Jeremiah50
1RAMPAUBE sam aide caihakecibe Jeremiah dade Babylon namdi nah Babylonme deu ha rang ndu kegai,2“Heleuhdung dage ranglia beulu nah peu kingnei lu. Marehi ge pwa cuh hugai nah peu kingnei lu. Cide pwa mbai diso. Aide ranglu, ‘Babylon de ngam luda. Bel de hengam tei dida, Marduk lungrei tei dida. Pegu mamiedung hengam tei dida; pe miedung suisiet ge tei dida.’3Heleuh ge tingtünle de renia kera cuh zie, nah penui deu de hetaideu ge tei dizie. Cika migede lungh lak; mina nah makaunedung de pak tet dizie.4Aide RAMPAUBE ndugai, cipau tingdau nah tingbazie kegwang benai, Israel nah Judah ga minadung gwang ngkwa dizie, penui Tinggwang RAMPAUBE de peei kera ziemne hap eh tet gaizie.5Penui Zion lampui keteu zie nah cilam ge tet gai zie, penui, anui mie zie nah anui RAMPAUBE de ngngwa kelunghta nsungta di kelak samkak kelu ge tei zie,” de rang eh.6A minadung gah kedi meurün hau ge tei dida. Penuide kekwame penuide lamlwatuhdung gage zang gai dida; penui penuide kideutu ge gade kideutu keda ge gage ngngwa gai dida. Penui mie, dede penui dai ga lungh bi nsungta dida.7Penui da kemie leune ne penuide ngkapdi. Penui ngauraume ranggai, ‘Anui au mau ma, kedanemene penui RAMPAUBE, penui ki kesangbe, RAMPAUBE, penui paupaime kereguibe de mcau eh kemau tei kedine.’8Babylon gade tet dilu; Chaldeame deu gade tet mpetlu; hemeuseudung pehau dwa tet rai kelade nzwa.9Kedanemene pielu, Ih tingtünle de heleuhdung maadi ge ncuhlu eh Babylon de gwaketang zieda. Penui katei penuide mtei luzie Babylon de mcau kerane. Babylon de cikade tui luzie. Penui au teihkap keyime lakpitsi madaude gizeu dila kemak nzwa da.10Chaldea au hema tui kedi nam ge dizie. Hema ketuime leune mnung lu zie, aide RAMPAUBE ndugai.11RAMPAUBE rangla, “Nnui suiyi eh nnui a leuhme niadung tui kelude teu hengyi bam; nnui ketumseuna tsehei kemdiak luh ga nsün twagwa kebam nzwa; nnui hekwen kengkieng ge mra mteisüt kegai nzwa mra bam dida.12Cine nnui pui ngngam süt dizie; nnuide mna kebeu be ngngam dizie. Pielo, pa heleuhdung dade ceutu ge tei dizie, hetaideu ge, hangdeu kecangh ge, nah kideu ketsai ge dizie.13RAMPAUBE rata ziemne, Babylon ga mina lunghta dizie, dede ngkap cangsiak kedi nam ge dizie. Babylon ngkap msiasüt kedi ziemne cika tetkah kegwang leune mbeu nah keheu dizie.14Nnui Babylon twagwa kebam pelane de ketang kera mteilu, keheibede lakpi kap kera teu kelume pe dage kapgai maisia. Nnui lakpitsi kette keu caili dai so, kedanemene pa RAMPAUBE dage kemau tei gaidi delu.15Penuide twakengwa pelane gade hereu kwa sah gai lulo! Penui mikang nlüt dida; penui reketbam kau dida; penui kiriedung tei ngkau dida, kedanemene aide RAMPAUBE hekum kepeei gelu. Pe dade hekum peeilu! Pa tei kegai nzwa pe dage teigai lu!16Babylon ga luhlüt tingdau, heta ketame heleuh ling kelame nah tangkane teu luhget kelame hangna na gunia ngkap dilu. Peu penuide penui leuhme da cailigwang dilu, peu gwaketang kela kingtie dwa gade pak penui deu ga gwang dilu.17Israel au meurün hinghodung ne gwa gidi nah tei zangra kedi ge nzwa da. Keraibe Assyria gwangpei ne penui de ngkap di; pecai Babylon gwangpei Nebuchadnezzar ne pe radung tei pangdi.18Cine Tinggim reugwame reu RAMPAUBE, Israel Tinggwang, aide ranggai: Pielo, Ih Babylon gwangpei nah pe deu de saja peu zie da, Ih Assyria gwangpei de saja kepeu nzwa.19Ih Israel de ndaa nzwa teu cuh dai luzie penui tingdeu gage; pa Carmel Deutu nah Bashan cuikui ga taktyeidung lungh kelube tyei zie. Pecai penui Ephraim nah Gilead kideutu deudidung gade de mnung luzie.20Cipau tingdau, RAMPAUBE ranggai, Israel ga kemau kesia peei zie, dede kette ngaugai lak. Ih Judahme maudung keteu zie, dede kette ngaugai lak, kedanemene Ih püt gai kebeu bangh kebamme maudung gibeu zie kecune.”21RAMPAUBE rangla, “Cuhlu delwe Merathaim deu nah Pekod ga kelunghme de mcaulu. Penuide kingtie gage kailu nah penuide ngkapdi kerane teu tsam dilu, aide RAMPAUBE ndugai, Ih nnuide teilo rang kebeu leune tei lu.22Hereu ketei kwa nah kengkap kedi ge kideu ga bam dida.23Dainzwa kideu pelane gu tsudiak tei pang takcai nah tei ngkapdi dino. Dainzwa Babylon heleuhdung kakgade ngkap kedi nam ge tei dino.24Babylon Ih nnui tak teigai nah nnuide keulu, dede nnui cilu ma! Nnui de peei lu nah