Jeremiah22
1Aide au RAMPAUBE ne rangzeu, “Judah gwangpei ki ga tet hung cu nah sam aide cikade ndugai.2Rang lo, ‘RAMPAUBE sam de kingneilu, nang David hegwangbam leu kelube Judah gwangpei, nang, nah nnui kang ga kedime, nah aipau hegwangki riekidung gade kegwang n minadung de peu kingnei lulo.3RAMPAUBE aide rangla, “Kemzeube tei nah kesamsangbe tei lulo, nah mine pecu cwa kelame keheibe de mide cwa kelame ba gade kelilu lo. Nnui deu gade sangme keheibe de tei keherei so, mede nggiana mede hemipui de de. Zaisiet tah teiso mede heni aikade pe mau kegahme de teitset so.4Nnui ma aidungde samsang eh tei lucai, David hegwangbam ga kebam gwangpeidung aipau ki ga riekidung gade bagi ge teu delwe hekündung teulwe nlüt zie, pa, pekang kedime, nah pe minadung nlüt zie!5Aide RAMPAUBE ne ndugai—dede magade nang Ih rang ndu kegai aipau samdung de kingnei tadi cai, aipau hegwang ki de au kau eh kap dizie.”’ 6Kedanemene RAMPAUBE ne aide Judah gwangpei ki ziemne rangzeu, ‘Nang au Gilead deu nzwa, mede a ziemne au Lebanon lamlwatwang nzwa. Iciu de Ih ncu hetaideu ge nzwa tei dizie, namdidung ga minadung lungh kemak nzwa.7Kedanemene nnuide ngkapdi kera minadung Ih langgai zie. Penui pelane penui reunetdung teugwang eh ngu cedar yitubedung de bi gidi zie nah cidungde mi gage kelien gai dizie.8Pecai mina heleuhdung kekiee ge aipau namdi de kah gwang zie. Hangge ge kecu peciabe de rang eh, “Dai ziemne RAMPAUBE aipau namdi kedi de dage aiciu tei di no?”9Ge kedame samli peu eh, “Kedanemene penui RAMPAUBE penui Tinggwang kesamkak de gidi nah keda rabedung dage keumie nah cidungde de reca kedine.”10Judah ga minadung, hegwangpei Josiah ziemne hap so; petsit hei eh hap so, dede pe napei Joahaz ziemne hei eh hap sütlu, kedanemene pa au madau gede cailigwang dai lak nah pecu mna kelu deu de madau de ngau dai lakta.’11Kedanemene RAMPAUBE Judah gwangpei Josiah napei Shallum ziemne aide rang, pe pei Josiah be mene pabe hegwang keteibe, ‘Pa au aipau bam gade tet dida nah gwang dai lak ta.12Pa au cika penui ne pecu langgi kedi deu gade tsai dizie, nah pa au madaude aipau deu de ngau dai lakta.’13Ainie kesamsang kemak gade peki tei kelube , nreule peki bungdung mzeu kemakpe le keteibe, pe kidabe de peu pe ziemne mta makam keteibe, nah pa pecu ma ketei ziedung de ha la kemakbe;14pa rang eh, ‘Ih au akatei a ziemne nreule kibungdung heni bam süt kecu ki ge tei zie.’ Cine pa cide ziemne kebaki kedi ge dang mpetlu, nah pa cide cedar le pwa teilu, nah pa cide püt gie lu.15Aide de ne ncu hegwang yi kecu ge tei lu ni, nang cedar kwakdung lu neu kedi dene? N pei Josiah tyei nah sak meni, ciuliede kemzeube nah kesamsangbe tei meni? Ge pe ziemne ma petau tei eh gwangdi.16Aide RAMPAUBE ne ndugai—pa kegahme nah teumai kesiame tutiak mzui beula. Ge cide au yi. Ainzwa tei kecude pekie acu ci kecude de meni?17Dede nang au samsang kemak gie nkatei n ziemne peeila nah nang maukemakme de teitsetla, n zai sia kecu nah mi kedamedung de tei keherei rünsangne.18Ciziemne RAMPAUBE aide Judah gwangpei, Josiah napei Jehoiakim ziemne ma aide rang: penui au pe ziemne hap lak, rang eh, ‘Ainie, a sinabe pei!’ Mede ‘Ainie, a sinabe poi!’ Penui au pe ziemne hap lak, ‘Ainie, a mpaubo!’ Mede ‘Ainie, a hegwangpei!’19Pa tsai kedi dau pecu gadha nzwa kung dizie, teu kerei tet zie nah Jerusalem kiriedung mzu pet kelien gai dizie.20Jerusalem ga minadung, Lebanon lamlwadung ga nghang cu nah sah lo. Bashan cuikui gade sah gailo. Abarim lamlwatudung gade sah gai lo, Kedanemene nzang medung pelane de tei ngkap dizie.21Nang kwak eh kebam dau Ih n dage marang gai, dede nang rang eh, ‘Ih kingnei lak.’ Aide au n hena ne gade tei kelabe da, kedanemene nang a kwa kingnei meda.22N meurün kekwamedung de tingkai ne guipung tet dizie, nah nzang medung de tuiteu tet dizie. Pecai nang ngngam dizie nah n tahdung kesia pelane dene hengam tei dizie.23Nang ‘Lebanon’ ga kelunghbe, cedar le teikelu ki ga lungh kebambe, n da keteei gwang keludau ncu dai kenzwa gede ngaunggia zie no, mipui mna tedteei kecu nzwa!”24Aide RAMPAUBE ne ndugai—Ih ring kebam nzwa, magade Judah gwangpei, Jehoiakim napei Jehoiachin, nang a ba zetle ga kaugiak ge liede, Ih ncu tei takcai dizie.25Kedanemene ncu teitset kera peei kelamedung ba gage Ih ncu kaibeu dida nah nang ndaa hing kelamedung ba gage, Babylon gwangpei Nebuchadnezzar nah Chaldeamedung ba gage de.26Ih ncu nah ncu mna kebeube pui de keda deu, ncu mna kemak deu ge gage kelien gai dizie, nah cikade nang tsai zie.27Penui cailigwang neu kebam aipau deu de, penui aika caili gwang dai lak.28Aipau de migede luu neu ta kedi nah pang kedi li ge di deni? Jehoiachin aipau peide migede de pe suiyi teilu ta kedi li ge di deni? Dai ziemne penui pecu nah pe leuhmedung de kelien gidi bi, nah penuide penui ci kemak deu gage kai gai dibi?29Hangdeu, hangdeu, hangdeu! RAMPAUBE sam kingnei lulo!30RAMPAUBE aide rangzeu, ‘Jehoiachin aipau pei ha rau gailo: Pa au pe name lungh lak. Pe teilung tingdau lungh yi gailak, nah pe leuhmedung gade migede lungh yi gailak mede David hegwangbam ga bam dai gailak nah Judah reu hegwang tei dailak.’”
Bridge Connectivity Solutions Pvt. Ltd.