Hezaidung23
1Mi keheibede pe bom tei kedi gade mede dang mpet kedi gade rezam kedime RAMPAUBE gu mina maa ga nlüt gailak.2Hekakna RAMPAUBE gu minadung maa ga ncüt lak; pe leuhme ceheu kereibe ga kecang de, penui migede RAMPAUBE gu mina maa ga ncüt gailak.3Ammonme ge mede Moabme RAMPAUBE gu mina maa ga ncüt gailak; pe leuhme ceheu kereibe kecang gade, penui migede RAMPAUBE gu mina maa ga ncüt gailak.4Aide nnui Egypt gade mpet kecudau penui tangku nah dui pwalwe nnuide lampui gade dau kemak ziemne, nah penui Beor napei Balaam de, Aram Naharaim lungga Pethor gade nnuide reset kerane li kegai ziemne.5Dede RAMPAUBE nnui Tinggwang Balaam kwa kingnei ma; meliene, RAMPAUBE nnui Tinggwang reset teu nnui ziemne samlam ge teibeu, kedanemene RAMPAUBE nnui Tinggwang nnuide ku kecune. 6Nnui penui kezuyi mede lungh keyi madaude peei kerabe ma, nnui lungh kebam ting pelane ga.7Nnui Edomme de gi diso bi, kedanemene pa nnui sinabe lu; nnui Egyptme ge de nneu so, kedanemene nang sangme ge tei eh pe deu ga lungh.8Ceheu kecumbe ga penui leuhme Edomme nah Egyptme dade hena lung kelube RAMPAUBE gu minadung maa ga ncüt lubui.9Nnui reugwame ge tei eh nnui ngauraume de regi kera tet kepet dau, iciu kecudau nnui nnui katei de heradi kerabe leune gade ketiplu maisia.10Magade nnui kakga mi keheibe de mci kemakme ge tingmui dau tei kedi ziemne bam cai, ciucai pa reugwame ramzeuki gade mpetdi maisia; pa ramzeuki ga cailigwang dai daulak. 11Tinghegi di sangne, pa pekatei pecu duipia di maisia; tingnaimiak kenlüt dau, pa ramzeuki lung ga gwang dai luzie.12Nnui mie bam kerane ramzeuki gwale de heni ge bam maisia;13nah nnui mata keu teicu niadung kakga ma kui kera ge la zie; nnui keukei mie nnui katei de tei mcang kecudau, nnui cide le kuilu maisia nah pecai tangdei keupwa cide met dilu n dade kempet de.14Kedanemene RAMPAUBE nnui Tinggwang nnuide peu ngkienglu kerane nah ngauraume de nnui ba gage kaibeu kerane nnui ramzeuki kakga tet la. Ciziemne nnui ramzeuki mci bam lu maisia, iciude pa nnui kakga mcikemak magede de ngau melu kerane nah nnui dade nreu tetdi melu kerane.15Nnui kilame ge pe mpaube dade pak tetdi kecume ge pe mpaube da ngngwa gwang dai beu kerabe ma.16Peu pecu ntai ga lunghlu, pa ne kedet kecube namceu keheibe ga. Pecu teikeherei so.17Israelme mipui mede mipei kerecaki helipui mede helipei tei kerabe ma. 18Nnui helipui gu ziehidung mede recaki helipei ziehidung keheibe sampet ziemne RAMPAUBE nnui Tinggwang ki ga keugwang so; kedanemene aipau kena de au RAMPAUBE nnui Tinggwang ngkaula kecu ziemne.19Nnui releu beuso pekai keteibe nui zangme Israelme dage, peusa gu pekai, taktyei gu pekai, mede keheibe pekai tei eh releu beu kedi.20Nnui sangme dage pekai tei eh releu beu lubui; dede nnui zangme Israelme de au pekai tei eh releu beuso, iciu de RAMPAUBE nnui Tinggwang nnuide samlam beu lubui n ba kekai leune ga, nang hangdeu gumlai eh kebam ga.21Nnui RAMPAUBE nnui Tinggwang dage sampet kecu dau, nnui pegwa tei kecu ga mneu di mene tei maisia, kedanemene RAMPAUBE nnui Tinggwang cide n dade luu bizie; cide tei kemak au kemau ge dizie.22Dede magade nnui sampet kecu gade ketip luzie cai, cide n ziemne kemau ge ma.23Nnui muileudung gade mpet kedi au nang pie delwe teilu maisia; RAMPAUBE nnui Tinggwang da, nnui sampet kenzeu nzwa, keheibe de nnui nnui mui gade nzaha eh sampet gai kebeu nzwa.24Nnui nnui kidabe gu kubetsi luh ga lüt kecudau, nnui kubetsi tyei keneu kiee ge tyei lubui, dede nnui gu raptui gage made kaiso.25Nnui nnui kidabe gu herei meu kecu luh ga mie kecudau, nnui herei peudung nnui ba le kiak lubui, dede nnui kidabe gu herei meu kecuga tangkane le get so.
Bridge Connectivity Solutions Pvt. Ltd.