Hebrewme10
1Kedanemene hezaibe au ma keyibe gwang kera mie ge rünne ge, cipau dungde kesangbe rehidung ma. Cingkumedung ne mmi ge cai mmi ge eh gwang ratak keteide tei jüja eh Tinggwang da gwang kelame madaude yicang gailak.2Iciu lubui liecai, ratak tei kelade mtakdi lak lui ni? Kedanemene kerecamedung de piage teimci di lubui nah kemau kecet gede bamsi lakta.3Dede ratak cidungde gade mmi ge cai mmi ge eh minadung de peu kemaudung nsung hecidai lula.4Kedanemene hemeu nah ketum jaidung ne kemaudung keugi gailak lu.5Cine Khrista kideu ga gwang keludau, pa Tinggwang da rangdi, “Ratakdung nah recadungnang luuneu lama,dede nang pumbe a ziemne mtei pwala;6keru ratakdung nah kemau ratakdung denang nsui lama.7Pecai Ih ranggai, ‘Ainie, Ih aika bam,N lungningbe tei kera, O Tinggwang,laisiudum ga a ha rauteu kela nzwa.’”8Keraibe Khrista Tinggwang dage ranggai, “Nang ratakdung nah recadung, nah keru ratak pelane nah kemau ratakdung luuneu lama. Mede nang cidungde ga nsui lama.” (cidungde hezaibe ga nzwa ratak teigai beula),9cidau pa rangdi, “Pielo, Ih aika bam n lungningbe tei kera.” Pa pe kenabe de teilu kerane tei kebam keraibe de keugi dida.10Cipau lungning de gade, Jisu Khrista pelane ziemne piage gage pe pum kai kebeu gade anuide tei mci luda.11Nah kesang cingku keheibe de tingnai ramsangne sap eh Tinggwang dage pe ta tei gaila. Pa ratakdung tei kedibe teidai dai gaila, madaude kemaudung keugi gaikelak ratakdung de.12Dede Khrista kemaudung ziemne kelungta ratak ket tei kegai dau, pa Tinggwang ba zetle bam dida.13Cipau ting gade, pa pe ngauraumedung de pe pidau teidi kemaktane kwabam dida.14Kedanemene piage reca tei kegai gade pa tei mci kelumedung de kelungta tei mmi cangsiak beudi delu.15Nah Kemci Rabe de anui dage zierang tei gaila. Keraibe pa rangdi,16“Ih cipau tingbadung cai penuide ngngwa samkak tei keraaide da, de eh Rampaube rangla.Ih penui mlung gage a zaidung kai beuzie,nah Ih penui lung gage cidungde raugai beu zie.”17Nah pecai,“Penui maudung nah penui ta kesiadungIh nsung silak da.”18Kemaudung ziemne kemaugi kedi ga, kemau ratak gede teigai kera bamsi meda.19Ciziemne, sinamedung, Jisu jai gade anui heni mcitube ga lütlu kera kenlum bam dida.20Pa anui ziemne lampui keheci nah kering lampui ge ngkei beu kehezupai de gika eh, cide au, pe pumbe gade.21Anui cingku kedi ge Tinggwang kerecaki ga bam kecune,22anui mlung masang tei eh nlum cangsiak eh, lungcet kesia gade anui mlung tei mcilu nah anui pumdung dui kemci le huilu eh gwang lugo.23Anui lunghaudi mene rangkela anui kereguide ntiprip eh kaizeu lugo, kedanemene Tinggwang, sam kaikebeube, au masanglu.24Nah anui kereku nah makeyi tei eh hangge gede dainzwa kecung eh bi cet lugo.25Midung ge nzwa, anui kangbau eh ngkwa bam kelade mtakdi helo. Meliene, anui hangge gede teingkuu si lugo, pe tingba de gwang nna reu reu kebamde ngau eh.26Kedanemene anui kesangbe maci de ngaukelu caide kemau teidai dai bamcai, kemaudung ziemne ratak teisi kera gede bam meda.27Meliene, tutiak ga gwang kera kehing de nah Tinggwang ngauraume de miheu cisüt kecu gage ngkapdi kerade rünne delie.28Keheibe de Moses zai gileu kedime de ngaugia gede si mene mi hangna mede hangcum zierang gade tsai dila.29Nnui kecet gade Tinggwang Nabe de pe pidau tei kedibe de nah samkakkelu jai de, cide ne pecu tei mci kelude de, hera lie kelabe, nah ngaugia Rabe de kii kelabe de, dai kenzwa saja kesia gede peu maisia no?30Kedanemene anui sam aide kerangbe de ci, “Hekum kepei au agu; Ih cide rui daibeu zie.” Nah pecaide, “Rampaube ne pe minadung tutiak zie.”31Ringkela Tinggwang ba gage kaugai kera au ngngisüt kecuge.32Dede gwangkedi tingbaziedung de nsung lulo, cide gade, nnui kebaa ngau kelucai, nnui kehereisüt kecuge lia luda.33Nnuide madauge mtei dwade de kii nah teikeherei, nah keda tingdau ainzwa teikeherei kecume de nnui ngngwa ket tei eh gwang.34Kedanemene nnui hebaangme de ngaunggia beu, nah nnui guniadung sütteu kedide nnui suiyi ngga eh luulu. Nnui mabam yiki nah kelungta bam kera mabam bamlie kecu nnui ci kecune. 35Cine nnui kekuu de gidi so, cika ziehi kedige bam.36Kedanemene nnui helungketiede teu maisia, iciu eh nnui Tinggwang lungningbe tei kelucai, pa sampet kebeu de nnui ngaulu kerane.37Kesanglaisiu ga rang kela nzwa, “Peting tie mene, gwanglai eh kebambe gwang zie nah ri dilak.38Dede kesamsang a minadung au kenlum gade ring luzie, nah pa nlidai dicai, Ih pecu a sui tadi zie.”39Dede anui au kengkap gage nlidai kedimedung ma. Meliene, anui au kenlum bam eh keringria de peu kwaklu keramedung da.
Bridge Connectivity Solutions Pvt. Ltd.