2 Samuel15
1Cinzwa kedi cai, Absalom pekatei ziemne bagi ge nah hekwendung pekatei ziemne, nah mina riakngei pe dwa pak swa kera si eh mteilu.2Absalom cuh zilu delwe namdi kirieki de ga lampui kung ga mie sap bam dila. Mina keheibede ma kehebwak tei mcilu neu eh hegwangpei da gwang kecudau, Absalom pecu qulu delwe rangla, “Nang dai namdi gade gwang lano?” Ge minabe pesam kelila, “N kilabe au Israel leuhme ket paube gade lie.”3Cine Absalom pe dade rangla, “Pielo, n ha au yi nah petau bamda, dede cika n ha kingnei kera hegwangpei ding tei kebam mide gah.”4Absalom rang si eh cu, “Ih hangdeu ga dai kenzwa gede tutiakpei lie neu no, ciciude mina leune ma kehebwak mede peziu rangneu kelabe ada gwang lubui, nah Ih pecu kemzeube peu lubui!”.5Cine cinzwa eh mina keheibe de Absalom de rüt kera peda gwang ge, Absalom peba mzang pet pecu pwalu, delwe pecu kemamla.6Absalom Israelme kemzuibe peei eh hegwangpei da kegwangme leune dage ainzwa tei gaila. Cine Absalom Israelme dade penui suiyi lu.7Cinzwa eh mmi mdai cang kelu dau, Absalom hegwangpei dage rangdi, “Kehereide acu peu Hebron ga mie delwe Ih RAMPAUBE dage sampet kegai de tei lulo.8Kedanemene n kilabe Aram deu Geshur ga lungh keladau Ih sampet nzeu, rang eh, ‘RAMPAUBE acu Jerusalem ga ngngwa gwang dai kesang beu liecai, ciciucai Ih RAMPAUBE de reca zie.’”9Cine hegwangpei peda rangdi, “Lungciep teu eh miecu.” Cine Absalom cuhlu delwe Hebron ga miedi.10Dede Absalom Israel leuhme pelane dage aide rang beulo eh reketmedung de langgai, “Nnui telui kwa siulu herizi, ‘Absalom ne Hebron ga hegwangpei tei dida’ de eh nnui rang maisia.’”11Absalom penuide qu kegai ga mina haina ge Jerusalem gade pecu ngngwa tetti. Penui Absalom heciem riem teu kelade magede cimene penui penuilung keyi mning eh tetdi.12Cidau Absalom ratak teibam ge, pa Ahithophel de pe nam Giloh gade ngngwa gwang kera langgai. Pa au David keledeube. Absalom ngau kerau ciem de ngkieng cuhdi, kedanemene Absalom caisuime kiee reureu kedine.13Samgwame ge David da gwang ranggai, “Israel ga mina mlungdung Absalom caisui dida.”14Cine David pe kilamedung Jerusalem ga pecu ngngwa kebamme pelane dage rangdi, “Cuhlu nah anui pak cugo, mecaige anui migede Absalom dade pak gailak. Zette tetdi kera mteilu, mecai pa aika kelwa gwang anuide ngamlu nah pa anui reu gage makesia teugwang zieda nah namdibe ga kingtie mui le gwaketang zie da.”15Hegwangpei kilamedung hegwangpei dage rangdi, “Pielo, n kilamedung anui mpaube hegwangpei makeheibe de cet eh teilu kera mtei luda.”16Hegwangpei nah pe kilungme pelane pecai tetdi, dede hegwangpei nauseupui kerei gede hegwangki kwa kera kainzeu di.17Hegwangpei nah pe mina pelane pecai tet dicai, penui ki kamtu ga mtaklu.18Pe reugwame peciakne de pecu ngngwa tetcu, nah pe dwa ga Kerethitme peciakne, nah Pelethitme peciakne, nah Gittitme peciakne, mina hai herok Gath gade pe caisui kelame tetdi.19Ge hegwangpei Gittitme Ittai dage rangdi, “Nang daitei anui de ngngwa mie lano? Cailigwang cu delwe hegwangpei de ngngwa bamlu, kedanemene nang au sangme ge nah n nam gade sangme teila. Nang n bam ga