Hezaidung1
1Sam aidungde Moses ne Israelme Jordan kahpetlwe hetaideu ga, Jordan Reuki langkam langkie ga Suph de ncwa kebam, Paran, Tophel, Laban, Hazeroth, nah Dizahab kakga kebam pelane dage ranggai.2Horeb gade Seir Deutu lampui gade Kadesh Barnea ga kegwang ziangreieket ketet beuh ge.3Israelme Egypt gi kedicai mmi riakdai bekum, kei kereieket bekei, tingbazie raitu benai, Moses Israelme dage ranggai, penui dage penui ziemne RAMPAUBE pecu ranglo aja kai kebeu pelane rangbeu.4Aide RAMPAUBE Amorme gwangpei Sihon, Heshbon namceu ga lungh kebam, nah Bashan gwangpei Og, Ashtaroth namceu ga lungh kebamde Edrei namceu gade ngamkedi caine.5Jordan kahpetlwe, Moab deu gade, Moses keledeu sam aidungde rangmci lia cuh, rang eh,6“RAMPAUBE anui Tinggwang Horeb gade anui dage rang, ‘Nnui aipau lamlwatu pi ga lungh tietau dida.7Nreulwe tetgai cu, nah Amorme hangdeutu deudi ga miecu nah cide taiga kebam heni pelane ga Jordan Reuki langkam langkie ga, hangdeutu deudi ga, hangdeu kehenahdung ga, Negev ga, nah jaadikung gadung, Canaanme deu ga, nah Lebanon ga kereuki kedi, Euphrate ga kecang.8Pielo, Ih nnui dwaga hangdeu mteipwa bamda; mielu delwe hangdeu de gumlu RAMPAUBE ne sampet kebeu nnui peime da, Abraham, Isaac, nah Jacob dage, penuide nah penui leuhme penui cai lungh kegwangme de peu kerade.’9Cidau Ih nnui dage rangbeu, ‘Ih akatei nnuide pung pa gailak.10RAMPAUBE nnui Tinggwang nnuide tei ngkiee beuda, nah, pielo, nnui henai au tinggim ga hegidung kieege dida.11Peu RAMPAUBE, nnui peimedung Tinggwang de, nnui cu kebam swade nnuide cangcang kieege teingkiee si beulu, nah nnuide samlam beulu, pa nnui dage pe sampet kebeu nzwa!12Dede dainzwa eh Ih akatei pung pa lulai nnui pütdung, nnui reidung, nah nnui kehebwakdung?13Makecime de, macetkeyi minadung de, nah rütlu kebui minadung de heleuh ramsang gade kedetlu, nah Ih penuide nnui reu peu keteume tei beuzie.’14Nnui acu keligai nah rang, ‘Nang rang kebeude tei kera ma keyige delie anui ziemne.’15Cine Ih luu luda nnui leuhme pe peu keteume de, makecime de, nah rütlu kebui minadung de, nah penuide nnui reu pe peu keteume tei luda, cangge muibedung, hai muibedung, riakngei muibedung, kerei muibedung, nah kedime, heleuh pelane ga.16Cidau Ih nnui gu tutiakmedung dage aja kaibeu, ‘Nnui sinamedung kakga kehebwakdung de kingnei lulo, nah makesang gage hetu tiak siakte lulo mige nah pe sinapei kakga, nah sangme pecu ngngwa kelabe de de.17Nnui kehebwak kecuga migede de heneu herüt tei diso; nnui keceu gede nah kedi gede kingnei lu. Nnui migede de hing dilak, kedanemene tiak kelude au Tinggwang dade lu. Kehebwak tiak kera nnui ziemne hungham kedibe, nnui a da teugwang zie, nah Ih cide kingnei luzie.’18Ih cidau nnui tei kerabe pelane nnui dage aja kaibeu dida. 19Anui Horeb gade tetdi nah kedi nah kengngi hetaideu pelane nnui kengaude kahgwang da, Amorme gu hangdeutu deudi ga gwang keladau, RAMPAUBE anui Tinggwang ne aja kai kebeu nzwa; nah anui Kadesh Barnea ga gwang canglu.20Ih nnui dage rang, ‘Nnui Amorme gu hangdeutu deudi ga gwang luda, RAMPAUBE anui Tinggwang ne anuide peu lai eh kebamde.21Pielo, RAMPAUBE nnui Tinggwang nnui dwaga hangdeu mteipwa bamda; nghang cu, delwe gumlu, RAMPAUBE, nnui peime Tinggwang, nnui dage rang kebeu nzwa; ngngi diso, mede lunghau diso.’22Nnui pelane a da gwang eh rang, ‘Anui midungge de anui dwa langnswa gaigo, ciude penui anui ziemne hangdeu peei beulu kerane, nah anui daipau lampui gade