Hezaidung12
1Hezai kai kebeu nah hezaidung aidungde da, RAMPAUBE nnui paume Tinggwang ne, nnuide hangdeu gum kera kepeu deu de ga tei mzai kera, nnui kideu ga lungh kebam tingbazie pelane.2Nnui ngkap kedi heleuhdung penui rabedung de reca kela henidung de, lamlwatudung kecehu ga, kideutuhdung ga, nah tsingbang kemdiak kebam heni pelane de teimsia bi dizie.3Nnui penui recabamdung tei msiadi maisia, penui tsusumdung teipang kecaidi, delwe penui gu Asherah mie rudi. Nnui penui rabedung mie heri keludung de dum tüt kecai dilu maisia, nah cipau bam gade penui zi mai gidi.4Nnui RAMPAUBE nnui Tinggwang de cinzwa reca lak.5Dede nnui leuhme pelane deu kakgade RAMPAUBE nnui Tinggwang heni ge kedetlu zie pezi peu bam kera, cika pa kebam heni ge zie, delwe cide ga nnui mie zie.6Cipau bam ga nnui keru recadung, nnui ratakdung, nnui kereizige, nah nnui ba le reca mapeu pwa kepeu, nnui sampet kelu reca mapeudung, nnui mta reca mapeudung, nah nnui kauruine nah hekaune mciu kelu raitubedung nnui cide pwa gwang zie.7Cikade nnui nnui RAMPAUBE nnui Tinggwang dwa gade matyei zie nah nnui heta tei kegai leune gade suiyi ngau luzie, nnui nah nnui kelakdung, RAMPAUBE nnui Tinggwang nnuide samlam kebeu gade.8Anui henai aika tei kebam ma pelane nnui tei lak da; cu au mi leune de pe miak gade dai petau bi tei bam dida;9kedanemene RAMPAUBE nnui Tinggwang nnuide gum kera pwa peu kebam ga, nnui gwang mtak cang mereu kecune.10Dede nnui Jordan kahpet eh RAMPAUBE nnui Tinggwang ne nnuide pwa kepeu hangdeu de gumlu eh cika lungh dizie, nah pa nnuide nnui ngauraume pelane twagwapung kebam gade peu kwak luzie, iciu eh nnui lungh ziune eh lungh luzie.11Cidau RAMPAUBE nnui Tinggwang heni ge kedet luzie cika de pecu herüt peulu kerane, cika Ih nnuide aja kai kebeu ma pelane teu gwang zie: nnui keru recadung, nnui ratakdung, nnui kereizige, nah nnui ba le reca mapeu pwa kepeu, nah nnui gu recadung yitube sampet ziemne RAMPAUBE dage nnui sampet kera de.12Nnui RAMPAUBE nnui Tinggwang dwa gade n suiyi luzie, nang, n napeime, n napuime, n kila peimedung, n kila puimedung, nah Levime n herie lungga kebammedung, kedanemene pa au nnui kakga hema mede mapwa gumlu kera gah.13Nnui heni kengau leune ga nnui keru reca tei lak lie kecu de nnuikatei nnuide teu mriaklu;14dede nnui RAMPAUBE ne nnui heleuhdung kakgade kedet kelu heni de gage nnui keru recadung peu zie, nah nnui cika Ih aja kai kegai ma pelane tei zie.15Cinzwa liede, nnui nnui herie lungga kebam makaunedung pelane teitset lwe tyei lubui, nnui suira tei eh, RAMPAUBE nnui Tinggwang ne nnuide ma pelane pwa samlam kebeu gade; mci kemakbe nah kemcime hang nana cide tyei lubui, makaunedung helung nah heti kenzwabe.16Dede nnui hejai tyei lak; nnui kideu gage dui nzwa rui mpet gai dizie. 