Isaiah22
1Marengei Langkam ha ndu ge.Daipai kie ziemne nnui pelane ki reu ga nghang cio dino?2Iciu eh nang namdi ga mina suiyi kwa le puih kebam kwa siulu kera ziemne ni?N minadung kingtie gade tsaima, nah penui hereu gade tsaima.3Nnui reu kedihme pelane pakdi, dede lakpitsi gede kapgai mene penuide tuihlu.Penui kemdei pak mie dide, Penui pelane de tuih ncütlu.4Ciziemne Ih rangdi, “Acu pie helo, I hapsüt di zielu;a leuhme napuime de tei msia kedine acu kemak kera tei helo.”5Cika tingbazie ge bam makwa kehebwak ge, lungrei nah hengngam ge reugwame reu RAMPAUBE Tinggwang ne aide langgai,Mangdak Langkam ga, namdi be kiriedung kaudi zeu dida, nah minadung lamlwadung gage sah mra gaizie.6Elam lakpitsibung keupung lu, hekwen bagi tet kelame nah hekwen reu cwa kelame de ngngwalu,nah Kir namdi hegeu de gum ma.7Peting gwang zie nnui suitube langkam dunggahekwen bagidung puih dizie, nah hekwen (cwa) kepung kelame herieki ga penui saplu zie.8Pa Judah de kegum dungde keugi di,nah nnui cipaunai Hegung Hegwangbam ga hereunetdung de piegai.9Nnui David namdi de, kekiee ge tiep kebam ngau,nah tekwa ngkangbe gade nnui dui hekwalu.10Nnui Jerusalem ga kidung peilu, nah nnui herie hekwa kerane kidung rah di.11Kirie kena kakgage tekwa kehegwabe dui kai nzeulu kerane tekwa teilu.Dede nnui namdi tei kera cet kebeube de cetgai ma, pa ndaa de cetpwa ladi da.12Reugwame reu RAMPAUBE Tinggwang cipaunai qugaihap kerane, heilu kerane, peu taidi kerane nah rosopai ba kerane.13Dede pielu, cinzwa meliene, henui tei, hengyi,hetum, nah meurün teitsetlwe langtyei, nah zausak; anui tyeisak lugo, kedanemene ncünne anui tsaidi zielu.14Aide a kwen gage reugwame reu RAMPAUBE ne ranglia,“Aipau mau de au gibeu gailak, nang tsai kecu dau de,” Reugwame reu RAMPAUBE Tinggwang ranggai.15Reugwame reu RAMPAUBE Tinggwang, aide rang, “Shebna, hegwangki pie kerengeibe dage mie ranglo,16‘Nang aika daitei zeuno nah caune ncu n rau bungh lulo beu no,kecehu ga herau su eh nah tangtsu ga kemtak ni ge bungh eh?’”17Pielo, Tinggwang ncu kelien gidi zieda, kengking mina; pa ncu herak ntiprip lwe kelien (heling) ngkei zie da.18Pa ncu teu kerui rui eh nsuiduikang ge nzwa deudi langkie gage kelien gai dizie.Cikade nang tsaidi zie, nah ngu kemdu hekwen bagidung de cika bam zie; nang n mpaube kelak de de tei hengam zie!19“Ih n diki gade nah n bam kehu gade. Ncu teu ngkau dizie.20Cide nai gwang sangne Ih a kilabe Hilkiah napei Eliakim de qugai zie.21Ih n kedi paini pecu kaibeu zie nah n kiakang pecu peuzie, nah n kengking kebam pecu peu dizie.Pa Jerusalem ga kelungme pei tei zie nah Judahme ki gade si eh.22Ih David ki cabi pe hekeutu gage kai dizie;pa ne ngkei zie, nah migede ngkui gailak; pa ne ngkui zie, nah migede ngkei gailak.23Ih pecu kang ntiprip dizie, kegwak ge pe bamga ntiprip eh bam kelanzwa,nah pa au pe pei kiga hetwa kepung bamge dizie.24Penui pe pei kiga hetwa kepung leune pecu mpüt beuzie, hename nah heleuhdung, mabung keceu leuduipiak gade hepiak kedi cang.25
Cipau nai, aide reugwame reu RAMPAUBE ne ndu kegai, magwak ntiprip eh kebam de sia dizie, kau dizie, nah cika hepüt kerüt kebam de kau dizie, kedanemene RAMPAUBE rang kebeune.
Cipau nai, aide reugwame reu RAMPAUBE ne ndu kegai, magwak ntiprip eh kebam de sia dizie, kau dizie, nah cika hepüt kerüt kebam de kau dizie, kedanemene RAMPAUBE rang kebeune.
Bridge Connectivity Solutions Pvt. Ltd.