gwaketang ziebi kecu sam teugwang beulu kera, nah anui daipau namdi ga gwang ziebi kecu.’23Cipau kecet de asui di; Ih nnui mina kereiekena de kedetlu, hangge heleuh ramsang gade.24Mina hangkereiekena aidungde tetpwa hangdeutu deudi ga nghang di, delwe Eshkol langkam ga gwanglu, nah cide galu.25Penui hangdeu cikade ngaukelu ginia kesa penui ba gage pwagwang nah anui da pwa nghung beu. Penui anuida sam teugwang si nah rang, ‘Hangdeu keyi gelie RAMPAUBE anui Tinggwang anuide peulai eh kebamde.’26Dede nnui RAMPAUBE nnui Tinggwang aja kai kebeude de reniadi, delwe mie regi raudi.27Nnui nnui paikidung gade ncamdi eh rangdi, “Aide kedanemene RAMPAUBE anuide ngkau kecune pa anuide Egypt deu gade ngngwa mpetlu, anuide Amoritme ba gage kaibeu eh anuide teingkap dilu kerane.28Anui cu daiga mie lulai? Anui siname hangkereiekena ne anui mlung tei nceu dida, rang eh, ‘Cika minadung au anui swade di nah tieki lie; penui namdidung de kedige nah riepwa tinggimdung tungcang lie; cipau reude, anui Anakimme napeidung de cikade ngau.’”29Pecai Ih nnui dage rangla, ‘Ngngi diso, mede cidungde de hing so.30RAMPAUBE nnui Tinggwang, nnui dwaga tet kelabe, pa nnui ziemne regi beuzie, pa Egypt ga nnui miakdwa gade maleune tei kegai nzwa,31nah hetaideu gade de, nnui ngau da RAMPAUBE nnui Tinggwang nnuide dainzwa pungbeu bi kecu, mipei ge pe na de pungla kecunzwa, nnui kemie leuga nnui heni aika gwang cang kemaktane.’ 32Dede sam aide caide nnui RAMPAUBE nnui Tinggwang de nlumlu tadi,33nnui dwarai eh tet kemiebe de nnui ziemne heni ge pei kera ramzeuki tei kerane, tingmui mi pwa eh tet nah hemwa ne ting kebaadau.34RAMPAUBE nnui samdung kwa siulu nah pe rata di; pa sampet nah rang,35‘Ceheu kemau aika migede Ih nnui paumedung de peu zielie a sampet kaikebeu hangdeu keyi de ngau lak,36Jephunneh napei Caleb rünne gwale; pa cide ngau zie. Pecu Ih pa hangdeu mie ga kelude peuzie, nah pe namedung de, kedanemene pa RAMPAUBE caisui cangsiak kelune.’37Nnui ziemne RAMPAUBE acude pe rata di, rang eh, ‘Nang de cika lüt lak;38Nun napei Joshua, nnui dwa sap kebambe, pa cika lüt zie; pecu teingkuu lu, kedanemene pa Israelme de teuswa eh cide gumlu kerane.39Cipau reude, nnui name henamedung, tuiteu dizie lie nnui rang kecudung de, henai keyi kesia cigai kelakdung, penui cika lüt zie. Ih penuide peuzie, nah penui cide gum luzie.40Dede nnui ziemne au, nreulu nah caili tetgai cu hetaideu gage Jaaidi Kegie le ge tet gailu.’41Pecai nnui keligai nah a da rang, ‘Anui RAMPAUBE de mcau eh kemau tei dida; anui nghanglwe regi zieda, nah RAMPAUBE anui Tinggwang anuide tei lulo eh aja kai kebeu leu caisui zieda.’ Mina leune nnui kakga kebam keregi kera niadung kailu, nah hangdeutu deudi de ketang kera nnui mtei lu.42RAMPAUBE a dage rang, ‘Penuide rang beulo, “Gwaketang nah regi lak, kedanemene Ih nnuide ngngwala lakta, nah nnui ngaurau medung ne nnuide ngamdi zie lu.’ ”43Ih nnui dage ainzwa rang beuda, dede nnui kingnei ma. Nnui RAMPAUBE aja kai kebeu dungde de renia di; nnui mnei ma nah hangdeutu deudi de gwaketang.44Dede Amormedung, hangdeutu deudi ga kelunghme, nnuide mmaudi nah tegeine nzwa nnuide gwapet, nah nnuide Seir gade ngamlu, Hormah namdi ga kecang.45Nnui cailigwang nah RAMPAUBE dage hapgai kengha kie eh; dede RAMPAUBE nnui kwa kingnei ma, nah pa nnui dage pelung kaiswa tadi.46Cine nnui Kadesh ga tingbazie ketiege bamdi, nnui cika bam kecu tingbazie pelane.
Bridge Connectivity Solutions Pvt. Ltd.