2 Kings5
1Cu Naaman, Aram ga hegwangpei gu reugwa muibe, pe gwangpei miakngau gade mina kenlang nah kerütpeulu kebui ge, kedanemene pe dade RAMPAUBE Aram leuhme de ngkieng kelu kepeune. Pa au ngkieng nah kuusüt me ge, dede kempa mateei peda bam.2Aram ga reugwamedung Israelme deu gade mbai mie regi nah mipui nage de ngngwa lu. Pa Naaman nau kilapui teidi.3Cipau puina de pe mpaupui dage rangdi, “Ih a mpaube de Samaria ga lungh kebam caihakecibe da mie neu da! Ciciucai pa a mpaube pe kempa mateei de tei ngkei lubui.”4Cine Naaman mie nah hegwangpei de Israel gade ngngwa gwang lwe kebam releipuina dai rang bi paubeu.5Cine Aram gwangpei rangdi, “Cu miecu, nah Ih Israel gwangpei de laisiu ge langgai beuzie.” Naaman tetdi nah peda rangkanggeu talent kerei, kecak cang herok, nah paiheni kereleu kerei ge keulu.6Pa laisiu de Israel gwangpei da pwa mie kela de ainzwa rau nzeu, “Cu laisiu aide n taiga keugwang kecudau, Ih n dage Naaman a kilabe de langgai kecu nang ngau zie, ciciulude nang peda pe kempa mateei tei ngkeilu kerane.”7Israel gwangpei laisiu de pei keludau, pa pe paiheni teuhak eh rangdi, “Ih Tinggwang ni, teitset nah tei nring lu kera, mina aide acu peu pe mateei mpa kecu pei de tei ngkeilu neu lani? Dede cu cilu, pa acu ngngwa kesamlim lai eh kela peeila dida.”8Cine Elisha Tinggwang minabe Israel gwangpei pe paiheni teuhak kecu siulu ge, pa hegwangpei de sam langgai, “Nang daitei n niadung teihak bam no? Pecu peu cu a da gwanglo, nah Israel ga caihakecime bam kecu pa ci luzie.”9Cine Naaman pe hekündung nah pe bagidung teu lwe Elisha ki kikam ga gwang saplu.10Elisha pe dage samgwa ge de sam langgai, rang eh, “Mie delwe Jordan reuki gade nkatei ncu pia hena huidi, nah n pumteih nu nzwa yi dizie; nang mci dizie.”11Dede Naaman perata di eh tetdi delwe rangdi, “Pielo, Ih cet kecu pa ada kisie mpet bi zie delwe saplu nah RAMPAUBE pe Tinggwang zi de qu kera, nah pejam gadung peba le kemui gwang nah a mateei mpa kecude tei ngkei beu.12Damascus ga kebam reukidung, Abanah penai Pharpar, Israelme gu dui leune swade yiki meni? Ih cikade acu duipialwe mci gailak ni?” Cine pa nreucaili nah pe ratasüt eh tetdi.13Pecai Naaman kilame gwang nna eh pe dage ranggai, “A pei, magade caihakecibe ncu tei kepa ge tei lulo aja kaibeu cai, nang tei mene tadi zieni? Iciucai, pa ncu, ‘Nkatei ncu dui gage mpunglu eh mcilu?’” decai nang tei mene tadi zieni?14Pecai pa Jordan reuki ga nghung eh Tinggwang minabe ne rang kebeudung de mzai eh, pia hena pecu mpunglu. Pe pumteih hena keceuna pumteih ge nzwa yicangsiak dailu, nah pa yilu.15Naaman Tinggwang minabe da cailigwang, pa nah pe caisuime pelane, gwang eh pe dwaga saplu. Pa rangdi, “Pielo, cu Ih cilu da Israel ga gwale kideu pelane ga Tinggwang bam kemak. Cide ziemne, kehereide n kilabe dade mapeu ge keu lulo.”16Dede Elisha keli eh, “Ring kela RAMPAUBE nzwa, pedwa ga Ih sap, Ih magede keu lak.” Naaman Elisha de mapeuge keu lulo ketangbi, dede pa mlaidi.17Cine Naaman rangdi, “Cinzwa meliecai, ge peu Ih ncu tangdei gada püt kena n kilabe de peulo kiela, kedanemene cu gade, n kilabe ratak mede keru reca teipwa RAMPAUBE de gwale hera kedade tei beulak delu.18Aipau kiede ziemne RAMPAUBE n kilabe de mmaudi kelakne, cide cai, a hegwangpei Rimmon recaki ga mie eh reca kecudau, nah pa a ba ga ngngei nah Ih de Rimmon recaki gade keumie eh, Ih akatei Rimmon recaki ga keumie kecudau, aipau kie gade RAMPAUBE de peu n kilabe mau gi beulo.”19Elisha pe dage rangdi, “Lungciepbe bam eh tetcu.” Cine Naaman tetdi.20Pa tet ndei kemak dau ge, Elisha kilabe Gehazi Tinggwang minabe pekatei pecu resiu kecudau, “Pielo, a mpaube Aramme pei Naaman de ngga beu eh pa pe ba gade mapeu pwa gwang kelade keu ta dida. Ring kela RAMPAUBE nzwa, Ih pecai pak mie eh pe dade mage au keu luzie.”21Cine Gehazi Naaman caisui mie. Naaman mige pecai pak gwangla eh ngau kecudau, pa pecu dau kerane pe bagi gade nsau nghunglu eh rangdi, “Ma pelane petaubam ha?”22Gehazi rangdi, “Ma pelane petaubam lie. A mpaube ne acu langgai, rang eh, ‘Pielo, cu Ephraim lamlwatu deudi gade caihakecimedung maa mi hangna a da gwang bam. Kehereide rangkanggeu talent ge nah paiheni kereleu kena penai de ha gai beulo.’”23Naaman keli eh, “Ih rangkanggeu talent kena ncu a sui keyi gade peu neu bam lie.” Naaman Gehazi de ketangbi di nah loko kena gage rangkanggeu talent kena , paiheni kereleu kena le kang gaibeu, nah cidung pe kilabe hangna de pwapeu eh rangkanggeu nsung kena de Gehazi dwa pwa rai tetdi.24Gehazi lamlwatu ga gwang kecudau, pa rangkanggeu nsung penai ba gade pwalu nah heki gage cidungde keu kebai di; pa kila kena de lang gidi, nah penai tetdi.25Gehazi kilung ga nlüt eh pe mpaube dwa saplu kecudau, Elisha pe dage rangdi, “Nang daiga de gwang lano, Gehazi?” Pa keli eh, “N kilabe mage gade mie ma.”26Elisha Gehazi dage rangdi, “Minabe pe bagi gade mpet eh ncu redau kecudau a rabe nda la meni? Cu rangkang nah paiheni, olive bwa nah kubetsi, meurünna nah ketumseu, nah kilame mipeina nah kilame mipuina luu kera ting ni?27Cine Naaman kempa mateei de nda nah n leuhme da kelungta la dizie.” Cine Gehazi pedwa gade tetdi, mateei cide ne buising nzwa hadi.
Bridge Connectivity Solutions Pvt. Ltd.