemne Ih hepüt kerüt ge meni?21Daitei nang Ih teimau kedi de a mau gibeu meno nah Ih kesia ketei de keugi di beu meno? Ih cu tie mene rebui ga zeu mie dizie da; nang acu peei teune zie, dede Ih bam si lakta.”
Bridge Connectivity Solutions Pvt. Ltd.