Exodus15
1Pecai Moses nah Israelme lei aide RAMPAUBE dage teigai. Penui lei tei, “Ih RAMPAUBE dage lei teigai zie, pa mdu süt eh ngking kelu ziemne; hekwen nah pereu cwa kelamedung de pa jaaidi gage kelien gai di.2RAMPAUBE au a kengking nah a lei, nah pa acu keli kelube. Aide a Tinggwang, nah Ih pecu twa zie, A peime Tinggwang, nah Ih pecu hetwa peuzie.3RAMPAUBE au reugwame ge; Pe zi au RAMPAUBE.4Pa Pharaoh bagidung nah reugwame de jaaidi gage kelien gai di. Pharaoh ne kedet kelu kedimedung de Jaaidi Kegie gage hegak di.5Jaaidi kecuk ne penuide gumlu; penui tangtsu ge nzwa kecuk cide ga nlim miedi.6N ba zetle, RAMPAUBE, au kengkieng gade kemdu ge; n ba zetle, RAMPAUBE, ngauraume de tei kecai dida.7Nang kengking kedi gade ncu ngaurau eh cuh kecumedung de tei ngkau dida. Nang n rata langmpet gai; cide ne penuide reigau nzwa ru dida.8Nang dui müt kegai dau dui keswak hangdi; dui lwa kebamdung keswak cuh di; dui jaadi kecuk de sum ga takbak di.9Ngauraume rangdi, ‘Ih zuimie zie, Ih gwa luzie, Ih hema mzi luzie; a hengim de penui dade mnung canglu zie; Ih a kingtie züt mpet zie; a ba le penuide ngkap dizie.’10Dede nang n tingkai le müt gai, nah jaaidi ne penuide gum pwadi; penui hegeu nzwa dui kedi ga nlim miedi.11RAMPAUBO, rabedung kakga de cau nang nzwa no? Cau nang nzwa no, kemci gade kemdu, ketwa gade herüt, miswakegah ketei?12Nang n ba zetle hwapet gai, nah kideube penuide mnwalu.13N sampet de ga samsang eh nang kelikelu minadung de nzang gwang beu. N kengking gade nang penuide kemci heni nang kelungh ga nzang gwang.14Minadung siu zie, nah penui mbeu dizie; Philistia ga kelungmedung kengngi le pui dizie.15Pecai Edom deudi kedimedung ngngi dizie; Moab reugwamedung mbeu dizie; Canaan ga kelunghme pelane tuimie dizie.16Kengngi nah kehing penuida gwang dizie. N ba kengking ziemne, penui tangtsu ge nzwa nlai tazing dizie n minadung tetkah di kemaktane, RAMPAUBO, nang ne kelikelu minadung tetkah di kemaktane.17Nang ne lamlwatu gum kelu ga penuide nzang gwang eh linggai zie, heni, RAMPAUBO, nang lung kera teikelu de, kerecaki, anui Rampaube, n ba le tei kelude.18RAMPAUBE kelungta nah kelungta hegwangtei zie.”19Kedanemene Pharaoh kwendung penui bagi si eh nah hekwen keteumedung jaaidi ga lwetdi. RAMPAUBE dui penui da teugwang gai dai. Dede Israelmedung hangdeu kecangh jaaidi sum ga tet.20Caihakecibepui Miriam, Aaron swacingpui, pe leibung pwalu, nah mipui pelane penui leibung pwalwe mie, pecu ngngwa helim lim.21Miriam penui dage lei teigai; “RAMPAUBE dage lei tei gailo, pa ndudie eh ngking kelu ziemne. Hekwen nah pereu tet kelame de pa jaaidi gage kelien gai dida.”22Pecai Moses Israelme de ngngwa Jaaidi Kegie gade tetkah di. Penui Shur hetaideu ga miedi. Penui hetaideu ga lang cumne hebeuh tei ladi nah dui ngau luma.23Pecai penui Marah ga gwanglu, dede penui dui sak luma kedanemene dui kaa kecune. Cine penui cipau heni de Marah qudi.24Cine minadung Moses dage ncam gai eh rangdi, “Anui dai sak lubui no?”25Moses RAMPAUBE dage mra gai, nah RAMPAUBE pecu tsingbang ge keulia. Moses cide dui gage kelien gai, nah dui de sak yi di. Cikade RAMPAUBE hezai kemting ge penuide peu, nah cikade pa penuide kedei gai.26Pa rangdi, “Magade nnui RAMPAUBE nnui Tinggwang kwa kingnei teune lucai, nah pe dwa gade petaube tei lucai, nah nnui pe aja kingneilu nah pe zai pelane mzai lucai, Ih mateeidung Egyptme dage kekaide nnui dage kailak, kedanemene Ih au RAMPAUBE nnuide tei ngkeibeu kelabe.”27Pecai minadung Elim namceu ga gwanglu, cika duirwak kereiehkena bam nah Palm bang riakhena bam. Penui cika dui kemna gage ramzeuki teilu.
Bridge Connectivity Solutions Pvt. Ltd.