Ezekiel11
1Pecai Tinggwang Rabe acu teucuh eh RAMPAUBE kerecaki kepetle kirie ga ngngwa gwanglu, naimiak kepetle zumok, nah ainie, kirie ga mina ngkaiemengei de ngau. Azzur napei Jaazaniah nah Benaiah napei Pelatiah de Ih ngau, penui kakgade, mina muiteumedungde.2Tinggwang a dage ranggai, “Mina nabo, mina aidungde kemau ciemriem kelame, nah penui Jerusalem namdi aikage makesia lungcet riem gaibeu kelame.3Penui rangbam, ‘Kidung tei kera cu peting mereu; namdi aide gili ge, nah anui be heteihkang.’4Ciziemne caihakecisam le penuide mmau lulo. Caihakecisam ranglo, mina nabo.”5Pecai RAMPAUBE Rabe a da gwang nah a dage rang kerabe pa rangbeu: Ainzwa RAMPAUBE Israelmedung dage rangla, “Nnui dai rang au bi Ih ci bam, kedanemene nnui kecet ka kegwang leune Ih ci kebam ne.6Nnui namdi aika mina kekiee de teitset dida nah puidikidung de ketsai paaudung ne pui dida.7Ciziemne, RAMPAUBE Tinggwang aide ranggai: Nnui mina de teitset kedi, penui paaudung nnui Jerusalem sum ga kai kenzeudung, cidungde au heteihkang, nah namdi aide au gili. Dede aipau namdi sum gade nnuide ngngwa mpet beu zie.8Nnui au kingtie de hing, cine Ih kingtie teu nnui reu gwangla, aide RAMPAUBE Tinggwang ne ndugai.9Ih nnuide namdi sum gade ngngwa mpet beu zie, nah nnuide sangme ba gage kai beu dizie, kedanemene Ih nnuide kemmau tutiak teugwang beu zielu.10Nnuide hereu gade teitset dizie, Ih Israelme deurai lungki gade nnui tu tiak zie iciu de Ih RAMPAUBE lie kecu nnui ci luzie.11Namdi aide au li ge heteikang de gumbeu kela nzwa eh gumbeu lak. Ih nnuide Israelme deu keheigade de saja peu zie.12Pecai nnui Ih RAMPAUBE lie kecu ci luzie, nnui a zaidung ga nnui tet ma nah nnui ajadung mzai ma. Meliene, nnui heleuhdung nnuide twagwapung kebamme zaidung be mzai la.”13Ih caihasam rang kebam dau, Benaiah napei Pelatiah, tsaidi. Cine Ih a zu keumie hap eh sah bak eh ranggai, “O, RAMPAUBE Tinggwang, nang Israel ga kebam keheibe de de teitset di lau ni?”14RAMPAUBE sam a da gwang eh ranggai,15“Mina nabo, n sinapeimedung! N sinapeimedung! N pautsa gade mina nah Israelme pelane! Jerusalem ga lungh kebamme ne penui pelane ha ainzwa eh ranggai, ‘Penui RAMPAUBE dade mdei sütla! Hangdeu aide anui gu teilu kera anuide peu dida.’16Cine, ‘RAMPAUBE Tinggwang aide rang au lie eh rang beulo: Ih penuide teizang pwa heleuhdung kemdei kakgage kai liede, nah hangdeudung kakgage teizang gai di liede, iciu liede penui mie kedi hangdeudung ga tingkak ge ziemne Ih penui ziemne kemci bam ge tei.’17Ciziemne rang beulo, ‘RAMPAUBE Tinggwang aide rang zeulie: Ih minadung dade nnuide ngngwa hekwa luzie, nah nnuide hangdeudung ga zang kela gade ngngwa luzie, nah Ih Israel deu de nnuide peu zie.’18Iciu eh penui cika mie zie nah mania penui suikemak leune nah ngau kemneubedung pelane cipau ni gade keumpet ciak dizie.19Ih penuide lungcet ket peu zie, nah Ih penui kakga rabe keheci peu zie. Ih penui mlung ketak de penui pumteih gade keu gi dizie, nah helung keheci penuide pwa peu zie,20Iciu eh penui a zaidung ga tet luzie, penui a ajadung de teu delwe cidungde tei luzie. Iciu eh penui a mina dizie, nah Ih penui Tinggwang dizie.21Dede mamie kehera nah kemneutadung ga tet eh cilam pesui kelame, penui kemau de ziemne Ih penuide saja beu zie, RAMPAUBE Tinggwang aide ndugai.”22Cherubim pe hesiudung nzang pet eh cuhdi nah pepitadung de penuide ngngwa tetdi, nah Israel Tinggwang kendu penui reu ga la.23Pecai RAMPAUBE kendu namdi sum kakgade hangdi nah namdi ga kepetle lamlwatu ga sap bamdi.24Rabe acu teu cuhlu nah acu Chaldea ga ngngwa gwanglu, lang gikedimedung da, Tinggwang Rabe mangdak gade, nah mangdak cide Ih kengau a peureu gade nghangdi.25Ge RAMPAUBE dade Ih makengau leune pwa lang gikedimedung dage rang ndu lia gai beu.
Bridge Connectivity Solutions Pvt. Ltd.