tuilu, kedanemene nnui RAMPAUBE de mlai kedine.25RAMPAUBE pe reunet nia kaipwa kebam de letgai dida nah reunet niadung keumpet luda pe rata kaigai kera ziemne. Tinggim reugwame reu RAMPAUBE Tinggwang Babylonme deu ga heta tei kera bam. 26Kemdei gade penuide gwaketang lu. Penui tsiukidung let lu nah penuide cikage kailu tsiu pung kebau kelube nzwa eh. Penuide ngkapdi kerane keu ntsamlu. Penui migede de bangh nzeu so.27Penui tumseudung gitset ciak dilu. Gitset kera bam gage penuide lang nghung gai lu. Lungrei penui da gwang zie, kedanemene penui tingbazie gwang bam dide lu, penuide saja peu kera ting de.28Ringkelumedung kepak kwa siu bam dida, Babylon deu gade. Aidungde ne RAMPAUBE anui Tinggwang Zion ziemne, nah pe kerecaki ziemne hekum kepeei ha paulia zie”.29“Lakpi kekapme de Babylon gwaketang lo rang beulu, lakpidung kap kera teu mtei kelu leu de. Penuide ramzeuki tei twagwa lu eh mcau lu, nah peu migede de pak diso. Penui tei kegai nzwa penui pau rui beulu. Penui pwa tei kegai kiee ge mdetlwe penui dage tei gai lu. Kedanemene penui Israel kemci RAMPAUBE de renia kecu ziemne.30Cine penui reugwamedung namdi puididung ga kau zeu dizie, nah pe reugwamedung pelane de cipau nai ngkap dizie, Aide RAMPAUBE ndugai.”31“Pielo, nnui ngang kelame de Ih mmaula, aide Tinggim reugwame reu RAMPAUBE Tinggwang ne ndugai, kedanemene nnui tingba gwang bam dida, ngang kelamedung, Ih nnuide saja peu kera ting gwangbam dida.32Cine ngang kelame pi nsui nah kau dizie. Migede penui de kwak ncuh beulak. Ih penui namdidung gage mi twa gaizie; cide penuide twagwapung kebam pelane ru ngkap dizie.33Tinggim reugwame reu RAMPAUBE aide ranggai: Israel nah Judah ga minadung de tei keherei bam dida. Penuide tui kelume penuide baang pwa bam dida; penui penuide peu tet meda.34Penuide kelibeu kelabe au ngkieng. Pezi au Tinggim reugwame reu RAMPAUBE. Pa penui ziemne pe nggia kie zie, peu penui deu ziemne kemtak teugwang beu kera ziemne nah Babylon ga mina kelunghme dage au keherei teugwang beu zie.35Kingtie ge Chaldeame, nah Babylon ga mina kelunghme, penui muiteume nah makecimedung dage mcau bam dida, aide RAMPAUBE ndugai.36Kemta sam kerangme de kingtie le mcau zie! I ciu eh penui kemieme dizie! Reugwamedung de kingtie le mcau zie! Penui kehing le pui dizie.37Kingtie ge penui hekwendung, penui bagidung nah Babylon ga mina kelunghme pelane de mcau kera gwangla dida, cine penui mipuidung nzwa dizie. Kingtie ge penui mabam kibungdung ziemne gwangla dida, nah cidungde tui luzie.38Tingrui kelak ge gwangla dida, cine penui deu cangh dizie. Kedanemene penui deu au kemta miedung de kereca deu ge di delu, nah penui tatei kemieme nzwa dida penui teikelu kehing mamiedung de reca kecune.39Cine kideu ketsai kaudung penai heneudung ne cika lungh dizie, nah ruitie ne penuide ngngwa lungh dizie. Madaude, cika mina lungh si lakta. Ceheu ceheu caide mina cika lungh gwang dai lakta.40Sodom penai Gomorrah nah pe namdamedung de Tinggwang ngkap kedi nzwa, aide RAMPAUBE ndugai, migede mina cika lungh lak; migede cika bamta dizie.”41“Pielo, tingtünle de heleuh kedi ge nah hegwangpei kekiee ge ncütlu eh kideu mdeitu gade mina gwangla dida.42Penui lakpi nah hengeidung pwa cuh luzie. Penui au penui zai sia nah ngaugia gah. Penui kwa au jaaidi kwa nzwa nah penui hekwendung ga cwala, hereu ziemne mina mteilu eh tetpet dida, ncu mcau kerane, Babylon napui.43Babylon gwangpei da penui ha paukegai sam siu gwangdi nah pe lung keherei eh pe ba kenana sia eh kezumie mlailu tadi. Mipui ge mna tedteei keteei nzwa pa teeizu eh mlai gai lakdi.44Ainie! Pa hingho ge nzwa hang eh Jordan deutuh gade heidiak deu ga mie. Kedanemene Ih mzetsüt eh penuide peu cikade pak tetdi kera tei zie, nah Ih ne kedet kelube de ne heleuh be muiteu tei zie . Kedanemene cauge Ih nzwa no, nah cauge acu gwanglo qu lai? Meurün kekwabe cauge acu renia lulai?45Cine Babylon de mcau kera RAMPAUBE riem kelude kingnei lulo, Chaldeame deu de mcau kera riem keludung de. Penuide teukerei tet bi dizie, ceutu nabe kauruine kecang de. Penui gu heidiak deudung de ngkap kedi nidung dizie.46Babylon ngamkelu kwa dene kideu mlaidi, nah penui kenrim kwa sah kegaide heleuhdung kakga siu gwangdi.”
Bridge Connectivity Solutions Pvt. Ltd.