Hezaidung9
1Kingneilu, Israel; henai nnui Jordan reu de kah lauda, nnui swa diki nah ngkingki kecu heleuhdung de ngkapdi kerane, nah namdi kedidung nah tinggim ga kecang tsukwa kwa keludungde de,2minadung di nah tie, Anakim napeidung, nang ci kebamme, nah minadung rangkela nang siu, ‘Cau Anak napeime dwa saplu lai?’ 3Cilu cine henai RAMPAUBE n Tinggwang au pa nnui dwaga kengkap miheu nzwa tet kelabe; pa penuide ngkap dizie, nah pa nnui dwa gade penuide ngam dizie; cine nnui penuide gwampet dizie nah nzet süt eh penuide ngkap dizie, RAMPAUBE nnui dage kerangde nzwa eh.4RAMPAUBE n Tinggwang penuide nnui dwa gade gwa mpet kedicai, nnui mlung gade rang diso, ‘RAMPAUBE aipau deu de acu gumlu kera ngngwa gwang beu a kesamsang de ziemne,’ kedanemene heleuh aidungde nlien kedide ziemne RAMPAUBE penuide nnui dwa gade gwampet dilai zeu.5Cide nnui keyi ziemne ma mede nnui petau te kela ziemne penui deu nnui gum lulai eh bam ma, dede heleuh aidungde nlien kedine nnui RAMPAUBE penuide nnui dwa gade gwampet dilai zeu, nah iciu eh pa nnui paumedung, Abraham, Isaac, nah Jacob dage sampet kai kebeude teicang beu kerane.6Ciziemne cilu, RAMPAUBE nnui Tinggwang nnui samsang kecu ziemne hangdeu keyi aide peu lai eh bam ma, kedanemene nnui au nnui lung hung kecume lu.7Nnui hetaideu ga keladau dainzwa delwe RAMPAUBE nnui Tinggwang rata teidi bi kecude cetlu nah nsungta diso; nnui Egypt deu de pütdi eh tet kedi benai gade nnui aipau ni ga gwang canglu cu kecang, nnui RAMPAUBE de renia gwang. 8Horeb gade de nnui RAMPAUBE rata tei, nah RAMPAUBE nnuide ngkapdi lubui kera kecang pe rata di.9Ih lamlwa ga tangtsukwak pwa kera nghang kecudau, RAMPAUBE nnuide ngngwa samkak teikelu tangtsukwak, Ih lamlwa ga tingbazie riakdai nah tingmui riakdai bamdi; Ih tangku tyei ma mede dui de sak ma.10RAMPAUBE acu pe zurang le rau kenzeu tangtsu kwak kenade pwapeu; cika samdung pelane RAMPAUBE ne nnui dage lamlwa ga ngkwa kecu benai nnui dage miheu sumkak gade rang mdukegai dungde kesiakte raunzeu pwabam. 11Cipau tingmui tingbazie riakdai cang luge RAMPAUBE acu tangtsukwak kenade pwapeu, samkakkelu tangtsukwak de.12RAMPAUBE a dage rangdi, ‘Cuhlu, aikade nzet nghung cu, kedanemene n minadung, nang Egypt gade ngngwampet kelumedung, hera dida nah kemau tei dida. Ih aja kaikebeu lampui de gade penui nzetsüt eh nreutet dida. Penui katei penui ziemne mamie ge tei luda.’13Cipau reude, RAMPAUBE acu resiu delwe rangsi gai, ‘Ih mina aidungde de ngau da; penui au mina pe lung hung kecume.14Acu kaam diso, iciude Ih penuide teingkap di nah penui zi tinggim kang gade kemaidi kerane, nah Ih nnuide penui swade heleuh ngkiengki nah diki kecuge tei beuzie.’15Cine Ih nreu caililwe lamlwa gade nghung di, nah lamlwa heu bamdi. Samkakkelu tangtsukwak kenade a ba gala.16Ih piegai, nah ainie, nnui RAMPAUBE nnui Tinggwang dage kemau teigai dida. Nnuikatei nnui ziemne hetumna ge tei luda. Nnui RAMPAUBE ne aja kaikebeu lampui de gade nnui nzetsüt eh nreutet dida.17Ih keu kela tangtsukwak kenade a ba gade keliengi di. Ih cipau kenade nnui miak dwade teipang di.18Pecai Ih tingmui tingbazie riakdai ge RAMPAUBE dwaga taksu pung eh bamdai; Ih magede tyei ma mede sak ma, kedanemene nnui teikedi nnui mau pelane ziemne, RAMPAUBE dwa gade kemau keteine, iciu eh nnui pe kemei tei eh pe rata teidi kerane.19Ih rata de hing kedi ziemne nah RAMPAUBE nnui dage pe ratasüt eh nnuide ngkapdi rauta kedine. Dede RAMPAUBE cipau ting daude a kwa kingnei daibeu.20RAMPAUBE Aaron de pe ratasüt kedine pecu ngkapdi laidi; Ih Aaron ziemnede cipau tingdau kekie tei.21Ih nnui kemau pwalu, hetumna nnui ne tei kelude, delwe rudi, dapdi, nah tei kecaidi, cide rebui ge nzwadi kemaktane. Ih rebui cide lamlwa ga reunaki lwamie kebamde gage kelien gaidi.22Taberah ga, Massah ga, nah Kibroth Hattaavah ga, nnui RAMPAUBE kemei tei eh pe lunghop gage teugai. 23RAMPAUBE nnuide Kadesh Barnea gade langgai nah kerang dau, ‘Nghang delwe hangdeu Ih nnuide peu kedide gumlu,’ cidau nnui RAMPAUBE nnui Tinggwang aja de mlaidi, nah nnui pecu nlum ma mede pe kwa kingnei ma.24Ih nnuide ci kelu tingba benai gade nnui RAMPAUBE de mlai ladi da.25Cine Ih RAMPAUBE dwaga tingmui tingbazie riakdai a zu nkum pung bamdi, kedanemene pa nnuide teingkapdi kera rang kegaine.26Ih RAMPAUBE dage kie eh ranggai, “O RAMPAUBE Tinggwang, n minadungde ngkap diso mede n mapwame n kedi de gade rikelube de, n ba kengkieng de teu Egypt gade ngngwampet kelude.27N kilame Abraham, Isaac, nah Jacob penuide nsung gailo; penui lung hung kecude, nah penui kenlien de, nah penui kemaudung de pie helo,28iciu eh nang anuide ngngwa kempet deu de gade rangdi lubui, ‘RAMPAUBE penuide sampet kebeu deu de ga pa penuide ngngwa gwang luma, nah pa penuide ngkau kecune, pa penuide hetaideu gage teitsetdi kera ngngwa mpet gaida.’29Ciciude penui au n minadung nah n mapwame, nang penuide n ba kedi nah kengkieng keulia eh Egypt gade ngngwa mpetlu.”
Bridge Connectivity Solutions Pvt. Ltd.