Jeremiah15
1Cipaucai RAMPAUBE a dage rangdi, “Moses mede Samuel a dwaga sapbam liede, Ih mina aidungde dage ngaugia pwalia si lakta. Judahme de a dwade langgi dilo, peu penuide tetdi kerane.2Iciude penui n dage rang zie, ‘Anai daiga mielai?’ Iciude nang penui dage rang maisia, ‘RAMPAUBE aide rangla: Tsai kerame ziemne ketsai da mie maisia; kingtie ziemne kecume kingtie da mie maisia. Herakum ziemne kecume herakum da mie maisia; nah hebaang tei kerame hebaang ketei ga mie maisia.’3Kedanemene Ih penuide zi mdai teigai zie—aide RAMPAUBE ne ndugai—kingtie kangge de teitset kera, heteudung kangge de gwagi kera, tingkam ruinedung nah kideu teikuudung kangge de tyei lu nah ngkapdi kera.4Ih kideu ga hegwangram leune dage kehing ge teigai zie kedanemene Judah gwangpei, Hezekiah napei Manasseh, Jerusalem dage tei kegaide ziemne.5Kedanemene caune ncu nggia zieno, Jerusalem? Cau n ziemne helungsia laino?6Nang acu nsungta dida—aide RAMPAUBE ne ndugai—nang a dade caili dida. Cine Ih a bale ncu tei zie nah ngkap dizie. Ih ncu ngaunggia kecude leu dida.7Cine hangdeube namdi rieki gade Ih tsingdap le penuide keuntsam dizie. Ih peu penui suisia bam dizie. Ih a minadung de ngkap dizie, penui penui lampui gade cailigwang dai melu.8Ih penui hemipuidung de jaaidi kungga heciang swa kiee eh teigai zie. Rehangme puidung de renia eh kengkap be tingnari dau langgai zie. Ih zette eh kekeheu nah kehing penui reu gage kai zie.9Mipui pena hang hena kebam de sia eh mnei dizie. Pecu keheu dizie. Tingkeba dau de pe tingnaimiak nlüt dizie. Pa ngngam nah hengam pung dizie, kedanemene bang kelume de penui ngauraume kebam gade Ih kingtie dage peu dizie— aide RAMPAUBE ne ndugai.”10A pui a dage suisiet! Kedanemene nang acu mnalu. Ih hangdeube ga mide renia nah kesamlim kelame ge. Ih migede de releu beu ma mede migede a dade releu ma dede penui pelane acu reset.11RAMPAUBE rangla: “Keyibe ziemne Ih ncu kelilu lakni? Ih n ngauraume de peu kengha kie kera teibi zie kengkap nah keherei tingdau.12Mige hegeu zum lubui ni? Bamkapde hegeu tingpeule de hetageu ncüt kelube?13Ih n ngauraume de n mahei nah n mabam peu mta sütteu dizie. Ih aide tei zie kedanemene n mau leune ngu herai leune gade tei kedi de ziemne.14Iciu eh Ih nnuide peu cikemakme deu ga nnui ngauraume gwa teizie, kedanemene mi ge heu cuh zie, cide a lunghop gade ncu mmau eh mi twa cuh kegai.” 15RAMPAUBO, nang cibam! Acu nsung eh acu nghalo. Acu mneu kelame de renia eh hekum a ziemne teugwang beulo. Nang au nlung tie, dede penuide peu acu ngngwa tet diso; Ih n zi ziemne keherei eh ngngam kecu ci lulo.16N samdung ngaulu, nah Ih cidungde luulu da. N samdung a dade a suiyi ge nah a mlung suiyi ge, kedanemene Ih n zi de teula, RAMPAUBO, reugwame reu Tinggwang.17Ih hengyi renga kebamme kakga bam ma. Ih akatei rünne bam kedanemene n kengkieng ba de ziemne nang acu rata le peu puibam.18Daitei acu peu teei jüja bamno nah a zam yi gailak dino, daitei cidungde ngkeilu meno? Nang a dade kecwa duidung nzwa zieni, cangdi kela duidung?19Cine RAMPAUBE aide keligai, “Jeremiah, nang n mau pet lucai, Ih ncu teu cailigwang beuzie nah nang a dwaga sap eh a gwa tei zie. Magade nang pemi kehungdung gade kemiedung teuntsam lucai, nang a samgwame ge nzwa zie. Minadung n da cailigwang zie, dede nang penui da caili mielak.20Mina aidungde dade Ih ncu teipwa hetageu tangdeu kuitiep lula kemakpe nzwa teibeu zie, nah penui ncu renia eh hereu tei zie. Dede penui ncu ngam gailak, kedanemene Ih ncu kelilu kera ngngwa la—aide RAMPAUBE ne ndugai—21kedanemene kesiame ba gade Ih ncu kelilu zie nah zaisietme ba gade ncu ri luzie.”
Bridge Connectivity Solutions Pvt. Ltd.