Jeremiah10
1Israelmedung, “RAMPAUBE nnui dage sam reci kegaide kingnei lulo.2RAMPAUBE aide rangla, ‘Heleuh kedabe lampuidung pwa so, nah tingkam ga ma rehidung de ziemne nnui lung keherei so, heleuh kedabedung au aidungde ziemne penui swagah la liede.3Kedanemene cipaume renet zaidung au pe kemmi gah. Penui tsingbang ge renaamkang gade bi ngkaulwe cide tsing rui kelabe ne ruilu.4Pecai penui cide kecak nah rangkanggeu le tei hezuyilu. Penui peu kaudi kelakne hegeuteisang nah gojal le gialu.5Penui bale teikelu cidungde au reciedung tanggaine luh ga kebam nzwa da, kedanemene cidungde au marang gailak, nah teupung mie maisia kedanemene penui tetgai kelakne. Cidungde de hingso, kedanemene penui makesia teugwang gailak lu, mede cidungde makeyi kette tei gailak.’”6RAMPAUBO migede nang kenzwa ga. Nang au di, nah n zi au di nah ngkieng lie.7Cau ncu hing meno, heleuhdung gwangpei? Nang aide ngaubui siak, kedanemene heleuhdung ga macitumedung pelane kakga mede hegwangramdung pelane ga migede nang kenzwa gah.8Penui pelane nzwakap, penui maang nah mie, penui tsing le teikelu mamie reca la.9Penui Tarshish gade rangkanggeu kedeu kelu, nah Uphaz gade bata tei kecime nah hegeu ta keteime ne teikelu kecak teugwangbeu, Penui paidung au gieremang nah nzai. Ma aidungde pelane matei kecime ne tei ciau.10Dede RAMPAUBE au Tinggwang kesangbe. Pa ringkela Tinggwang nah kelungta hegwangbe. Pe rata kegai dau kideu mlai dila, nah heleuhdung pe rata lia gailak.11Nang penuide ainzwa rang zie, “Rabedung ting nah kideu tei kemakbedung kideu aika nah tinggimdung kang gade de gah dizie.”12Dede Tinggwang pe kengkieng le hangdeu teilu, nah pe macile kideu teilu, nah pe kecikecet le tinggimdung tei mdi lu.13Pekwa au tinggim dungga dui kenra tei, nah pa kideu penli gade mwangrimdung keu ncuhlu. Pa tingrui ziemne tingkehepik de teigai nah tingkai de pe mabung gade lungmpet beula.14Mina pelane maang dida, nah maci bam meda. Hegeule matei kelame de pa teikelu mamiedung ne tei ngngam dila, kedanemene pa teikelu miedung de au kenret; cidung ga kering gah.15Mamiedung de au kemta, mide rangmsia kelame ta; hetu ketiak benai penuide ngkap dizie.16Dede Tinggwang, Jacob mpaube, au mamie cidungde nzwa ma, kedanemene pa ne ma pelane damgai. Israelme au pe mapwame, pe zi au Reugwame reu RAMPAUBE.17Nnuide mine twagwa kedi ga lungh kebammedung, nnui niadung keu hekwalu, delwe hangdeu gade tet dilu.18Kedanemene RAMPAUBE aide rangla, “Pielo, Ih cupia au hangdeu aika kelunghme de kelien gidi lai bam dida. Ih penuide peu keherei zie, nah penui cide cilu zie.”19Ainie suisiet ada bam dida! Kedanemene a radung pang nah a zam de siaki kedine. Cine Ih ranggai, “Aide au rei kesang, dede Ih lialu bi maisia.”20A paiki tei ngkau dida, nah paiki riadung pelane tüt dida. Penui a name de a dade ngngwa tet dida, cine penui lungh bamsi meda. Migede a paiki kam kera mede teucuh beu kera gah da.21Kedanemene meurün kekwame au maang nah penui RAMPAUBE de peei lama; cine penui lungh kiee luma, nah penui kauhau pelane zangra la dida.22Samci ge gwang lada, “Pielo! Cide gwang lada, nnui disüt kecuge tingtün lebie de gwang lada Judah namdidung tei msiadi nah maiserung mbai bamdung teidi kerane.”23RAMPAUBO, migede pekatei pe teilung mpaube kemak Ih ci. Migede pekatei pe puisau tei lama.24RAMPAUBO, kemzuibe teu eh acu ledeu beulo, dede n rata gade so mecai nang acu tei msiadi zielu.25Ncu ci kemakme heleuhdung nah n zi qugai kemakmedung dage n rata rui gailo. Kedanemene penui Jacob de mnwa nah tyei luda ciu eh penui pecu ngkap cangsiak dida, delwe pe namdung teimsia dida.
Bridge Connectivity Solutions Pvt. Ltd.