Hosea7
1Ih Israel de teingkei beu neu kedi dau, Ephraim mau ngaupet dila, Samaria kemau batadung de, penui mide kecwata tei kecune; penui hangge ge dade sütla, nah puidi ga sütketyeime ketang lüt la.2Penui penui mlung gade cilu lama Ih penui kemau tadung pelane nsungla lie kecude. Cu au penui tadung penuide twagwa luda; cidungde a miakdwa gala.3Penui penui kemau le penui gwangpei suiyi tei lula, nah penui kenretle penui reu kedime de.4Penui au pelane kemmhata keteime, tangku kerube ne mimang teilum kelube nzwa, tokkui kenet kecu gade cide ngaupetlu kemakta misum ketum sita kedi nzwa.5Hegwangpei tingba benai kedimedung zau cuile penuide teimnei dila. Pa mide cwa kecume de pe ba ketwapet gai beula.6Mimang kenzwa mlungdung punglwe, penui mide kecwa ciem riem lula. Penui rata au tingmui ziu pelane lum bamla; tingcang cide miheu nzwa ru lumsüt bamla.7Penui pelane mimang nzwa lum bamla, nah penui reu kedime de tuityei lula. Penui gwangpeidung pelane kau dida, penui mige de acu qu lama.8Ephraim minadung kakga ncüt lala. Ephraim au tangku kengpiak ge keu kedetgai kemakbe nzwa lie.9Sangme ne pe kengkieng tuityei luda, dede pa cide ci lama, peupu tamdung pe reuga la, dede pa cide ci lama.10Israel ngangkela de pe zierang tei eh mmaula; iciude, penui au penui Tinggwang RAMPAUBE da cailigwang lama, mede penui pecu de peei lama, ma aidung pelane teigwang liede.11Ephraim au tamhau ge nzwa da, mie nah pe kecet bam ma. Keraibe Egypt de qu gai, pecai kengha kie kerane Assyria gage lim gai dila.12Penui kemie dau, Ih penui reu gage a helang samgai zie, Ih penuide tingkam ruine de nzwa tei cak kei dizie. Ih penuide saja peu zie penui hemaa tei eh lim keladau.13Ainie penui au! Penui a dade mdeila dida, kengkap penui da gwangla dida! Penui acu mlai dida! Ih penuide kelilu bui nage, dede penui a dage kemret dida.14Penui mlung pelane teu eh ada hap gai ma, dede penui au penui zeudung gade hap bam. Penui meiciu nah zauci hekwa luda, nah penui a dade nreu dida.15Ih penuide ledeu beu nah penui ba teingkieng beu liede, penui cu acu mmau eh heciem riem bam dida.16Penui cailigwang, dede penui ada cailigwang ma, Hutube Tinggwang da. Penui au lakpi ntip kemakbe nzwa da. Penui reu kedime kiengtie gade kau dizie Penui mui kesia ziemne. Penui au Egypt deu ga mi nuineu tei zie.
Bridge Connectivity Solutions Pvt. Ltd.