Esther9
1Cu kei kereiekena, cide Adar bekei, ziangreikecum benai, hegwangpei sam nah pe hezai de teilu kera peting gwang cang kelu dau, Jewme ngauraumedung penui kang gage kailu kera regui kedi benai de: dede cide ciciu kelube mene, Jewmedung penuide ngaurau kelamedung de penui kang gage kailu.2Jewmedung penui namdidung ga hegwangpei Ahasuerus deuceudung pelane ga penui gwang ngkwalu, penuide tei msia kera peei kelame de heba ge kezang pet ketang kerane. Dede migede penui dwaga sap beu ma, kedanemene penuide hing kecu minadung pelane da bam kedine.3Nah deuceudung ga kedimedung pelane, nah deuceu dimedung, nah peuteumedung, nah hegwangpei ziemne heta keteimedung, penui au Jewmedung de teu ncuh bam, kedanemene Mordecai de kehingde penui da bam kedine.4Kedanemene Mordecai au hegwangpei ki gade mdu pet di, nah pe kedi ha cide deuceudung pelane ga mdu pet di, kedanemene Mordecai de kecu pei de au yi reureu nah di reureu di kecune.5Nah Jewmedung penui ngauraume pelane de kingtie le bi, nah gitset, nah ngkapdi; nah penuide ngaurau kelamedung de de penui sui teidi.6Nah Susa kengking reketbam gade Jewmedung ne minadung haimengei teitsetdi.7Nah Parshandatha, nah Dalphon, nah Aspatha,8nah Poratha, nah Adalia, nah Aridatha,9nah Parmashta, nah Arisai, nah Aridai, nah Vaizatha,10Haman napeidung hangkerei, Hammedatha napei, Jewmedung de ngaurau kelabe, penui gitsetdi. Dede penui teitset kedime ngauraume gu hema ket de tui ma.11Cipau nai, Susa kengking reketbam gade mina hang daikie gede teitsetdi bi kecu hegwangpei da sam teugwang beu.12Cine hegwangpei hegwangpui Esther dage rang, “Susa Kengking reketbam gade Jewmedung ne minadung haimengei ge de teitset nah ngkapdi, Haman napeidung hangkerei de si eh. Hegwangpei deuceudung kebang ga, penui daipai tei dino? Nang dai luu no? Nah cide ncu peu zie. Nah nang kie neu kela de dai no? Pecaide, cide teibeu zie.”13Nah Esther rangdi, “Magade hegwangpei dade keyi ge lie cai, Susa ga kelung Jewmedung de henai gu hezai de nzwa peu cide ncünne liede peu beu dilo, nah peu Haman napeidung hangkerei de tsingbang gage gwakdi lo.”14Nah hegwangpei aide teilu kera rang beudi. Nah hezai ge Susa gage kaigai, nah penui Haman napeidung hangkerei de gwakdi.15Cine Susa ga Jewmedung kebamme Adar bekei ziangreimdai benai penui gwang ngkwalu, nah penui Susa ga mina haicum de teitsetdi. Dede penui teitset kedime ngauraume gu hema ket de tui ma.16Nah Jewme kedamedung hegwangpei deuceudung ga kebammedung penui gwang ngkwalu delwe penui teilung gumlu; nah penui ngauraume dade mtaklu, nah penui ngauraume cang riakhenamengei de gitsetlu. Dede penui hema tui ma.17Adar bekei ziangreikecum benai: pecai penui mtaklu; cipau kei ziangreimdai dau, pecai penui ketyei kesak nah suiyi tingba ge teilu.18Dede Susa ga kebam Jewmedung cipau kei ziangreikecum benai nah ziangreimdai benai gwang ngkwalu. Nah cipau kei ziangreimengei benai penui mtaklu, nah penui ketyei kesak nah suiyi tingba ge teilu.19Ciziemne, Jewmedung, renam ga lungh kebammedung, Adar bekei ziangreimdai de ketyei kesak nah suiyi tingba nah keyi tingba ge mneilu: nah hangge gede mta mapeudung kepeu tingba ge teilu.20Nah Mordecai ne ma aidungde raulu. Nah pa laisiudung Jewmedung leune hegwangpei Ahasuerus deuceudung pelane ga kebamme dage langgai beu, kenna ga kebammedung nah kemdei ga kebammedung dage,21penui ziemne ndeu gai kera Adar bekei ziangreimdai benai nah ziangreimengei benai tei kecu, mmi ramsang kum,22Jewmedung penui ngauraumedung dade mtak kelu tingbadung ge teilu, nah suisiet gade suiyi teu gwang kebeu kei nah kehap gade keyibe tei gwang kebeu tingba ge tei lu, cinzwa eh cidungde ketyei kesak nah suiyi nah mige pe zangbe de mapeudung kepeu, nah teumai kesiame de mapeudung kepeu tingbadung teilu.23Nah Jewmedung penui tei cuh kecude, nah Mordecai ne penui dage dai raugai beubi cide luu lu.24Kedanemene Haman, Hammedatha napei, Agagme pei, Jewmedung pelane de kereniabe, ngauraube Jewmedung de tei ngkap zingdi kerane heciem riemlu; nah pa Pur (“dacak kecu”) tei gai iciu eh penui lung tei keherei nah penuide tei ngkap dilu kerane.25Dede pa hegwangpei dwaga gwang kecu dau, pa rau kenzeu laisiu gade rang eh, “Peu pe mariem kesia Jewmedung ziemne nkim eh pa riem kenzeu de pe dage cailigwang dilo, nah peu penuide pecu nah pe napeidung de tsingbang gage gwakdi lu.”26Ciziemne, penui tingba aidungde de, “Purim,” lie qudi, Pur zi ria gade. Ciziemne, rau kenzeu sam riadung pelane gade, nah penui ma aide kengau gade nah penui da ma aide gwang kedi gade,27Jewmedung ma aide tei ncuh lu nah penui luu kelu tei lu, nah penui leuh, nah penuide ngngwa ncüt kelu pelane de (nah cide madaude gah dilak) tingbazie aikena de penui kerau ria gade tei gwang kera, nah penuine kedet kelube tingdau tingkum ge cai tingkum ge ria gade.28Cine tingbazie aidungde de nsunglu nah cide ceheu ge eh ceheu ge, kelak ge eh kelak ge, deuceu ge eh deuceu ge, nah namdi ge eh namdi ge gage tei lu. Nah Purim tingbazie aidungde au Jewmedung da gade madaude gah dilak, nah penui kensung aide penui leuh da gade penli tei dilak.29Pecai hegwangpui Esther, Abihail napui, nah Jewme pei Mordecai, rau kenzeu Purim laisiu kenabe de teu ncuh lu kerane pe kengkieng pelane teu raugai.30Nah pa rau kenzeu laisiudung cide Jewmedung pelane dage langgai beu, deuceudung 127 gage, Ahasuerus gwangram gage, kezuyi nah kesangbe samdung,31Purim hengyi aidungde penai ne kedet kelu tingdung gage teigai lu kerane, Jewme pei Mordecai nah hegwangpui Esther ne penui ziemne riem kebeu de nzwa eh, nah penai ne penai teilung de cet eh nah penai leuh de cet eh riem kebeu de nzwa eh, kemmwang nah penui kehap ting mnei kelu nzwa eh.32Nah Esther ne hezai kai kegai gade Purim zai ndeu kelu teilu.
Bridge Connectivity Solutions Pvt. Ltd.