cailigwang cu.20Nang nziene tet kedine, Ih daitei ncu peu anui pelane reuga ngngwa huirwa la laino? Ih daiga mie lau bi kecu Ih de cima. Cine cailigwang cu delwe n maame de ngngwa caili dailu. Peu herüt nah masang de nda la lulo.”21Dede Ittai hegwangpei sam keli eh rangdi, “RAMPAUBE ringkela nzwa, nah a mpaube hegwangpei ringkela nzwa, kesang a mpaube hegwangpei kemie leune ga, n kilame de cika mie zie, cide pekie ring kebam mede ketsai kecang liede.”22Cine David Ittai dade rangdi, “Ciciucai tet gaicu, delwe anuide nzang jüja lu.” Cine Gittitme Ittai hegwangpei de ngngwa nah pe minadung pelane de nah pe kelakdung pelane pecu ngngwa kelame de nzang tetgai.23Mina pelane Kidron Langkam tetkah kecudau nah hegwangpei pekatei de si eh tet kah kegwang dau, deudi pelane sahbak eh hapdi. Mina pelane hetaideu lebie lampui gage tetgai di.24Zadok de Levime pelane de ngngwa Tinggwang samkakbung de pwa lwe, cika la. Penui Tinggwang samkakbung de heu ngkeilu nah cidau Abiathar de penuide ncütlu. Mina pelane namdi de gade tetkah di kemaktane penui kwabam.25Hegwangpei Zadok dage rangdi, “Tinggwang samkakbung de namdi gage pwa caili gaidi. Ih RAMPAUBE miakngau gade pe suibe teilu liecai, pa acu aika ngngwa cailigwang dai zie nah samkakbung de nah pa lungh kebam ni de keulia dai zie.26Dede pa magade, ‘Ih au ncu a suilu ma,’ de eh rang cai, pielo, Ih aika bam, peu pecu a dage makeheibe de pe suibe teigai lulo.”27Hegwangpei cingkupei Zadok dage rang si eh, “Nang caihakecibe meni? Nnai napei kena de nnai ngngwa lwe namdi ga helung nciep eh cailigwang lu, n napei Ahimaaz nah, nah Abiathar napei Jonathan.28Pielo, acu rangbeu kera nnai dade sam gwang kemaktane Ih Arabah ga kereuki kahpet kera ga kwabam luzie.”29Cine Zadok penai Abiathar Tinggwang samkakbung de pwa Jerusalem ga cailigwang eh penai cika bamdi.30Dede David pe picum pung mene nah hap eh Olive Deutu ga hangdi, nah pa pepeu hezui lu. Pecu nzang kela mina leune pe peu hezuilu, nah penui hap jüja eh tet hangdi.31Mige David dage rangdi, “Ahithophel Absalom renia kela ga sila.” Cine David kie eh cu, “O RAMPAUBO, kehereide Ahithophel keledeu de kemta tei dilo.”32Cinzwa eh David lampuiki nreutu gade Tinggwang de reca kela ga gwangcang keludau, Arkitme Hushai pepai hietdi nah pepeu gage tangdei kailwe pecu redau kera gwang.33David pe dage rangdi, “Nang acu ngngwa hebeuh teicai, nang aziemne kehebwak ge zie.34Dede nang namdi ga cailigwang eh Absalom dage aide rang cai, ‘Hegwangpei, Ih n kilabe tei zie, Ih pedwa n pei kila tei kegwang nzwa, cu Ih n kilabe tei zie,’ Iciude nang a ziemne Ahithophel keledeu kepeube de tei kebwak dizie.35Cingkupei Zadok penai Abiathar ncu ngngwa bam lak ni? Ciude nang hegwangpei ki gade siu kelu leune, nang cingkume Zadok penai Abiathar dage cide rangbeu lu maisia.36Pielo penai napei hangna Ahimaaz, Zadok napei nah Jonathan, Abiathar napei, penaide ngngwa bam. Nnui siu kelu leune penai ba gade nnui a dage langgai lu maisia.”37Cine David zangbe Hushai, Absalom gwang canglu eh namdibe ga gwanglu nah Jerusalem ga nlütdi.
Bridge Connectivity Solutions Pvt. Ltd.