Bata27
1Anuide peu liem gade Italy deudi gage tetgai zielie mtei luge, penui Paul nah hebaangme kedadung de pwa Augustus reugwa ga haireu kedibe Julius ba gage nlum beudi.2Iciu eh anui Asia deuceu liemtau bamdung ga gwang zielie kebam Adramyttium liem ga nlütlwe anui liem taugai. Thessalonica namdi ga kebam Macedoniame ge, Aristarchus, anuide nzangla.3Pecia benai, anui Sidon namdi ga gwang canglu, cikade Julius Paul dade pe zai yi eh pecu pe zangmedung da mie kera peu iciu eh pa penui ngha ngaulu kerane.4Cikade anui jaaidi gage tetgai nah Cyprus duigwadeu nreule gade liemtau gwangdi, kedanemene tingkai anui dwa lede gui gwang kelane.5Anui jaaidi gade Cilicia nah Pamphylia de tetkah luge, anui Lycia namdi Myra ga gwanglu.6Cikade, Alexandria gade liem ge Italy ga gwangkela ngaulwe haireu kedibe anuide cika peu lütlu.7Anui tingba zie kekiee ge liemtau mneu süt eh tetgai nah kehereisüt eh Cnidus namdi taiga gwangcang luge, tingkai peu anuide cilambie gwangsi tadi, cine anui Crete kung gade liemtau gwang, Salmone namdi de gwang mcwalu.8Cine anui kehereisüt eh duikung kemna ga tetla, nah anui heni ge Kekwak Liemtaubam lie qukela ga gwang canglu, cide Lasea namdi taiga.9Dede peting ketiee ge ngngwangdi, nah liem beuh ketei kengngi bamdi, kedanemene Jewme kemmwang tingde cang kedine. Cine Paul penui dage ma ranglia eh cu,10“Minadung, Ih a kecet anui dui gade kembeuh rezam zie nah kapsüt zie, mania nah liembe rünne ma, dede anui keringriabe de.”11Dede haireu kedibe Paul ne kerang samdung swade liem keteube nah liem mpaube sambe kingnei kidi.12Kedanemene liemtaubam cide ga tingtiak ting ngngwang kera petau kemak ziemne, liem ga kelame kekiee cikade tet pwa teilu buicai Phoenix liemtaubam dega gwanglwe cika tingtiak ting ngngwang kera cetlu—cide Crete ga liemtaubam ge, naimiak kenlüt tingpile nah naimiak kenlüt tingpeule bie mcwabam.13Tingpile tingkai gui mtei mene gui kegwang dau, liem keteume penui teu maikesia de penui ngaulu delie cetdi. Cine penui liem geukang de teu ncuhdi eh Crete kung kemna ga tet ladi.14Dede zette, tingkai kechi, “Northeaster” lie qukela duigwadeu lamde guigwang.15Tingkai kechi de guigwang liem de sam nah liembe tingkai de lie gailak dige, anui tingkai kechide de peu liem gui keling pwa ladi.16Cine anui tetpwa Cauda de qukela duigwadeu keceu nage kungga tetgwang nah teipasüt eh liemceuna de kezeulu.17Penui liemceuna de teucuh luge, penui heriadung gele liembe kang ntip sütdi. Penui liem guipwa Syrtis heciang gage kaidi kera hingdi, cine penui liem paide tei henah ngkeidi eh peu tingkai de liem guipung ladi.18Dede rahang dene anuide gui kelien msiasüt kedine pecai benai penui liem gade maniadung kesa kelien gi cuhdi.19Lang pekecum benai de penui liem nia kesa kelien gidi.20Tingbazie kekiee ge tingnaimiak mede hegidung de ngautadi, nah rahang disüt bam kedine, anuide kelilu kera keregui kette gahdi.21Penui matyei mene peting ketiee ge la dige, Paul liem ga kelame dwaga saplwe rangdi, “Nnui minadung, nnui a sam