Isaiah5
1A kube ziemne peu acu lei teilo, a kube gu pe kubeluh ha lei ge.A kube kideutu malung yisüt kecu ga kubeluh ge bamla.2Pa cide pulu, tangtsudung pwa gidi, nah kubebang leuh yitube linglu.Pa luh sum gage reketbam ge kwa cuhlu, nah kubetsi tui kera bam ge tei silu.Pa kubetsi bui beu kera kwabam, dede cide renaam gu rünne petsi buidi.3Cine cu, Jerusalem ga kelunghme nah Judah minadung,acu nah agu kubeluh kakga mcet gailo.4Agu kubeluh ziemne Ih tei kemakbe daipai teisi lu kera bam reuno?Ih kubetsi cide bui beu kera pie kebam dau, daitei cide renaam kubetsidung bui dino?5Cu Ih n dage ranglia zie Ih daipai a kubetsi luh dage teigai zie bi: Ih hetu ziu keugi dizie,Ih cide tsehei ziu gage tei dizie, Ih perie teipang mie dizie, nah cide cai kedim dizie.6Ih heira cika ge ling gaizie, nah cide peu bui mede puh de lak. Meliene, hetupui nah hetudung le gum ham dizie.Ih hemwadung dage aja kai eh peu cika ge tingrui gaita dizie.7Reugwame reu RAMPAUBE kubeluh au Israel kilungme de kecu ziemnenah Judah minadung au pebang ling kelu pesuikeyi ge;pa kesangbe de kwa, dede cika kedaptset bamdi; kesamsang de kwa, dede, kengha ziemne sah di.8Ainie, kige gade kige, luh ge gade luh ge tamtok kelame,kibung bamsi tadi kemaktane, nah nnui rünne kideu ga bang nzeudi kemaktane!9Reugwame reu RAMPAUBE a dage rang eh,ki kekieege mrwa dizie, kikedi nah hezukeyidung kecangde, kelunghme gede gah dizie.10Kubeluh ngwanggai kerei gade bath ket rünne tei luzie, nah homer tsileuh ket gade ephah ket rünne tei luzie.11Co tingcang nuge culwe zau kengking sak ndeu kelamedung,nah tingmui zaune penuide tei nsia cang siakdi kemaktane bam tie kelamedung.12Penui taktyei ngyi ga harp, lute, tambourine, terwaine nah zau teu la,dede penui RAMPAUBE bata cila ma, mede penui pe batadung pie swa la ma.13Ciziemne a minadung kecikecet kegah ziemne mibaang tei tetdi;penui kenlang muiteume nzeu ladi, nah penui minadung sak kera magede gah.14Ciziemne Sheol pe taktyei tei mzaha lu nah pemui ngnga mdi süt luda;penui yitume, mina maadibe, penui muiteume nah pesui kerengame nah penui kakga pe suiyi kebammedung Sheol ga nghung dizie.15Mina telailai peu keukei mie zie, nah mina leune de henah miezie; kengang miakpieme de kelien mie dizie.16Reugwame reu RAMPAUBE pekesang gade hetwapung zie nah Tinggwang kemcibe pe masang gade pekatei kemci mide liazie.17Iciu eh meuründung penui katei penui gu cehei nzwa tyei zie, nah namdi kau kedidung ga, meurünnadung sangme nzwa cehei peeityei zie.18Co kemta riadung pwa kemau teugai kela medung nah cide bagi ria kenzwa pwa kemau teu pung kelame.19Co ainzwa rang kelame, “Peu Tinggwang de kelwalu, peu pecu bata tei mzet lu, ciciu eh cide tei kecu anui ngaulu bui;nah peu Israel Kemcibe lungcet de gwanglo, ciciu de anui cidungde cilu zielu.”20Co kesiabe de yilie kelame, keyibe de kesiabe lie;kemuibe de kebaabe mding nzwa kelame, nah kebaabe de kemuibe nzwa;kekaa de kekum mding nzwa, nah kekum de kekaa nzwa!21Co pekatei pe miakngau gade maci lie kelame, nah pekatei pe bata kecet de mriak lie kela!22Co zau kesak gade kenlangmedung, nah zau kengking hai ncüt citumedung;23hetauhenim kepeu ziemne kenlienme de mmaula kemakme, nah kemzuime de penui mzeudung peu ngaula kemakme!24Ciziemne mi mleu au mile reigau ru nggah dila kecu nzwa, nah cehei ki kedibe miheu ga gwang di kela nzwa,ciciu eh penui mahdung tim dizie, nah penui padung rebui nzwa guipung tet dizie.Kedanemene ainzwa pet kedi penui reugwame reu RAMPAUBE zai mlai kedine, nah kedanemene penui Israel Kemcibe samde ngkau kedine.25Ciziemne RAMPAUBE rata minadung de mmau eh heucuh di. Pa peba hetwa mpet penuide mmau nah penuide saja peu.Lamlwatudung mlaidi, nah penui ketsaipaaudung puidikidung ga kehera nzwa zeudi.Ma aidung pelane gade, pe rata au penli dima, meliene, peba au cude hwa mpet pwa bam.26Pa heleuhdung kemdeime ziemne pailim pwacuh lia gai nah kideu penli ga kebamme ziemne makwa nza gai zie.Pielo, penui mzet süt eh nah kelwa gwanglu zie.27Penui kakgade migede leudi mede kau dima; mige de ziangmui mede zipma.Mede penui kiakangdung de mza dima, mede penui picum riadung de cakdi ma.28Penui lakpitsidung au nzau nah penui lakpidung au teugung luda;penui kwendung nginglwakdung au tangtsu nzwa, nah penui bagidung pita au kaiguidung nzwa.29Penui mra hingho ge nzwa zie, penui hinghonadung nzwa mra zie.Penui mrung nah pecit gade tuilu eh teu tet di, mige de keli gai lak di.30Cipau tingba benai jaaidi kwa keci nzwa giteu kedime de mmau eh mra zie.Magade keheibede kideureu pie gai cai, pa kemui nah lungrei ngau zie; hemwadung ne kebaa de teimui dizie.
Bridge Connectivity Solutions Pvt. Ltd.