Hebrewme8
1Cu anui rangkebam kiede aide da: Anuida cingkupei kedibe ge bam, Tinggim ga kengkieng hegwangbam zetle bie kebambe.2Mina ne mene Rampaube ne tei kelu kemci ni, paiki kesangbe de ga pa kilame ge tei bam.3Cingku kedibe keheibe de mapeudung nah ratakdung reca beu kerane kedet pwabam. Ciziemne aipaude liede pa mapeu peulu kera mage au bam maisiabi.4Khrista kideu ga bamcai, pa au cingkume ge daulak zing, kedanemene hezaibe de mzui eh mapeudung pwa kepeume cika bamlu.5Penui au tinggim keracaki rehi nah cide mie kenzwa ge ta tei. Moses paiki teicuh lai eh kebam dau, Tinggwang pecu rangmriak gai, “Pie lulo, lamlwa gade ncu keulia kecu de nzwa eh ma keheibe de tei lu maisia.”6Dede cu au Jisu heta yigwa kecuge ngau luda, sampet yiki kecu gage bangdwa teikelu, pa samkak yiki kecu ga hekak ketetbe kecu nzwa.7Kedanemene samkakkelu keraibe ga kemau gah liecai, samkakkelu pe kenabe bam mede yilu bui.8Tinggwang penui mau ngau keludau, pa rangdi, “Ainie, Rampaube rangla, Ih Israel kilungme nah Judah kilungme de ngngwa samkak keheci ge tei keratingbaziedung gwang lada.9Ih penui ba teu delwepenuide Egyptme deu gade ngngwa mpet kelu benaipenui paume de Ih ngngwa samkak tei kelu de nzwa lakta. Penui a samkak ga la takedi ziemnenah Ih penuide sipei tadi,de eh Rampaube rangla.10Cipau tingbaziedung caineIh Israel kilungme de ngngwaSamkak tei kera aide dade eh Rampaube rangla.Ih a zaidung penui lung gage kai beuzie, nah Ih penui mlung gage cidungde rau dizie. Ih penui Tinggwang dizie, nah penui a minadung dizie.11Penui hangge ge kecu pe kidame de ledeu dilak nah hangge ge kecu pe sinabe de, ‘Rampaube de cilu,’ de eh. Kedanemene penui pelane acu ci luzie, penui ceutube gade gwang ditube kecangde.12Kedanemene Ih penui bata kesiadung de ngaunggia beuzie, nah Ih penui maudung madaude nsung bamsi lakta.”13Samkakkelu aide de “keheci,” de qulu eh, pa samkakkelu keraide luuta kedi teidi, nah luuta kedi de hegwadi eh gah zette dizie.
Bridge Connectivity Solutions Pvt. Ltd.