Exodus12
1RAMPAUBE Egypt deu gade Moses penai Aaron de mpau. Pa rang,2“Nnui ziemne, aipaukei de hekeidung gade pendeu be zie da, nnui ziemne tingkum gade hekei raitube zie da.3Israelme ngkwa kelu maa gage rangbeu lu, ‘Aipau kei ziangrei benai penui hangge ge de meurünna ge mede hemeu keceuge penuikatei zeimne keulu maisia, kelak ramsang de aide tei zie, kilungme ket ziemne meurünna ket.4Magade meurünna ket ziemne kilungme ceuzu dicai, mipei be nah pe kidabe meurünna mede hemeu keceu ge gu peteih luulu zie mina riak nzüt gade tyeilu kebui ge. Cide pelane tyei nsam lu kebui ge maisia, cine penui heteih kekiee keulu maisia penui pelane de peu tyeilu kerane.5Ngu meurünna mede hemeuna zamra mezing kecu ge maisia, peseu mmi ge gu. Nang meurün mede hemeudung ketpe keu lubui.6Nnui cide kainzeu lu maisia hekeizie ziangreiehmdai cang kemaktane. Pecai Israelme ngkwa maa pelane makaune aidungde tinghegi dau teitset lu maisia.7Nnui hejai dungge keulu maisia nah kimuiki tsia kenana gage nah nnui heteih cide tyei kerabe kilung gu kikam peu gage keniaklu.8Nnui heteih cide cipau ziu tyeilu maisia, mi gage ru railwe. Cehi kai mene tei kelu tangku de mzang tyeilu, cehei keka de si eh.9Nggeu mede swalwe cide tyei so. Meliene, pe peu, pe pi nah pelungnet mi gage ru lu.10Nnui cide kette tyeibang so bi pecai benai tingcang kecang. Bang kenzeu pelane tingcang nnui ru di maisia.11Ainzwa nnui cide tyei maisia: n kiakang kang ntiplu, n picum n pi gage kailu, nah n tui n ba ga pwalu. Nang cide tyei zette lu maisia. Cide RAMPAUBE de kahkegwang ngyi reca.12RAMPAUBE aide rangla: Ih Egyptme deu cipau ziu tet kahgwang zie nah Ih mina nah makaune neraibe leune de teitset zie Egyptme deu ga. Ih Egyptme rabedung leune da saja teugwang beuzie. Ih au RAMPAUBE.13Hejai de nnui kilung ga marehi ge zie nnuida Ih gwang de. Ih hejai de ngau keludau, Ih nnuide kah tetti zie Ih Egyptme deu gwaketang kecudau. Kengkap keherei aide nnui da gwangdi lak nah nnuide tei ngkap dilak.14Tingbazie aide nnui ziemne nsung bammui kera tingbazie ge zie, cide lepwane nnui RAMPAUBE dage hengyi ge nzwa mnei la maisia; nnui ceheudung ziemne, hezai ge nnui kelungta kai nzeu kera ge.15Lang henane ting nnui tsehi kai mene tangku tyei zie. Tingbazie raitu benai nnui nnui kilung gade tsehi keugi dizie. Caugamme tsehi kai kelu tangku raitu benai gade lang henane benai kecang tyei bi, cipaube de au Israel gade gwadi lu maisia.16Mtakkak raitu benai a ziemne keuntsam kelu kengkwa maa ge bam zie, nah lang hanane benai ci kenzwa kengkwa maa keda ge bam daizie. Aipau tingbaziedung ga makam kette tei lak, matyei kera pelane ziemne makelang de gwale. Cipau tah de rünne da nnui teilu kebui.17Nnui Cehi Kaikemak Tangku Ngyi aide mnei la maisia kedanemene aipau benai Ih n minadung, reunet keu kelu hemaa ge cai hemaa ge eh Egyptme deu gade ngngwa mpet ludi. Cine nnui tingba aide nnui ceheu leune ga mnei lamui maisia. Aide nnui ziemne hezai ge lamui zie da.18Nnui Cehi kaikemak tangku tyei maisia pe tingkum hekei raitu bekei ziangreiehmdai benai tinghegi gade, hekei zie ngkaieket benai tinghegi kecang.19Aipau lang henane tingdau, nnui kilung ga tsehi kette ngaulu kerabe ma. Caudung ge tsehi le teikelu tangku tyeilu dibi Israelme leuh gade cak gidi maisia, cipaube sangme ge mede n deu gade mna kelube lubui liede.20Tsehi le tei kelu magede nnui tyei lak. Nnui keheiga lung liede, nnui tsehi kai mene teikelu tangku tyei maisia.’”21Pecai Moses Israel hangkiame pelane de qu lu nah penui dage rang, “Miecu nah meurünna mede penadung nnui kilungme tyei buisiak kecu ge kedet lulo nah Kahkegwangngyi meurünna teitset lulo.22Pecai hyssop hwa ge keulu nah cide hekwak ga kebam hejai gage mpunglu. Hekwak ga kebam hejai cide kikampeu gage nah kimuiki tsia kena gage keniak lu. Nnui migede tingba kemaktane pe ki kimuiki gwale tetpet kecu teilak.23Kedanemene Egyptme de teitset kera RAMPAUBE kahgwang zie. Pa