Hezaidung17
1Nnui RAMPAUBE nnui Tinggwang dage hetum mede meurün zamra kedi be mede ma kesiabedung le ratak tei so, kedanemene cide RAMPAUBE nnui Tinggwang ngkaula.2Magade nnui kakgade ngau cai, RAMPAUBE nnui Tinggwang ne nnuide peu kebam nnui namdi rieki keheibe lungga de, mipei mede mipui keheibede RAMPAUBE nnui Tinggwang miakngau gade kemau tei kela nah pe samkakkelu de gi kah eh,3keheibe de cau mie eh hera kedadung de reca nah penui da keu mie, tingnaimiak, hekei, mede tinggim ga kebam hegidung gede, magede Ih ne aja kai kemak de,4nah nnuide maha aide ranglia cai, mede nnui aide siulu cai, ciude nnui pie gapte eh tei teune maisia. Magade aide kesang cai, nah cinzwa kemau Israel ga tei kebam de kesang cai, nnui ainzwa tei kerabe.5Nnui cipau mipei mede mipui de de ngngwa gwang maisia, kemau aide tei kedime de, nnui namdi herieki ga, cipau mipei de mede mipui de de, nah nnui cipau medungde tangtsu le samtset dilu. 6Mi hangna mede hangcum kemau zierang tei kedi caine tsai bi kerabe de teitsetdi lubui, dede hangge zierang rünne cai pecu teitsetdi kerabe ma. 7Zierangme ne keraibe tei eh pecu teitset kerabe, nah pecai mina pelane heba kai zie, nah nnui kakgade kemau keugi dizie.8Magade maha n ziemne tiak kera pa ham kecu gwang cai, daptset kedi tu mede teimau eh teitset kedi, mige mjeu nah kedage mjeu pei, mede mide tei rezam kedi ha tudung, mede ma keda ha ge, nnui namdi rieki lungga kehebwak tudung, ciucai RAMPAUBE nnui Tinggwang ne kedet kelu pe kereca ni ga hanglu maisia. 9Nnui cingkume da mie maisia, Levi leuhme da, nah tutiakme cau cipau tingdau heta tei bam kela da; nnui penui dade ma keteulu, nah penuine nnui tutiak tei beuzie.10Pecai nnui penuine nnuide tei lulo rang kebeu siakte tei zie, RAMPAUBE ne kedet kera heni gade. Penui nnuide ledeu kebeu leune mriak eh teilu.11Penui nnuide ledeu kebeu hezai de mzailu, nah penui nnuide rang kebeu leune teilu. Penui nnuide rang kebeu de gade nreu tet diso, nzet le mede hile ge.12Keheibede pezai di eh, cingkupei RAMPAUBE nnui Tinggwang dwaga sap kebam peta tei lai kebam sam kingnei mecai, mede tutiakpe sam kingnei mecai, cipau peide tsai dizie; nnui ma kesiabe Israelme dade keu gidi zie.13Mina leune siu nah ngngi zie, nah pezai kedi teisi lak.14RAMPAUBE nnui Tinggwang nnuide kepeu deu ga nnui gwang keludau, nah nnui cide gumlu de nah nnui cika lungh ndeu lude, pecai nnui rang eh, ‘Ih hegwang ge akatei a ziemne kedet luzie, twagwapung kebam heleuh pelane nzwa,’15pecai RAMPAUBE nnui Tinggwang ne kedet kerabe de nnuikatei ziemne hegwang kedet bilu. Nnuikatei nnui ziemne hegwang kedetlu nnui leuhme kakgade. Nnui reuga, sangme, nnui leuhme kemakme de kai so.16Dede pa pekatei peziemne hekwen tei ngkiee lak, mede mina de peu Egypt ga cailigwang dilak iciu eh pa hekwen nküt kieelu kerane, kedanemene RAMPAUBE nnui dage ranggai, ‘Nnui lampui cide ga madaude cailimie dai lak.’17Pa pekatei ziemne pe nau tei kiee lak, iciude pe mlung nreu tetdi melu kerane. Pa rangkang geu nah kecak hekwa kiee lak.18Pa pe hegwangbam ga bam keludau, Levime cingkumedung dwa ga kebam hezai de gade, pekatei ziemne laisiudum ge gage aipau hezai de raulu maisia.19Laisiudum aide pe taiga bam maisia, nah pa cide pe teilung zie tane pei zie, iciu eh pa RAMPAUBE pe Tinggwang de rütlu kerane, iciulu eh aja kai kebeudung nah hezai sam aidungde pelane mneilu kerane.20Pa aide tei maisia iciu eh pe mlungbe pe sinamedung reu hegie helia di melu kerane, nah ciu eh pa nzetle mede hile de, hezai kai kebeudung gade nreu dilak; kedanemene riem pwa kebam pa pe teilung mmi kekiee ge hegwang teilu kerane, pa nah pe name, Israel kakga.
Bridge Connectivity Solutions Pvt. Ltd.