Ephesame1
1Paul, Tinggwang lungning gade Khrista Jisu ne langkegaibe, Ephesus namdi ga kebam nah Khrista Jisu gade samsang eh kebam kemcimedung dage kekai.2Anui pei Tinggwang nah Rampaube Jisu Khrista dade kegwang ngaugia nah lungciep de peu nnuida bam kelube teilo.3Peu Tinggwang nah anui Rampaube Jisu Khrista Peibe de hetwa pung kelube tei lulo, Khrista gade ngngwa ket tei kelu gade nreule de kegwang mirabe kilam samlam leune pa anuide samlamgai beuda.4Kideu tei kemak dwade pa anuide pe gu tei zielie Khrista gade kedet luda, iciu eh anui pe dwade mci nah kemau tei mene bamlu kerane. Keku gade5pe lungning keyi de nzwa pa anuide Jisu Khrista gade pe name tei zielie mrai riem pwala.6Pa pe na pe Kube gade pe ngaugia kendu mta mapeu anuide kepeu ziemne pecu twa go.7Khrista jai ne anuide ri luda, cide anui maudung gibeu dida. Pe ngaugia dai dige di no,8pa anuide maci nah macet pelane mbang süt eh kepeu de.9Tinggwang pe lungning keyi ria gade pe macetkecok de peu anuide cigai da, Khrista gade pa riemteu kelade,10cide peting siakdau Khrista gade ma pelane, Tinggim ga gudung nah kideu ga gudung pe dage keuncütlu kerane.11Ma pelane pa riem nah cet kelu nzwa teilu. Nah pa riem teu kela nzwa eh Khrista gade anuide kedet pwa peu pe ma kegumme teilu,12iciu eh anui, Khrista gade keregui ngau raitume tei eh pe kendu gage lungh gailu kerane.13Khrista gade, nnui de, nnuide kelikelu samliakeyi kesang samde siulwe nnui pecu nlum keludau, sampetkelu Kemci Rabe le nnuide giak luda,14Kemci Rabe au anui mabam gum canglu kemaktane anuide gum luzie pe sam kai kebeu deda. Pe kendu de twa lugo.15Aide ziemne, nnui Rampaube Jisu de kenlum nah pe minadung pelane de keku ha Ih siu luge,16Ih nnui ziemne mtakdi mene twa bamla, a kekiedung gade nnuide nsung kecu tei eh,17iciu eh anui Rampaube Jisu Khrista Tinggwang, kendu Peibe, nnuide maci nah saukelia rabe peu eh peu pecu cilu kerane.18Ih kekie au nnui mlung ngkei pwa pe kebaa ngaulu kera deda, iciu eh nnuide qugai kelu keregui de daibi kecu nah peu kemcimedung de gum zielie kebeu pe mapwa kendu keyi de daidung ge bi kecu,19nah anui kenlumme dade pe bata tei kebam kengkieng de dai dige dibi kecu peu nnuide cilu kerane. Kengkieng anuida heta tei kebam de au,20kengkieng pa Khrista de ketsai gade kwakcuh kelu nah peu tinggim ga pe ba zetlebie bam kelu kengkieng deda.21Khrista hegwang nah kedime, nah kengkieng nah kengkiengketeume pelane, nah hezi mtak kelu leune, cudau teilung rünne ma, dede gwangdai kera teilung leune reu ngkiengtube.22Nah Tinggwang ma pelane pwa Khrista pi kang gage kai dida nah pecu ma pelane reu peube tei kera ziemne ngqwabe de peu dida.23Ngqwabe cide Khrista pum da, pa cangsiak kecube, ma pelane ga kelabe.
Bridge Connectivity Solutions Pvt. Ltd.