Jeremiah28
1Cipau kum, Judah gwangpei Zedekiah hegwang tei kerai dau, mmi mdai bekum nah kei mengei bekei, Azzur caihakecibe napei Hananiah, Gibeon nam gade kegwangbe, RAMPAUBE ki gade cingkumedung nah minadung pelane dwa gade pa a dage ainzwa rang,2“Tinggim reugwame reu RAMPAUBE, Israel Tinggwang, aide rangzeu: Babylon gwangpei ngwanggai kai kegai de Ih tei pang dida.3Mmi kena kakgage Ih RAMPAUBE ki niadung aipau gage keu cailigwang dai luzie, Babylon hegwangpei Nebuchadnezzar ne Jerusalem gade keu pwa Babylon ga punggwang kedidung de.4Pecai Ih Judah hegwangpei Jehoiakim napei Jehoiachin nah Judah gade tui kelu Babylon ga langgai kedi hebaangmedung de aika ge ngngwa gwang dai luzie, aide RAMPAUBE ne ndukegai, kedanemene Ih Babylon gwangpei ngwanggai de tei pang dizie lu.”5Cine caihakecibe Jeremiah, Hananiah caihakecibe de cingkumedung nah mina pelane RAMPAUBE ki ga sap kebamdung dwa gade resiu.6Caihakecibe Jeremiah ainzwa rang, “Peu RAMPAUBE de aide tei kelube teilu! Nang caihakecisam rang kegaidung peu RAMPAUBE de petau delie lulo nah heni aide gage RAMPAUBE ki gu maniadung nah tuiteu kedime pelane de Babylon gade keu gwang dai kelube teilo.7Dede Ih nnui dage nah mina pelane dage ndukegai sam de kingnei lulo.8Ndaa caihakecimedung n dwa ga nah a dwa ga kegwangmedung liede heleuhdung kekiee ge gu nah hegwangram kedidung, hereu, herakum nah mateeidung gu cairasam ranggwang da.9Cine caihakecibe kezuyi bam zie lie cairasam rang kegaide, magade pe sam gwang kesang lucai, ciucai pa caihakecibe RAMPAUBE ne langgai lie kecu ci luzie.”10Dede caihakecibe Hananiah ne caihakecibe Jeremiah ngwang gade ngwanggai de keulwe tei pangdi.11Pecai Hananiah mina pelane dwa gade, “RAMPAUBE ainzwa rangzeu: Aide siakte, mmi kena kakgage Babylon gwangpei Nebuchadnezzar ne ngwanggai kai kegai de Ih heleuh ngwangdung gade teipang dizie.” Pecai caihakecibe Jeremiah pe lampui ga tet gwangdi.12Caihakecibe Hananiah ne, Jeremiah caihakecibe ngwang gade ngwanggai de teipang kedicai, RAMPAUBE sam Jeremiah da ainzwa rang gwang,13“Hananiah de mie resiu eh rangbeu, ‘RAMPAUBE ainzwa rangzeu: Nang tsing gu ngwanggai teipang dida, dede Ih hegeu ngwanggai tei beuzie.’14Kedanemene Tinggim reugwame reu RAMPAUBE, Israel Tinggwang, aide rangzeu: Ih hegeu ngwanggai heleuhdung pelane ngwang gage kai beu dida, Babylon gwangpei Nebuchadnezzar gwa tei kerane, nah penui pe gwa tei zie. Ih pecu luhdung ga renaam kaunedung reu teu kera tei beu dida.”15Pecai caihakecibe Jeremiah ne, Hananiah caihakecibe dage rang, “Hananiah kingneilu! RAMPAUBE ncu langgai ma, dede nang nkatei mina aidungde de kenret nlum kera tei dida.16Cine RAMPAUBE ainzwa rang: Pielo, Ih ncu kideu gade lang mpetdi zieda. Nang hekum tsai zie, kedanemene nang RAMPAUBE de renia kera ndukegai ne.”17Cipau kum kei hena bekei, caihakecibe Hananiah tsaidi.
Bridge Connectivity Solutions Pvt. Ltd.