17Nnui lungh kebam herieki gade nnui meiciu kereizige gade nnui tyei lak, nnui zau kehecibe, nnui maca, mede nnui tumdung mede meuründung mciu raitube; nah nnui sampet kebeu keheibe de nnui ratak tei kegai heteih nnui tyei lak, mede mta reca mapeudung, mede nnui nnui ba gade reca mapeu kepeu dungde.18Meliene, nnui RAMPAUBE nnui Tinggwang dwa gade cidungde tyei zie RAMPAUBE nnui Tinggwang ne kedet kelu heni gade, nnui, nnui napeidung, nnui napuidung, nnui kila peimedung, nnui kila puimedung, nah Levime nnui herieki ga lungh kebammedung de si eh; nnui RAMPAUBE nnui Tinggwang dwa gade nnui heta tei kegai leune gade suiyi ngau luzie.19Ciu eh nnui nnui deu ga lungh kebam tane Levime de mlai melu kerane nnuikatei cet sünne lu.20RAMPAUBE nnui Tinggwang pa nnui dage sampet kebeu nzwa, nnui deurai tei mdi kecudau, nnui rang eh, “Ih teihring tyei zie,” kedanemene nnui hetei tyei neu kecune, nnui hetei tyei lubui, nnui keringria tyei keneu de nzwa.21Magade RAMPAUBE nnui Tinggwang pecu herüt peulu kerane kedet kelu heni de nnui dade dei zu di cai, ge nnui RAMPAUBE ne nnuide pwa kepeu nnui tumdung nah nnui meuründung kesa nnui teitset zie, Ih nnuide aja kai kebeu de nzwa; nnui nnui lungh kebam herieki gade tyei lubui, nnui keringria tei keneu de nzwa.22Helung nah heti tyei kela nzwa, nnui cide tyei zie; cide nzwa mci kemakme nah kemcimedung de cide tyei lubui.23Hejaidung tyei di lak kerane nnui ci bi lu maisia, kedanemene hejai ga keringria lalu; nnui hetei de si eh keringria tyei kerabe ma.24Nnui cide tyei so; dui nzwa nnui hangdeu ga cide ruigai zie.25Nnui cide tyei lak, iciu eh nnui ziemne yilu kerane, nah nnui cai nnui namedung de, RAMPAUBE miakngau gade nnui petau be tei keludau.26Dede nnui da kebam RAMPAUBE gu niadung nah nnui sampet kebeu reca mapeudung, nnui aidungde keulu delwe RAMPAUBE ne kedet kelu bam ga gwanglu.27Cika nnui RAMPAUBE nnui Tinggwang recabam ga, hetei nah hejai, nnui keru reca mapeudung peu zie; nnui ratak tei kegai hejaidung RAMPAUBE nnui Tinggwang recabam gage ruigai zie, nah nnui hetei be tyei luzie.28Ih nnui dage aja kai kebeu aipau samdung leune pie eh kingnei lulo, iciu eh nnui nah nnui namedung de nnui cai kelungta yilu kerane, cidau nnui RAMPAUBE nnui Tinggwang miak gade dai yi bi nah petau be teilu.29RAMPAUBE nnui Tinggwang nnui dwa gade heleuhdung de ngkap kedi dau, nnui penuide keugi kera nlüt, nah nnui penuide keugi keludau, nah penui deu ga lungh kelu dau,30nnui penui renet zaidung mzui kelak nnuikatei cet bilu, penuide nnui dwa gade ngkap kedi cai, penui rabedung de dainzwa reca zeu bikecu peilu eh, keteu, ‘Aipau leuhmedung de penui rabedung de dainzwa reca lano? Ih de cinzwa tei zie.’31Nnui RAMPAUBE nnui Tinggwang de cinzwa reca kerabe ma, kedanemene cidung pelane RAMPAUBE ziemne pa ngau ngkaukela kemneu be lu, penui aidungde penui rabedung da tei gai; penui rabedung ziemne penui penui napeidung nah penui napuidung de de mi ga ru gaila. 32Ih nnuide rang kebeu leune, cide tei mneilu. Cika ge magede kaisi so mede keu gi diso.
Bridge Connectivity Solutions Pvt. Ltd.