Jeremiah41
1Cipau kei hena bekei Nethaniah napei, Elishama capei Ishmael, Judah hegwangme kelak gade, nah hegwangpei Zedekiah kedime kangge, pecu mipei hangkerei ngngwa la, Ahikam napei Gedaliah da gwang, Mizpah ga. Penui Mizpah ga ngngwa matyei ncüt.2Dede Nethaniah napei Ishmael, nah pecu ngngwa kela mina hang kerei baude cuhlu nah Ahikam napei nah Shaphan capei Gedaliah de gwaketang, kingtie le. Ishmael Gedaliah de teitsetdi, Babylon gwangpei hangdeu reu kedibe tei kebeu be de.3Pecai Ishmael Judeame, Mizpah ga Gedaliah de ngngwa kelame leune de nah cika Babylonia reugwame de teitsetdi.4Pecai Gedaliah de teitset kedi tingba pekenabe petdi, dede migede ci luma.5Mipei kangge Shechem, Shiloh, nah Samaria namdung gade gwang, mipei riakheset ge penui tangkeimai tai kedime, penui paiheni tei hakti, nah penuikatei penuide tei rezam di, penui RAMPAUBE kerecaki ga mie kerane penui ba gage taktyei reca nah perim kehengui keubam.6Cine Nethaniah napei Ishmael penuide redau kerane Mizpah gade tet mpet, tet jüja nah hap jüja eh. Pa penuide redau luge, pa penui dage ranggai, “Ahikam napei Gedaliah da gwanglu!”7Penui namdi be ga gwang keludau, Nethaniah napei Ishmael penuide teitsetdi nah penuide makoiki gage kelien gai di, pecu nah pecu ngngwa kelamedung de.8Dede penui kakga mina hang kerei ge ring kebamme Ishmael dage, “Anuide teitset so, kedanemene luh ge ga anui gunia kebamdung de ncu peuzie: Wheat nah barley, maca nah heliadui.” Cine pa penuide nah penuide nzang kelame de teitsetdi ma.9Ishmael pa teitset kedime paaudung pelane Gedaliah de si eh tekwa gage kelien kegaide, Hegwangpei Asa pa Israel gwangpei Baasha dade kwak bamlu kerane kui kelu tekwa kedi ge. Nethaniah napei Ishmael cide ketsai paaudung le teipui di.10Pecai Ishmael Mizpah ga kebam mina kedadung leune de tuilu, hegwangpei napuidung nah Nebuzaradan kekwame reu kedibe Ahikam napei Gedaliah dage pwa peu kedi Mizpah ga bangh kenzeumedung leune de. Cine Nethaniah napei Ishmael penuide tuilu nah keda Jordan Reuki, Ammon deu lebie tetgai di.11Dede Kareah napei Johanan nah pecu nzang kela reugwame muibe leune Nethaniah napei Ishmael tei kedi kemau ha de siulu.12Cine penui penui mina leune de ngngwa lu nah Nethaniah napei Ishmael de gwaketang kera mie. Penui pecu rejaai kedi Gibeon gade ngaulu.13Pecai Ishmael de nzang kelame leune, Kareah napei Johanan de nah pecu nzang kela reugwame muibe leune de ngaulu ge, penui sui yisütdi.14Cine Mizpah gade Ishmael ne tui kelume nreu gwang eh Kareah napei Johanan da miedi.15Dede Nethaniah napei Ishmael mi hang heset de ngngwa lu eh Johanan dade pak tetti. Pa Ammon deudi ga miedi.16Kareah napei Johanan nah pecu nzang kela reugwame muibe leune Mizpah gade Nethaniah napei Ishmael dade kelilu kecume de ngngwa teu di. Aide Ahikam napei Gedaliah de Ishmael ne teitset kedicai. Johanan nah pe kangngwame mipei kengkiengme, reugwamedung, mipuidung nah henamedung, nah Gibeon gade ngngwa mpet kelu eunuchmedung de ngngwalu.17Pecai penui Bethlehem taiga Geruth Kimham ga mie nah tingkak nage ziemne cika bamdi. Penui Egypt ga mie lai eh bam18Babylonme ziemne. Penui Babylonme de hing bam kedanemene Ahikam napei Gedaliah de Nethaniah napei Ishmael ne teitset kedine, Babylon gwangpei, hangdeu reu kedibe tei kebeube de.
Bridge Connectivity Solutions Pvt. Ltd.