Ezekiel44
1Pecai minabe acu kerecaki gwale bie naimiak kepetle tu herieki hegwabe ga ngngwa gwang; cide ngkui pwabam.2RAMPAUBE a dage ranggai, “Herieki aide ngkui dida; aide ngkei lak. Migede aika de nggwa lak, kedanemene RAMPAUBE, Israel Tinggwang, aika de tet gwang kecune, cine aide ngkui pwabam.3Israel gwangpei cika RAMPAUBE dwa ga bam eh matyei zie. Pa herieki kenlüt lampui gade nlüt zie nah cipau lampui gade mpet dai zie.”4Pecai pa tingtünle kebam herieki gade acu kerecaki dwa ga ngngwa gwang eh, Ih piegai, nah ainie, RAMPAUBE kendu le RAMPAUBE kerecaki puilu, nah Ih hangdeu gage a zu ngkumlu.5Pecai RAMPAUBE a dage ranggai, “Mina Nabo, Ih n dage RAMPAUBE kerecaki ziemne hezaidung nah herietdung rang kezeu ga n mlung kailu, nah n miak le pielu nah n kwen le siulu. Kerecaki kenlüt nah kempetdung de cetlu.6Samzai tei kemei Israelme dage ranglu, ‘RAMPAUBE Tinggwang aide rangla: Nnui tei kela kemneu tadung de tei si ta lulo, Israelmedung,7nnui sangme helung mci kemakme nah hegeurum kemakme de a kemci ni ga ngngwa gwang eh acu taktyei, maca nah hejai peu kecu gade a kerecaki tei hera gai, nnui samkak kelu de nnui ta kemneudung ketei gade tei pang dida.8Nnui a kemci netdung de rengei kera nnui tadung tei ma, dede nnui mi kedame de nnui tadung tei kera kelanggai, nah a kemci ni de pie rengei kera penuide nlum beudi.9RAMPAUBE Tinggwang aide rangla: Sangme migede, helung mci kemakme nah hegeurum kemakme, Israel minadung kakga lungh kelame, a kemci ni ga nlüt gailak.10Dede Levime a dade mdei tetdi, penui acu pütti eh tetdi, penui penui mamie de reca ladi, dede penuide penui mau ziemne saja peu zie.11Penui au a kemci ni ga kilame, kerecaki herieki kwa eh kerecaki ga bata tei eh penui keru reca nah mina ratak ziemne reca kebeu makaunedung de teitset, nah penui mina dwa ga sap eh penui gwa tei zie.12Dede penui penui mamiedung dwa ga penui ratakdung tei kedine, Israelme nadungde peu kemau teidi. Cine Ih a ba hwa cuh eh, penuide saja peu kera reset gai zie, aide RAMPAUBE Tinggwang ne ndugai.13Penui a taiga a cingkume tei kera gwang nna lak mede heni mcitube mede a kemci keheibe tai gade gwang nna lak. Meliene, penui kemneu bata tei kedine saja peu zie14Dede Ih penuide kerecaki aika heta ketei leune, nah aika ma ketei pelane pie rengei kera heta kekwabe peu tei zie.15Pecai Israelme acu gidi eh tetti kecudau a kerecaki tadung Levime cingkumedung, Zadok leuhme ne tei, penui a da gwang eh acu reca zie. Penui a dwa ga gwang maca nah hejai peu zie, aide RAMPAUBE Tinggwang ne ndugai.16Penui a kemci ni ga gwang zie; penui acu reca kera a taktyeibam ga gwang zie nah a dage penui ta teicang luzie.17Penui kigu helung be ga lampui herieki ga kelüt dau, penui langcimpai ba maisia, kedanemene herieki helungle nah kerecaki ga ma maile tei kelu gede ba lak.18Penui peu ga langcimpai peuzui nah penui kia ga helungle nia linen le tei kelu teu zie. Penui teu eh nlop di kera nia au teu kerabe ma.19Penui hegwale kigu ga kepet dau, minadung da pet kera dau, penui penui nia teu lwe heta ketei niadung de lwakti maisia; penui cide lwakti eh kemci kibung gega kaidi maisia, kedanemene mi kedame de cipau niade le tung eh tei mci melu kerane.20Penui peu tai kerabe ma nah penui peutam de mra eh nzubam kerabe ma, dede penui peutam bietdi maisia.21Helungbe kibung ga kelüt dau cingkume migede zau sak kerabe ma,22mede hemipui ge de mede laksipui ge de pe nau lak, dede Israelme relei kemci ge de mede cingku keda nau hemipui ge de pe nau zie.23Kedanemene penui a minadung de kemci be nah kehera pe kentsam ledeu lia zie; penui penuide peu dai mci nah dai hera bi cilu zie.24Ma kehebwak ga penui a zai ga nzwa eh tiak zie; penui kesangbe teu eh tiaklu maisia. Hengyi pelane ga a hezaidung nah herietdung mzai zie, nah penui a kemci Sabbathdung mnei zie25Ketsai paau taiga mie eh penuikatei penuide tei hera di sia bi; dede, magade, ketsai paau cide pe pei mede pe pui, pe napei mede pe napui, sinabe mede meukemak tipui ge cai, iciucai penui ketsai paau taiga mie eh penuikatei penuide tei hera di lubui.26Cingkume ge hera kedicai, penui pecu lang henane ge peu pecu mtak dizie.27Pa kemci ni kigu helungbe ga kemci ni ga heta tei kerane kelüt benai, pa pe ziemne kemau ratak ge teilu maisia, aide RAMPAUBE Tinggwang ne ndugai.28Aide penui gu hema gum kera ge zie: Ih penui mabam da, nah nnui Israel ga pecu mabam ge de peu lak; Ih penui mabam da.29Penui taktyei recadung, kemau recadung, mikatei mide kemmau recadung de penui tyei zie, nah Israel ga ma keheibe de RAMPAUBE de kepeu dung de, penui gu zie.30Ma keheibe gade petsi keyi bui raitube nah nnui peu kegai leune cingkume gu dizie, nah nnui ru kelu tangku raitube cingkume de peu zie iciu eh nnui kidung ga samlam bamlu kerane.31Cingkume makaune teitset pwa kebambe mede makaune ne teu rak pwa kebambe, nruine mede makaune teih tyei lak.
Bridge Connectivity Solutions Pvt. Ltd.