Isaiah47
1RAMPAUBE rangzeu, “Nghunglu nah rebui ga bamlu, kemci Babylon napui;hegwangbam si mene hangdeu ga bamlu, Chaldeme napui.Ncu nciep nah mnwa de qu si lakta.2Keniaktsukang keulu nah tokkui niaklu; n peuzui radi,n pai lim kebam de radi, n pi ba kela pai de radi, hereukidung kahpetlu.3Nang paula kecu ngau dizie, yeo, n ngngam de ngau dizie:Ih hekum peei zie nah migede de gi dilak.4Anuide kelikelube, reugwame reu RAMPAUBE de pe zi da, Israel Kemci Tinggwang.5Zingde bamlu nah kemui ga miecu, Chaldeame napui;kedanemene ncu au hegwangram gwangpui de eh qu si lakta.6Ih a minadung de a rata di; Ih a mapwa de tei hera dinah n ba gage kaidi, dede nang penuide ngaunggia beuma;nang hepwet kerüt ge hecingmedung reu gage kai.7Nang ranggai, “Ih kelunghta kengkieng gwanpui teila zie.”Nang aidungde cet ncok cang ma, mede aidungde dainzwa dizie bi kecude cet ma.8Cine aide siulu, nang pumteih lungning nsui kelabe nah kwak eh bam kelabe;nang n mlung ga aide rang kelabe, “Ih lungh bam, nah Ih nzwa migede gah;Ih madauge de hemipui ge nzwa bam lak, mede Ih a namedung gah dilak.” 9Dede ai kena de n dage kak nage gage tingnaige gade gwang dizie:hename ketsai nah hemipui ketei; n dage aide gwang zette dizie,n kereka ciemdung nah kehemeu kelu nah kesia ngngamlu kera hetania bam liede. 10Nang n kesia de de nlum; nang ranggai, “Migede acu ngau ma”;n maci nah macet de ne ncu ngngwa n lampui pwa mau di,dede nang nlung gade rangla, “Ih lungh bam, nah Ih nzwa migede gah.”11Kekap n reuga gwang zie; nang cide n kereka ciemdung le gwa gidi gailak.N reu ga kekap gwang zie; nang cide keu gidi gailak.Kekap n da gwang zette zie, nang cimezing kebam dau. 12N reka kekiee nah hekuhei kaikela de tei jüja lunang n henane gade cide samsang eh pei kelade;nang ngking luzie, nang kekap de keu kezia di luzie.13N keledeu sam kekiee ge ne ncu tei leu dida; peu mina cidungde de cuhlunah ncu kelibeu, tinggim cuikui sau tsamlu kelame nah hegidung pie kelame,keici rang ndu kelame, peu penuide n dage tei lai eh kebam de gade keli beulu.14Pielo, penui au reigau tiedung nzwa dizie. Mi ge ne cidungde ru dizie.Penui katei penuide mi gade kelilak.Penuide tei lum kera miceudung gah nah mi taiga bam kera mide gah dizie!15Penui n dade ainzwa dida,nang nzang hetah tei kegwangme,nah n henane gade penuide de ngngwa helila keteime,penui penui katei penui lampui le miedi;ncu kelilu kera migede gah da.”
Bridge Connectivity Solutions Pvt. Ltd.