hejai de kikampeu ga nah kikamtsia kena ga ngau keludau, pa nnui kikam tetkah dizie nah tei ngkap zielie kelabe de peu nnui kilung ga nnuide teitset kera lütlak.24Nnui tariem aide mnei la maisia. Aide nnui nah nnui cai lungkeleume ziemne hezai ge mui zie.25RAMPAUBE nnuide peu zielie kela deu ga nnui lüt keludau, pa teibeu zielie sampet kelu nzwa, nnui reca zai aide mnei la maisia.26Nnui name nnuide keteu kecu dau, ‘Reca zai aide pekie dai no?’27cidau nnui ranglu maisia, ‘Cide RAMPAUBE kahkegwangngyi ratak lie eh, kedanemene RAMPAUBE Egypt ga Israelme kilungdung kahgwang pa Egyptme de teitset kegwang dau. Pa anui kilungmedung de lungmpet beu.’” Pecai minadung keumie nah RAMPAUBE de reca.28Israelme mie nah RAMPAUBE Moses penai Aaron de tei lo aja kai kebeu de siakte teilu.29RAMPAUBE Egyptme deu ga neraibe pelane de teitset kegwang cide tingmuisum dau tei, pe hegwangbam ga ntum kebambe, Pharaoh neraibe gade, gwang hebaangki ga kebambe neraibe nah makaune mciulu raitube pelane.30Pharaoh tingmui mrak cuhlu, pa, pe kilame pelane, nah Egyptme pelane. Egypt ga kehap kwale puidi, kedanemene mige ki ga de migede tsai kemak gah kedine.31Pharaoh Moses penai Aaron de tingmuiziu qu teugwang nah rang, “Cuhlu, nang nah Israelmedung, a minadung kakgade tet mpet lu. Miecu, nnui tei neu lie eh rang kela nzwa, RAMPAUBE de reca lu.32Nnui kauruinedung nah nnui kaunehaudung keu lulo, nnui rang kela nzwa, nah miecu, nah acu de samlam beulo.”33Egyptmedung kelwa sütdi penuide hangdeu gade lang mpetti kera, kedanemene penui rang, “Anui pelane tsai zie da.”34Cine minadung penui tokkui gage tsehi kette kai mene pwalu. Penui gu tsusie kwakdung penui paidung gage kanglu eh penui hekeutu gage punglu.35Cu Israelmedung Moses penui dage rang kebeu nzwa eh teilu. Penui Egyptme dade rangkanggeu netdung, kecak netdung, nah paihenidung kielu. 36Israelme suiyi teineu kera Egyptme dage RAMPAUBE helung teigai beu. Cine penui kekie leu Egyptme penuide pwapeu. Ainzwa eh, Israelme Egyptme mabam tuiteu di.37Israelme Rameses namdi gade Succoth namdi gage hebeu tei tetgai. Penui hepi le tet kela mipei seukelu cang haiherok kenzwa ge, mipuidung nah henamedung de si mene.38Ncüt keri kecu maadi liede penuide ngngwa tet, kauruinedung nah kaunehaudung si eh, gui kebam kaune hemaa maadi ge.39Penui Egypt gade pung mpet kela tokkui le tsehi kai mene tangku rulu. Cide tsehi kai ma kedanemene penuide Egypt gade gwagi di nah taktyei lamlui kera peting ngaulu kemakne.40Israelme Egypt ga mmi 430 ge lungh.41Mmi 430 cang dige, cipau benai siakte, RAMPAUBE gu reunet keu kela maame pelane Egypt deu gade tet mpetti.42Tingmuiziu aide zip mene mrak eh bam kerabe di, kedanemene RAMPAUBE de peu penui de Egypt deu gade ngngwa mpetlu kerane. Aide RAMPAUBE gu tingmuiziu lie kecu Israelme pekiene de penui ceheu pelane ga mnei eh gwang kerabe.43RAMPAUBE Moses penai Aaron dage rang, “Kahkegwang taktyei zai aide da: Sangme migede taktyei ga mzi tyei gailak.44Iciuliede, Israelme hebaangme leune, rangkang le lui kelume, nnui pecu hegeurum kelu cai au cide tyei lubui.45Sangme nah li kelu kilamedung au taktyei cide kette tyei kerabe ma.46Taktyei cide kilung ket gade tyei maisia. Nnui heteih kette kilung gwale keumpet lak, nah nnui pera kette teitsum dilak.47Israelme leuh pelane hengyi de mnei maisia.48Magade sangme ge nnui da lunghbam nah pa RAMPAUBE dage kahkegwangngyi mnei gai neu bamcai, pe kibaume mipeina pelane de hegeurum lu maisia. Iciulude pa cide gwang lubui nah mnei lubui. Pa de cipau ram gade mna kelumedung nzwa dizie. Iciuliede, hegeurum kemak migede taktyei kette tyei gailak.49Hezai aide deuketna nah sangme nnui kakga lungh kebamme ziemne de delie.”50Cine RAMPAUBE Moses penai Aaron dage aja kai kebeu de siakte eh Israelme pelane teilu.51Cinzwa eh cipau nai gage RAMPAUBE Egyptme deu gade Israelme de ngngwa mpetlu reugwame ge nzwa.
Bridge Connectivity Solutions Pvt. Ltd.