Isaiah63
1Edom deudi gade gwang kelabe de cau no, Bozrah namdi gade paigie le cum teu kelabede?Hegwangme paini teu kelabe de cau no, pe kengking kedi ziemne ci eh tetgwang kelabe?Cide Ih, kesangsam rang nah ngkieng süt eh kelilu kebui kebam.2N paini daitei gie no, nah daitei cidungde nang kubetsi zauniakbam ga heta tei bam kecu nzwa ngau no?3Ih zauniakbam gade kubetsi a katei dau da, nah heleuhdung gade migede acu ncüt ma.Ih a rata le penuide dau nah a rata süt eh dau di.Penui jai ne a painidung lwa di nah a painidung pelane keniak di. 4Ci ziemne Ih hekum peei kera tingba kwa bam, nah a kelikelu tingkum de gwang bam dida.5Ih pie gai, dede migede ngha kera gah. Migede ngha kera kegah ne a swagah di,dede akatei a ba le acu kengking peu, nah a ratasüt kegai de ne acu kecung lu.6Ih a rata le heleuhdung de dau nah penuide a rata de sakmie gai,nah Ih penui jai kideu gade rui gai.7Ih RAMPAUBE lungsang samkak tadung de rang zie, RAMPAUBE de twalu kebui tadung de.RAMPAUBE anui ziemne tei kegai leune rang zie, nah Israel kilung dage pe keyi kedi de.Pe ngaugia aide anui dage lia kegai de pe kehung ziemne lie, nah lungsang eh samkak kelu tadung kekiee ge ziemne lie.8Kedanemene RAMPAUBE rang, “Penui au a mina kesang, cwadi la kemak nadung.”Pa penui Kelikelube dida.9Penui rei leune gade,pa de keherei gai beu, nah tinggim samgwame pe dwa gade penui de keli beu da.Pe keku nah ngaugia gade pa penuide keli beu da,nah pa penui de pwacuh beu nah ndaa tingdau leune ga penuide ngngwa jüja la.10Dede penui pecu renia nah pe Kemci Rabe suisiet tei di.Cine pa penuide ngauraube tei di nah penui de nggwa keregi. 11Pe mina ndaa Moses tingdau ha nsung di.Penui rang, “Tinggwang dai ga bam no, meurün kekwabe pe meurün hau de jaaidi gade teu mpet kelube de.Tinggwang dai ga bam no, pe Kemci rabe penui kak gage kai kebeube de?12Tinggwang daiga bam no, pe kengkieng kendu de peu Moses zetle ba ga la kecube de,nah penui dwaga jaaidi dui de mzi kegai, kelungta pekatei pe ziemne pe zi tei ndu kerane?13Tinggwang dai ga bam no, dui kecok gade penui de teu mpet kebeu be de? Hekwen hangdeu kam ga pak kela nzwa, penuide nrap dima.14Hetum langkam ga kehung nzwa, RAMPAUBE rabe penui de kemtak peu.Cine, nang n minadung de teuswa, n katei n zi ketwa tei lu kerane.15RAMPAUBO, tinggim gade pie nghung nah n kemci nah kemdu kelungh ni gade cilu.Dai ga n lungring teikeneu nah n ta kedi bam no?N ngaugia tadung anui dade keu mzia dida.16Nang anui pei kecu ziemne,Abraham anui de cime lie de, nah Israel anuide cilu me lie de,nang, RAMPAUBO, au anui pei. ‘Anuide Rikelube’ au ndaa de n zi delie.17RAMPAUBO, daitei nang anuide peu n lampuidung gade tet mdeila no nah anui lung tei hungdi no, ciu eh anui n samzai tei lu ta di no?N kilabedung zi gade cailigwang gai lo, n mapwame leuh ge.18N minadung n Kemci ni ting kedui na ge ziemne teula, dede anui ngauraume n kerecaki daudi. 19Anui au nang madaude mige reu kedi kemakmedung de nzwa dida, madau de n mina qu lu kemakme nzwa.”
Bridge Connectivity Solutions Pvt. Ltd.