kingneilwe Crete gade tet tadi kerabe, iciucai aipau keherei nah kekap de mbai luzie nage.22Dede Ih cu nnuide kuu lulo ranggaila, kedanemene liem de rünne gwale nnui kakga keringria gede gah dilak.23Kedanemene n zieziu Ih pe gwatei kela nah Ih pecu recakela, Tinggwang samgwame ge gwang a taiga saplwe24ranggai, ‘Ngngi so, Paul. Nang Caesar dwaga sap maisia, nah ainie, Tinggwang n ziemne pe ngaugia gade ncu ngngwa liem ga kela leune de teilung kelibeu da.’25Ciziemne, minadung nnui lung kuu lulo! Kedanemene Tinggwang a dage kerangde siakte teilu kera Ih nlum kelane.26Dede anuide duigwadeudung ge gage kaibeu bizie.”27Tingmuiziu kereimdai beziu gwang cang luge, anuide Adriatic jaaidi gade gui kelien nghung nghang eh keladau, muisum ting dauge liem keteumedung penui hangdeu ge ga gwang nna la delie cetdi.28Cine penui dui kecok mdet pie, ge feet haige ngkai kecu ngaulu; dede penui manage tetpet gai eh penui dui kecok mdet dai nah penui pecok feet haige ngkai bam eh ngaulu.29Anui tsura reuga gwangdi kera penui hing kedine, penui liemgeukang mdai liem cailede teu henah miedi delwe tingba pet kera kie bamdi.30Dede liem keteume liem gade pakdi kera mtei bamdi nah liemceuna de jaaidi gage teu henah mielwe liem geukangdung de liem dwagade pwa nghung kera ciem tei bamdi.31Dede Paul haireu kedibe nah regwamedung dage rangdi, “Mina aidungde liem ga bam mecai, nnuide keli gailak.”32Ge reugwame liemceuna riadungde dangdi eh peu cide pung tetdi.33Tingba pet rage, Paul penui pelane de matyei lulo rangbeu. Pa rangdi, “Nnui magede tyei mene kwala kedi henai tingba ziangreimdai benai dida.34Cine Ih nnuide ketyeipok kesa tyei lulo kecung gaila, cide nnuide tei ngkieng beuzie. Nnui peu gade tam lei gede gah dilak.”35Pa aide rang eh tangku keu luge, pelane dwade pa Tinggwang de twagai. Pecai pa tangku panglwe tyei cuhdi.36Iciu ge penui pelane de teingkuulwe penui ketyeipok tyeilu.37Anui pelane ge keringria 276 liem gala.38Penui matyei nggei luge, penui jaaidi gage wheat keliengai eh liembe teimca lu.39Tingba luge, penui hangdeu cilu tadi, dede penui duidi kemza ge pe kung si eh ngaulu, nah cikage liem teunlüt lubui mi de penui mpau.40Cine penui liem geukangdungde hiaklwe jaaidi gage kaidi nah penui kehereudung kangpwakela riadungde hiakdi, delwe liem dwale kela paide tingkai gage teuncuh gailwe penui rejaaikung lebie tet gaidi.41Dede penui duicui kena keredau heni gega gwanglu nah liem be nyasai gage ntaudi. Ge liem dwale rapwa bamdi eh nlailu tadi, dede liem caile duicui kengkieng ne teipangdi.42Reugwamedung hebaangme de peu migede de duikung ga zak mpet eh pakdi melu kerane penuide teitsetdi kera riemlu.43Dede haireu kedibe Paul de kelilu neudi, cine pa penui ciem de kaamdi, nah pa dui zaklu kebuime dui gage nsaugai railwe kecang ga mpet lulo aja kaibeu.44Pecai kedamedung pelane, kesame tsingpak nah kesame ma kedabe liem gade kempetdung pinglwe penui cai sui lulo beu, ainzwa delwe anui pelane kwak eh kecang ga mpetlu.
Bridge Connectivity Solutions Pvt. Ltd.