2 Kings11
1Cidau Ahaziah pui, Athaliah, pe napei tsai kedi ngau luge, pa hegwang name pelane de teitset cuhdi.2Dede hegwangpei Jehoram napui nah Ahaziah tipui Jehosheba, Ahaziah napei Joash de ngngwalu, nah hegwang napeidung de teitset kedime kakgade pecu nah pe nkütpui de teu mbaidi; pa penaide zeubung ge gage kaidi. Penui pecu Athaliah dade teu mbaidi ciu eh pecu teitsetdi melu kerane.3Pa RAMPAUBE ki ga mbai eh mmi herok ge peda bamdi, Athaliah hegwang tei eh hangdeube reu di kebam tingdau.4Mmi hena bekum, Jehoiada samdung langgai delwe Caritme nah kekwame pehaireu muibedung de ngngwa gwang, nah penui de pekatei peda ngngwa gwanglu, RAMPAUBE kerecaki gage. Pa penuide ngngwa samkak ge teilu, delwe pa penuide peu RAMPAUBE ki gade sampetlu. Pecai pa penuide hegwangpei napei de liagai.5Pa penuide aja kai eh ranggai, “Nnui aide teibi maisia. Nnui zicum gade zi ge Sabbath benai gwang kecume, hegwang ki kwa zie,6nah zicum gade zige Sur Rieki ga kwa zie, nah zi cum gade zige kekwameki cai ga herieki kebam ga kwa zie.”7Nah hemaa kedadung kena de Sabbath benai hegwa tei kemakme, nnui hegwangpei ziemne RAMPAUBE kide kwalu maisia.8Nnui mileune de pe reunetdung pe ba ga pwalwe hegwangpei de twagwa lu maisia. Nnui taiga kelüt keheibe dede teitsetdi lu. Nnui hegwangpei kempet kenlüt leu ga kwalu maisia.9Cine pehaireu muibedung cingkupei Jehoiada aja kai kebeu leune mzailu. Mi hange ge kecu pe minadung, Sabbath benai hegwa tei kera gwang keramedung nah Sabbath benai hegwa ketei mtak keramedung de ngngwalu; nah penui cingkupei Jehoiada da gwanglu.10Pecai cingkupei Jehoiada pehaireu muibedung de RAMPAUBE ki ga kebam, Hegwangpei David gu hengeidung nah hegeudung pwapeu.11Cine kekwame hegwangpei de twagwa saplu, mi hangge ge kecu pe reunet pe ba gage pwalwe, kerecaki zetle bie gade hile bie, recabam taiga nah kerecaki ga.12Cidau Jehoiada hegwangpei napei Joash de ngngwa mpetlu, pe peu gage hegwangpeurwa kailu delwe samkakkelu zaidung de pecu pwa peudi. Delwe penui pecu hegwang teilu eh pecu keniaklu. Penui bapeu eh rangdi, “Hegwangpei de peu ring ketiebe teilo!”13Athaliah kekwame nah minadung kwa siu luge, pa RAMPAUBE ki ga minadung da gwanglu.14Pa piegai, ge ainie, hegwangpei hezaibe nzwa hetsia taiga sapbam, nah kedimedung nah teluikekwame hegwangpei taiga bam. Mina leune penui suiyi delwe teluidung kwabam. Ge Athaliah pe niadung hiet delwe sahbakgai, “Heciem kesia! Heciem kesia!”15Ge cingkupei Jehoiada pehaireu muibedung, reugwame reu kedimedung de aja kai eh ranggai, “Pecu kekwame ria kena kakgade ngngwa mpetlu. Keheibe de pecai sui cai, cipau dede kiengtie le teitsetdi lu.” Kedanemene cingkupei rangdi, “RAMPAUBE ki gade pecu teitset diso.”16Cine penui pecu tuilu, pa hekündung hegwangki ga kelüt lampui ga gwang canglu ge, delwe cika ge pecu teitsetdi.17Ge Jehoiada RAMPAUBE, nah hegwangpei nah minadung kakga penui RAMPAUBE minadung zielie kecu samkak ge teilu. Nah hegwangpei nah minadung kakgade samkak ge teilu.18Cine minadung pelane Baal ki ga mie delwe cide tei ngkaudi. Penui Baal recabamdung tei pangdi nah pe miedung de tei takcaidi, delwe penui Baal cingkupei Mattan de cipau recabamdung dwa gade teitsetdi. Delwe cingkupei Jehoiada RAMPAUBE kerecaki reu kekwame de kedetlu.19Jehoiada pehaireu muibedung, Caritme, reketme, nah cipau deu ga mina pelane de ngngwalu, nah penui ket tei eh hegwangpei de RAMPAUBE ki gade ngngwa nghunglu delwe hegwangpei ki ga kekwame rieki lampui gade penui lütdi. Joash hegwangbam ga bamlu.20Cine cipau deu ga minadung pelane penui suiyidi, nah namdi de zing dedi Athaliah de hegwangpei ki gade kiengtie le teitset kedi cai.21Joash mmi hena dige pa hegwang teicuhdi.
Bridge Connectivity Solutions Pvt. Ltd.