Hezaidung6
1Cu aidungde ajadung da, hezaidung, nah teimai kesiadung RAMPAUBE nnui Tinggwang nnuide ledeu kerane acu rangkebeu, iciude nnui cidungde kainzeulu kerane hangdeu nnui Jordan tetkahgwang gum kera dega;2iciude nnui RAMPAUBE nnui Tinggwang de herüt peulu kerane, iciu eh pegu hezaidung nah ajadung pelane Ih nnui dage rang kebeu kainzeulu kera, nang, n napeime, nah n napei name, nnui kelunghta, iciude n tingbaziedung tielu kerane.3Ciziemne penui sam kingnei lulo, Israelmedung, nah cidungde kainzeulu, iciude cide nnui ziemne yi luzie, ciu eh nnui lungh hingsüt luzie, tungdui nah heliadui lwa kebam deu ga , RAMPAUBE, nnui peime Tinggwang, nnuide teibeu zielie pe sam kai kebeu nzwa.4Kingneilu, Israel: RAMPAUBE anui Tinggwang au ket.5Nnui Rampaube nnui Tinggwang de hung zie nnui mlung pekiene teu, nnui keringria pekiene teu, nah nnui kengkieng pekiene teu eh.6Samdung Ih henai nnuida kai kegaide nnui mlung ga lazie;7nah cide nnui lung kai eh nnui name de ledeu zie; nnui cide ha rangzie nnui nnui kiga ntum kebam daude, nnui lampui kiga tetkela daude, nnui zeu kebam daude, nah nnui cuh kecu daude.8Nnui cide kang luzie marehi ge nzwa nnui ba gage, nah cide nnui miak kakga hezu keyi nia nzwa kai luzie.9Nnui cide nnui ki ga kikam hetsiadung gage nah nnui kirieki gage rauzie.10RAMPAUBE nnui Tinggwang nnuide hangdeu ga nggwa gwang keludau pa nnui peime dage, Abraham, Isaac nah Jacob da, pa nnuide pwapeu zielie eh pe sampet kelude, nang ne teilu kemakbe namdidung di nah yisüt kecudung,11nah kidung cika makeyi leune le puidi eh nnuine teilu kemakbe, tekwa nnuine kuilu kemakbe, kubetsi luh nah olive bangdung nnui ne linglu kemakdung, nnui cide tyeizie nah mnung luzie,12pecai sünne lu iciu eh nnui RAMPAUBE de nsungtadi kelakne, nnuide Egyptme deu gade ngngwampet kebeube, hebaang ketei ki gade.13Nnui RAMPAUBE nnui Tinggwang de herüt peuzie; nnui pecu reca zie, nah nnui pe zi teu sampet teizie.14Nnui hera keda caisui lak, minadung nnui tai lungh pui kebamme gu rabedung, 15kedanemene RAMPAUBE nnui Tinggwang nnui kakga kebamde au periak ketei Tinggwang, magade nnui teicai, RAMPAUBE nnui Tinggwang rata de nnuida heupet zie nah pa nnuide kideube reu gade ngkap dizie.16Nnui Massah gade pecu kedei kecunzwa nnui RAMPAUBE nnui Tinggwang de kedei lak. 17Nnui lung nrisüt eh RAMPAUBE nnui Tinggwang ajadung kainzeu zie, kemlang pe ajadung, nah pe zaidung, pa nnuide teilo kebeudung.18Nnui dai petaubi kecube teizie nah RAMPAUBE miakdwa gade keyibe, ciude cide nnui ziemne yi luzie, nah cinzwa eh nnui lüt luzie nah hangdeu keyi RAMPAUBE nnui peime da sampet kebeude gum luzie,19nnui ngauraume de nnui dwagade gwagi dilu kerane, RAMPAUBE rangkebeu nzwa.20N napei nnuide keteu kecu ting ge gwang kecudau, rang eh, “Samting samkakkelu hezaidung, hezai rau keludung, nah RAMPAUBE anui Tinggwang nnuide rang kebeudung keda zaidung daidung deno?”21cidau nnui napei dage nnui rangzie, “Anui au Egypt ga Pharaoh kilame ge tei; RAMPAUBE ne anuide Egypt gade kengkieng bale ngngwa mpet beu,22nah pa marengei nah mimakecang batadung, kedige nah ngaukehing, Egyptme dage, Pharaoh dage, nah pe kilungme pelane dage, anui miakdwa gade keulia;23nah pa cikade anuide ngngwampet beu, iciu eh pa anuide ngngwa nlütlu kerane, hangdeu anuide peu kera pa anui peime da sampet kebeude.24RAMPAUBE anuide hezai aidung pelane mzai lamui lulo aja kai, RAMPAUBE anui Tinggwang de hing lulo anui ziuyi ziemne, iciude pa anuide peu ring bamlu kerane, pa henai kecang anuida tei kebam nzwa.25Magade anui RAMPAUBE anui Tinggwang dwade aja aidung pelane kainzeu lucai, pa pe sam anuide kaikebeu nzwa, anui masang kecume ge dizie.”
Bridge Connectivity Solutions Pvt. Ltd.