Jeremiah43
1RAMPAUBE penui Tinggwang Jeremiah de minadung leune dage samdung ranglia lo kebeu de pa ranglia cangdi.2Hoshaiah napei Azariah, Kareah napei Johanan, nah mina ngang kelame leune Jeremiah dage ranggai, “Nang au kenret rang bam. RAMPAUBE anui Tinggwang peu ncu, ‘Egypt deu ga lungh kera mieso,’ de eh rang kerane langgai ma.3Kedanemene Neriah napei Baruch de peu anuide Babylonme ba gage kaidi kerane n lung tei gaibam, ncu peu anuide teitset di kerane nah anuide Babylon gage hebaang teidi kerane.”4Cine Kareah napei Johanan, reugwame reu kedime leune, nah mina leune Judah deu ga lungh kera RAMPAUBE kwa mlai di.5Kareah napei Johanan nah reugwame reu muibe leune heleuh leunedung ga zangra la eh Judah deu ga lungh kera caili kegwang bangh kenzeu Judahme de ngngwa tetdi.6Penui mipeidung nah mipuidung, henamedung nah hegwangpei napuidung, nah Nebuzaradan, hegwangpei de kekwame reu muibe Ahikam napei Gedaliah nah Shaphan capei de peu penui ma pie kebam leune de ngngwa tetdi. Penui caihakecibe Jeremiah nah Neriah napei Baruch de de ngngwa tetti.7Penui Egypt deu ga mie, Tahpanhes namdi ga, kedanemene penui RAMPAUBE kwa kingnei kemakne.8Cine Tahpanhes gade RAMPAUBE sam Jeremiah dage gwang eh ranggai,9“Tangtsu kedibedung n ba gage keulu, nah, Judahme kengau gade, Tahpanhes ga Pharaoh ki kenlüt lampuiki gage hebai dilu.”10Pecai Judahme dage ranglu, “Tinggim reugwame reu RAMPAUBE, Israel Tinggwang, aide rangla, ‘Pielo, Ih Babylon gwangpei a kilabe Nebuchadnezzar de ngngwa gwang kera samgwame langgai zie da. Jeremiah, nang ne kung kegai tangtsu reu gage Ih pe hegwangbam dung luzie. Nebuchadnezzar pe hegwang paiki cipau reu gage liem luzie. 11Kedanemene pa Egypt deu de gwang eh gwaketang zie. Keheibe de peu tsai zie lie kelame de ketsai peu zie. Keheibe de peu hebaang tei zie lie kelame de peu habaang tei dizie. Keheibe de kingtie peu zie lie kelame de kingtie peu zie.12Pecai Ih Egyptme rabedung dage penui kerecaki gage mi twagai zie. Nebuchadnezzar penuide ru dizie mede tui luzie. Meurün kekwabe pe painidung gade helai tei nci kela nzwa pa Egypt deu tei nci dizie. Pa cipau heni gade ngking eh mpet zie. 13Pa Egypt deu ga Heliopolis ga kebam tangtsu tsusumdung teipangpop dizie. Pa Egyptme rabedung kerecakidung ru dizie.’”
Bridge Connectivity Solutions Pvt. Ltd.